ગુજરાતમાં ચોમાસાએ જોરદાર બેટિંગ શરૂ કરી છે. રાજ્ય પર એકસાથે પાંચ શક્તિશાળી હવામાન સિસ્ટમ સક્રિય થતાં દક્ષિણ ગુજરાત અને સૌરાષ્ટ્રમાં ભારે વરસાદ વરસી રહ્યો છે. સુરતમાં સતત બીજા દિવસે મેઘરાજાએ ધમાકેદાર એન્ટ્રી કરતાં અનેક વિસ્તારોમાં રોડ-રસ્તા પાણીમાં ગરકાવ થઈ ગયા છે, જ્યારે અમરેલીમાં ભારે વરસાદના કારણે જિલ્લાના 10માંથી 7 ડેમ ઓવરફ્લો થયા છે. હવામાન વિભાગે આજે રાજ્યના પાંચ જિલ્લામાં અતિભારે વરસાદનું રેડ એલર્ટ જાહેર કર્યું છે.
સુરતમાં જનજીવન અસ્તવ્યસ્ત
સુરત શહેરમાં સવારથી જ ધોધમાર વરસાદ વરસતા પર્વત પાટિયા, કતારગામ સહિતના અનેક વિસ્તારોમાં ઘૂંટણસમા પાણી ભરાઈ ગયા હતા. રસ્તાઓ પર પાણી ભરાતા વાહનો બંધ પડી ગયા અને લોકોને અવરજવરમાં ભારે મુશ્કેલીનો સામનો કરવો પડ્યો. નીચાણવાળા આવાસો અને સોસાયટીઓમાં પણ વરસાદી પાણી ઘૂસી જતાં જળબંબાકારની સ્થિતિ સર્જાઈ હતી.
સ્કૂલ-કોલેજોમાં રજા જાહેર
હવામાન વિભાગની ભારે વરસાદની આગાહીને ધ્યાનમાં રાખીને સુરત મહાનગરપાલિકા અને નગરપાલિકા વિસ્તારમાં આવેલી તમામ પ્રાથમિક, માધ્યમિક, ઉચ્ચતર માધ્યમિક શાળાઓ તેમજ આંગણવાડીઓમાં આજે રજા જાહેર કરવામાં આવી છે. જિલ્લા શિક્ષણાધિકારીએ વિદ્યાર્થીઓની સલામતીને ધ્યાનમાં રાખીને આ નિર્ણય લીધો છે. ગ્રામ્ય વિસ્તારોમાં સ્થાનિક પરિસ્થિતિ મુજબ શાળા સંચાલકોને નિર્ણય લેવાની છૂટ આપવામાં આવી છે.
નવસારીમાં 26 રસ્તા બંધ, 10 ગામો સંપર્કવિહોણા
ભારે વરસાદને કારણે નવસારી જિલ્લામાં કોઝવે અને અંડરપાસ પાણીમાં ગરકાવ થઈ ગયા છે. જિલ્લાના કુલ 26 રસ્તાઓ વાહનવ્યવહાર માટે બંધ કરવામાં આવ્યા છે. પૂર્ણા નદીમાં પૂર આવતાં સૂપા-કુરેલને જોડતો પુલ ડૂબી ગયો છે, જેના કારણે 10 જેટલા ગામોનો સંપર્ક તૂટી ગયો છે. જિલ્લામાં તમામ શાળાઓ, કોલેજો, ITI અને આંગણવાડીઓમાં પણ રજા જાહેર કરવામાં આવી છે.
અમરેલીના 7 ડેમ ઓવરફ્લો
અમરેલી જિલ્લામાં છેલ્લા 48 કલાકથી પડી રહેલા ભારે વરસાદના કારણે જિલ્લાના 10માંથી 7 મોટા જળાશયો ઓવરફ્લો થઈ ગયા છે. ઠેબી ડેમના દરવાજા ખોલીને પાણી છોડવામાં આવી રહ્યું છે. ડેમમાંથી સતત પાણી છોડાતા અમરેલી, ફતેપુર, પ્રતાપગઢ અને ચાપાથળ સહિતના ગામોને હાઈ એલર્ટ પર રાખવામાં આવ્યા છે અને નદી કિનારે ન જવા સૂચના આપવામાં આવી છે.
તાપી અને નર્મદામાં પણ સ્થિતિ ગંભીર
તાપી જિલ્લાના ઐતિહાસિક ડોસવાડા ડેમમાં પાણીની સતત આવકને કારણે ડેમ ઓવરફ્લો થયો છે. જેના પગલે હેઠવાસના 17 ગામોને એલર્ટ કરવામાં આવ્યા છે. બીજી તરફ નર્મદાના સાગબારા અને ચીકદા વિસ્તારમાં નદીઓ ગાંડીતૂર બનતાં અનેક ઘરોમાં પાણી ઘૂસી ગયા છે અને કેટલાક વિસ્તારોમાં પૂર જેવી સ્થિતિ સર્જાઈ છે.
વલસાડમાં હાઈવે પાણીમાં ગરકાવ
વલસાડ જિલ્લામાં પણ ભારે વરસાદને કારણે નેશનલ હાઈવે-48 અને સર્વિસ રોડ પર ઘૂંટણસમા પાણી ભરાઈ ગયા હતા. વાપીમાં સૌથી વધુ 8.6 ઇંચ વરસાદ નોંધાતા અનેક વાહનો બંધ પડી ગયા અને લાંબા ટ્રાફિક જામના દૃશ્યો સર્જાયા.
રેલવે સેવાઓ પર અસર
મુંબઈ અને આસપાસના વિસ્તારોમાં ભારે વરસાદને કારણે પશ્ચિમ રેલવેની અનેક ટ્રેનો પ્રભાવિત થઈ છે. ગુજરાત આવતી-જતી કેટલીક ટ્રેનો રદ કરવામાં આવી છે, જ્યારે અનેક ટ્રેનોના સમયપત્રકમાં ફેરફાર કરવામાં આવ્યો છે. મુસાફરોને મુસાફરી પહેલાં ટ્રેનનું લાઈવ સ્ટેટસ ચકાસવાની સલાહ આપવામાં આવી છે.
આજે 5 જિલ્લામાં રેડ એલર્ટ
હવામાન વિભાગે આજે રાજ્યના પાંચ જિલ્લામાં અતિભારે વરસાદની શક્યતા વ્યક્ત કરીને રેડ એલર્ટ જાહેર કર્યું છે. અન્ય ત્રણ જિલ્લામાં પણ ભારે વરસાદની આગાહી કરવામાં આવી છે. તંત્રે નદી-નાળા, કોઝવે અને નીચાણવાળા વિસ્તારોમાં ન જવાની અપીલ કરી છે અને લોકોને સાવચેતી રાખવા સૂચના આપી છે.
તમામ લેટેસ્ટ ન્યૂઝના અપડેટ્સ સીધા તમારા મોબાઈલ પર મેળવવા માટે, નીચે આપેલા બટન પર ક્લિક કરીને અમારા વોટ્સએપ ગ્રુપમાં જોડાઓ.
Join WhatsApp Group
Leave feedback about this