અમેરિકાના ઈરાનમાં 140 ઠેકાણાં પર હુમલા, ઈરાનનો કુવૈત-બહેરીનમાં વળતો પ્રહાર: હોર્મુઝ સ્ટ્રેટની સુરક્ષાને લઈને તેહરાનની મોટી ચેતવણી

મિડલ ઈસ્ટમાં અમેરિકા અને ઈરાન વચ્ચેનો સૈન્ય સંઘર્ષ વધુ ગંભીર બન્યો છે. અમેરિકાએ રવિવારે ઈરાનના 140થી વધુ સૈન્ય અને વ્યૂહાત્મક ઠેકાણાઓ પર મિસાઈલ અને ડ્રોન હુમલા કર્યા હોવાનું જણાવવામાં આવ્યું છે. હુમલાઓ કિશ્મ, સીરિક, બંદર અબ્બાસ, જાસ્ક, બુશેહર, ખુઝેસ્તાન સહિત અનેક વિસ્તારોમાં થયા હોવાનું ઈરાની મીડિયાએ દાવો કર્યો છે.

તેના જવાબમાં ઈરાને સોમવારે કુવૈત અને બહેરીનમાં આવેલા અમેરિકી સૈન્ય મથકોને નિશાન બનાવ્યાનો દાવો કર્યો છે. ઈસ્લામિક રિવોલ્યુશનરી ગાર્ડ કોર્પ્સ (IRGC) અનુસાર, કુવૈતના અલી અલ-સલેમ એરબેઝ પર ઈંધણ ટેન્ક અને પેટ્રિયટ એર ડિફેન્સ સિસ્ટમ પર હુમલો કરવામાં આવ્યો હતો. ઉપરાંત અહમદ અલ-જાબેર એરબેઝના રડાર સિસ્ટમને પણ નિશાન બનાવવામાં આવી હતી.

IRGCએ બહેરીનના શેખ ઈસા એરબેઝ પર પણ હુમલાનો દાવો કર્યો છે. ઈરાનના જણાવ્યા મુજબ હેલિકોપ્ટર જાળવણી કેન્દ્ર, P-8 લશ્કરી વિમાનના હેંગર અને અમેરિકી સેનાના ડ્રોન કમાન્ડ એન્ડ કંટ્રોલ સેન્ટર પર મિસાઈલ અને ડ્રોન હુમલા કરવામાં આવ્યા હતા. જોકે અમેરિકા અને બહેરીન તરફથી આ દાવાઓની સત્તાવાર પુષ્ટિ કરવામાં આવી નથી.

હોર્મુઝ સ્ટ્રેટ પર ઈરાનની કડક ચેતવણી

ઈરાનના સુપ્રીમ લીડરના સલાહકાર મોહસિન રેઝાઈએ હોર્મુઝ સ્ટ્રેટને ઈરાન માટે “પરમાણુ બોમ્બ કરતાં પણ વધુ મહત્વપૂર્ણ” ગણાવ્યું છે. તેમણે કહ્યું કે ઈરાન દરેક સંજોગોમાં હોર્મુઝ સ્ટ્રેટની સુરક્ષા કરશે અને વિદેશી સૈન્ય દખલગીરી સહન નહીં કરે.

હોર્મુઝ સ્ટ્રેટ વિશ્વના સૌથી મહત્વપૂર્ણ દરિયાઈ વેપાર માર્ગોમાંથી એક છે. વિશ્વના દરિયાઈ માર્ગે થતા ક્રૂડ ઓઈલના વેપારનો મોટો હિસ્સો અને LNG સપ્લાય આ જ માર્ગ પરથી પસાર થાય છે. આ વિસ્તારમાં વધતા તણાવને કારણે આંતરરાષ્ટ્રીય બજારમાં ક્રૂડ ઓઈલના ભાવમાં પણ 3 ટકાથી વધુનો વધારો નોંધાયો છે.

છેલ્લા 24 કલાકના મહત્વના અપડેટ્સ

અમેરિકી સેન્ટ્રલ કમાન્ડે દાવો કર્યો છે કે છેલ્લા ત્રણ દિવસમાં ઈરાનના 300થી વધુ સૈન્ય ઠેકાણાઓને નિશાન બનાવવામાં આવ્યા છે. બીજી તરફ ઓમાન નજીક ‘GFS ગેલેક્સી’ જહાજ પર હુમલામાં એક ભારતીય હજુ પણ ગુમ હોવાનું જણાવાયું છે. ભારતે નાગરિક જહાજો પર થતા હુમલાઓની નિંદા કરીને તેને તાત્કાલિક બંધ કરવાની અપીલ કરી છે.

વૈશ્વિક ચિંતા વધી

અમેરિકા અને ઈરાન વચ્ચે વધતા તણાવને કારણે વૈશ્વિક શેરબજારોમાં પણ ભારે અસર જોવા મળી છે. દક્ષિણ કોરિયાનો KOSPI ઇન્ડેક્સ 8 ટકા સુધી તૂટી જતાં 20 મિનિટ માટે ટ્રેડિંગ રોકવું પડ્યું હતું. વિશ્લેષકોનું માનવું છે કે જો હોર્મુઝ સ્ટ્રેટમાં અવરોધ સર્જાશે તો વિશ્વભરના ઊર્જા બજારો અને વૈશ્વિક અર્થતંત્ર પર તેની ગંભીર અસર પડી શકે છે.