ભારતની મોટી સિદ્ધિ: સંપૂર્ણ સ્વદેશી આકાશ-NG મિસાઈલનું સફળ પરીક્ષણ

ભારતે આકાશ-NG મિસાઈલ સિસ્ટમનું સફળ પરીક્ષણ કર્યું, સ્વદેશી એર ડિફેન્સને મોટી મજબૂતી

ભારતીય સેનાએ મંગળવારે આકાશ નેક્સ્ટ જનરેશન (આકાશ-NG) મિસાઈલ સિસ્ટમનું સફળ પરીક્ષણ કર્યું. પરીક્ષણ દરમિયાન સિસ્ટમે તમામ જરૂરી સર્વિસ ક્વોલિટી રિક્વાયરમેન્ટ્સ (PSQR) પૂર્ણ કર્યા, જેનાથી તેની ઓપરેશનલ ક્ષમતાની પુષ્ટિ થઈ છે. આ સફળતાને દેશની સ્વદેશી એર ડિફેન્સ તાકાત મજબૂત કરવાની દિશામાં એક મહત્વપૂર્ણ પગલું માનવામાં આવી રહ્યું છે.

DRDOના જણાવ્યા અનુસાર, આકાશ-NG મિસાઈલ સિસ્ટમે પરીક્ષણ દરમિયાન વિવિધ અંતર અને ઊંચાઈ પરના હવાઈ લક્ષ્યોને સચોટ રીતે નષ્ટ કર્યા. તેમાં સરહદ નજીક ઓછી ઊંચાઈએ ઉડતા ટાર્ગેટ્સ તેમજ લાંબા અંતરે વધુ ઊંચાઈ પરના હવાઈ ખતરાઓનો પણ સમાવેશ હતો.

સંપૂર્ણપણે સ્વદેશી ટેકનોલોજીથી તૈયાર

આકાશ-NG મિસાઈલ સિસ્ટમ સંપૂર્ણપણે સ્વદેશી ટેકનોલોજી પર આધારિત છે. તેમાં દેશી RF સીકર અને શક્તિશાળી સોલિડ રોકેટ મોટરનો ઉપયોગ કરવામાં આવ્યો છે. તેની ઝડપી ગતિ અને આધુનિક ક્ષમતાઓ દેશને વિવિધ પ્રકારના હવાઈ ખતરાઓથી સુરક્ષિત રાખવામાં મહત્વપૂર્ણ ભૂમિકા ભજવશે.

આકાશ-NG શા માટે ખાસ છે?

અધિકારીઓના જણાવ્યા અનુસાર, આકાશ-NG એક આધુનિક અને શક્તિશાળી એર ડિફેન્સ મિસાઈલ સિસ્ટમ છે. તેને DRDO દ્વારા વિકસાવવામાં આવી છે અને તેનું ઉત્પાદન ભારત ડાયનેમિક્સ લિમિટેડ (BDL) દ્વારા કરવામાં આવે છે. આ સિસ્ટમ એકસાથે અનેક હવાઈ લક્ષ્યોને નિશાન બનાવવાની ક્ષમતા ધરાવે છે.

આકાશ-NGની મારક ક્ષમતા અંદાજે 30 કિલોમીટર સુધીની છે અને તે 18 કિલોમીટર સુધીની ઊંચાઈએ દુશ્મનના હવાઈ ખતરાઓને રોકી શકે છે. સફળ પરીક્ષણ બાદ તેને ભારતીય વાયુસેના અને ભારતીય સેનામાં સામેલ કરવાની પ્રક્રિયા ઝડપી કરવામાં આવી છે. તેના સમાવેશથી દેશની હવાઈ સુરક્ષા વધુ મજબૂત બનશે.

જુલાઈમાં આકાશ પ્રાઇમનું પણ સફળ પરીક્ષણ

આ પહેલા, 17 જુલાઈએ ભારતીય સેનાએ લદ્દાખમાં સ્વદેશી રીતે વિકસિત એર ડિફેન્સ સિસ્ટમ ‘આકાશ પ્રાઇમ’નું પણ સફળ પરીક્ષણ કર્યું હતું. DRDO દ્વારા વિકસિત આ એડવાન્સ સિસ્ટમે પૂર્વ લદ્દાખમાં 15,000 ફૂટ (4500 મીટર)થી વધુ ઊંચાઈ પર ઉડી રહેલા બે ડ્રોનને સફળતાપૂર્વક તોડી પાડ્યા હતા.

આકાશ પ્રાઇમ, આકાશ વેપન સિસ્ટમનું વધુ આધુનિક વર્ઝન છે, જે ખાસ કરીને ઊંચાઈવાળા અને ઓછી ઓક્સિજનવાળા વિસ્તારોમાં અસરકારક રીતે કાર્ય કરવા માટે તૈયાર કરવામાં આવ્યું છે. આ બંને સફળ પરીક્ષણો ભારતની સ્વદેશી ડિફેન્સ ટેકનોલોજીમાં વધી રહેલી શક્તિનું પ્રતિબિંબ છે.