પેપર લીક કેસમાં ફાસ્ટ ટ્રેક કોર્ટ બનશે: PM મોદીએ કહ્યું- યુવાનોનું ભવિષ્ય સર્વોચ્ચ પ્રાથમિકતા; રાહુલનો પલટવાર- શિક્ષણ વ્યવસ્થા બરબાદ કરવા સરકાર જવાબદાર, CJPએ માગ્યું PMનું રાજીનામું

નવી દિલ્હી: દિલ્હીના જંતર-મંતર પર ચાલી રહેલા NEET પેપર લીક વિવાદ વચ્ચે વડાપ્રધાન નરેન્દ્ર મોદીએ ગુરુવારે મોટું નિવેદન આપ્યું છે. PM મોદીએ સોશિયલ મીડિયા પ્લેટફોર્મ X પર પોસ્ટ કરીને જણાવ્યું કે પેપર લીકના દોષિતોને સજા આપવા માટે ફાસ્ટ ટ્રેક કોર્ટ બનાવવામાં આવશે. તેમણે કહ્યું કે દેશના યુવાનોનું હિત અને તેમનું ભવિષ્ય સરકારની સર્વોચ્ચ પ્રાથમિકતા છે. યુવાનોના ભવિષ્ય સાથે ચેડા કરનારાઓને કોઈ પણ સંજોગોમાં છોડવામાં આવશે નહીં.

PM મોદીના આ નિવેદન બાદ કોંગ્રેસ નેતા રાહુલ ગાંધીએ વળતો પ્રહાર કર્યો. રાહુલે X પર લખ્યું કે, “તમે જ અમારા યુવાનોના ભવિષ્યને સૌથી વધુ નુકસાન પહોંચાડ્યું છે. તમે એજ્યુકેશન સિસ્ટમને બરબાદ થવા દીધી અને તેના માટે જવાબદાર લોકોને સંરક્ષણ આપ્યું.”

આ દરમિયાન કોકરોચ જનતા પાર્ટી (CJP)એ પણ વડાપ્રધાન પર નિશાન સાધ્યું. PM મોદીની પોસ્ટ બાદ CJPએ વડાપ્રધાનનો ફોટો પોસ્ટ કરીને સીધી માંગ કરી કે “વડાપ્રધાનજી રાજીનામું આપો.”

20 જૂનથી જંતર-મંતર પર CJPનું આંદોલન

દિલ્હીના જંતર-મંતર પર 20 જૂનથી કોકરોચ જનતા પાર્ટી NEET પેપર લીક અને શિક્ષણ વ્યવસ્થાને લઈને વિરોધ પ્રદર્શન કરી રહી છે. સંગઠન દ્વારા શિક્ષણ મંત્રી ધર્મેન્દ્ર પ્રધાનના રાજીનામાની માંગ કરવામાં આવી રહી છે.

21 જુલાઈએ રાહુલ ગાંધી સહિત અનેક વિપક્ષી નેતાઓએ દિલ્હીમાં PM આવાસની બહાર ધરણાં કર્યા હતા. આ દરમિયાન NEET પેપર લીક, વિદ્યાર્થીઓ પર થયેલા લાઠીચાર્જ અને શિક્ષણ મંત્રીના રાજીનામાને લઈને સરકાર સામે નારા લગાવવામાં આવ્યા હતા.

બીજી તરફ, એક્ટિવિસ્ટ સોનમ વાંગચુક પણ 26 દિવસથી ભૂખ હડતાળ પર છે. તબિયત લથડતાં તેમને ગુરુગ્રામની મેદાંતા હોસ્પિટલમાં દાખલ કરવામાં આવ્યા છે, જ્યાં તેમની સારવાર ચાલી રહી છે.

પેપર લીક કેસ માટે દેશમાં પહેલીવાર ફાસ્ટ ટ્રેક કોર્ટ

દેશમાં અત્યાર સુધી પેપર લીકના કેસો માટે અલગથી ફાસ્ટ ટ્રેક કોર્ટની વ્યવસ્થા નહોતી. આવા કેસોની સુનાવણી સામાન્ય અદાલતોમાં થતી હોવાથી ઘણીવાર નિર્ણય આવવામાં વર્ષો લાગી જતા હતા.

હવે PM મોદીએ પેપર લીક કેસોની ઝડપી સુનાવણી અને દોષિતોને વહેલી તકે સજા આપવા માટે ફાસ્ટ ટ્રેક કોર્ટ બનાવવાની જાહેરાત કરી છે.

કેન્દ્ર સરકારના આંકડા મુજબ, રેપ અને POCSO કેસો માટે બનાવવામાં આવેલી ફાસ્ટ ટ્રેક કોર્ટોએ 2019થી 2025 દરમિયાન 3.06 લાખથી વધુ કેસોનો નિકાલ કર્યો છે. આ કોર્ટનો ડિસ્પોઝલ રેટ 96.28% રહ્યો છે. જોકે, નવા કેસોની સતત નોંધણીને કારણે 2025ના અંત સુધીમાં 2.45 લાખથી વધુ કેસ પેન્ડિંગ હતા.

રાહુલ ગાંધીએ સરકાર સામે રાખી 3 માંગણીઓ

રાહુલ ગાંધીએ બુધવારે દિલ્હીના ઇન્દિરા ભવનમાં લગભગ 40 મિનિટની પ્રેસ કોન્ફરન્સ કરી હતી. આ દરમિયાન તેમણે 20 જુલાઈના ‘સંસદ ચલો’ માર્ચમાં સામેલ વિદ્યાર્થીઓ પર થયેલી પોલીસ કાર્યવાહીના વીડિયો બતાવ્યા.

રાહુલે આરોપ લગાવ્યો કે સુરક્ષા દળોએ વિદ્યાર્થીઓ સાથે ખરાબ વર્તન કર્યું અને તેમના પર લાઠીચાર્જ કર્યો. તેમણે કહ્યું કે NEET પેપર લીકથી લાખો વિદ્યાર્થીઓ અને તેમના પરિવારો પ્રભાવિત થયા છે, પરંતુ હજુ સુધી જવાબદાર લોકો સામે પૂરતી કાર્યવાહી કરવામાં આવી નથી.

પ્રેઝન્ટેશન દરમિયાન રાહુલે ત્રણ મુખ્ય માંગણીઓ કરી:

• શિક્ષણ મંત્રી ધર્મેન્દ્ર પ્રધાન રાજીનામું આપે.
• વિદ્યાર્થીઓ પર લાઠીચાર્જ કરનારાઓ સામે કાર્યવાહી થાય.
• વડાપ્રધાન નરેન્દ્ર મોદી વિદ્યાર્થીઓની માફી માંગે.

જે.પી. નડ્ડાનો રાહુલ ગાંધી પર વળતો પ્રહાર

કેન્દ્રીય મંત્રી જે.પી. નડ્ડાએ રાહુલ ગાંધીના આરોપોનો જવાબ આપતાં કહ્યું કે રાહુલ ગાંધી જણાવે કે કોંગ્રેસની સરકારો દરમિયાન પેપર લીકની ઘટનાઓ બની ત્યારે તેઓ સવાલ કેમ નહોતા ઉઠાવતા.

નડ્ડાએ આરોપ લગાવ્યો કે રાહુલ ગાંધી માત્ર ભાજપ શાસિત રાજ્યો અને કેન્દ્ર સરકારને જ નિશાન બનાવે છે. તેમણે સવાલ કર્યો કે રાહુલ આ મામલે આટલા સિલેક્ટિવ કેમ છે.

PM આવાસ બહાર ધરણાં બાદ રાહુલને પોલીસે ઉઠાવ્યા હતા

કોંગ્રેસે 21 જુલાઈએ દિલ્હીના 7, લોક કલ્યાણ માર્ગ સ્થિત PM મોદીના સત્તાવાર નિવાસસ્થાનની બહાર ધરણાં કર્યા હતા. રાહુલ ગાંધી, પ્રિયંકા ગાંધી, મલ્લિકાર્જુન ખડગે અને અખિલેશ યાદવ સહિત અનેક વિપક્ષી નેતાઓ તેમાં સામેલ થયા હતા.

આ દરમિયાન રાહુલ ગાંધીએ NEET પેપર લીક મુદ્દે શિક્ષણ મંત્રીના રાજીનામા અને સંસદમાં ચર્ચાની માંગ કરી હતી. વિરોધ દરમિયાન ‘PM મોદી રાજીનામું આપો’ના નારા પણ લગાવવામાં આવ્યા હતા. ત્યારબાદ પોલીસ અને પેરા મિલિટરીના જવાનો રાહુલ ગાંધી સહિત કેટલાક નેતાઓને ત્યાંથી હટાવી લઈ ગયા હતા.

રાહુલ ગાંધીની પ્રેઝન્ટેશનવાળી પ્રેસ કોન્ફરન્સ ચર્ચામાં

રાહુલ ગાંધી છેલ્લા બે વર્ષમાં અનેક વખત ચાર્ટ, ગ્રાફ અને સ્લાઇડ્સ દ્વારા પ્રેઝન્ટેશન આપીને પ્રેસ કોન્ફરન્સ કરી ચૂક્યા છે.

જૂન 2024માં લોકસભા ચૂંટણી બાદ તેમણે શેરબજારના મુદ્દે પ્રેઝન્ટેશન આપી હતી. ત્યારબાદ 2025માં વોટ ચોરીના આરોપોને લઈને પણ તેમણે દસ્તાવેજો અને સ્લાઇડ્સ રજૂ કરી હતી.

હવે જુલાઈ 2026માં NEET વિવાદ, કથિત પેપર લીક અને વિદ્યાર્થીઓ પર થયેલી પોલીસ કાર્યવાહીને લઈને રાહુલ ગાંધીએ ફરી પ્રેઝન્ટેશન દ્વારા સરકાર પર ગંભીર આરોપો લગાવ્યા છે.

પેપર લીક મુદ્દે હવે સરકારના ફાસ્ટ ટ્રેક કોર્ટના નિર્ણય અને વિપક્ષના આંદોલન વચ્ચે રાજકીય ઘમાસાણ વધુ તેજ બનવાની શક્યતા છે.