ભારત-ન્યૂઝીલેન્ડ વચ્ચે ફ્રી ટ્રેડ ડીલનું એલાન, આજથી અડધાથી વધુ આયાત ડ્યુટી ફ્રી

ભારત અને ન્યુઝીલેન્ડ વચ્ચે ફ્રી ટ્રેડ એગ્રીમેન્ટ (FTA) પર સોમવારે અંતિમ મહોર લાગી છે. ન્યુઝીલેન્ડના વડાપ્રધાન ક્રિસ્ટોફર લક્સને સોમવારે આ ડીલની સત્તાવાર જાહેરાત કરી. તેમણે જણાવ્યું કે આ કરારથી ન્યુઝીલેન્ડના નિકાસકારો માટે વિશ્વની સૌથી મોટી વસ્તી ધરાવતા ભારતીય બજારમાં પ્રવેશ સરળ બનશે.

ન્યુઝીલેન્ડના નિકાસકારોને મળશે ભારતીય મિડલ ક્લાસ સુધી પહોંચ

આ ડીલથી ન્યુઝીલેન્ડના નિકાસકારોને ભારતના ઝડપથી વિકસતા મધ્યમ વર્ગ સુધી સીધી અને સરળ પહોંચ મળશે. કરાર હેઠળ ન્યુઝીલેન્ડથી ભારતમાં આવતી લગભગ 95% વસ્તુઓ પરની આયાત જકાત (ટેરિફ) નાબૂદ કરવામાં આવી છે અથવા તેમાં નોંધપાત્ર ઘટાડો કરવામાં આવ્યો છે. તેમાંના 50%થી વધુ ઉત્પાદનો કરારના પહેલા દિવસથી જ ડ્યુટી ફ્રી થઈ જશે.

કીવી, સફરજન અને ઊન થશે સસ્તા

આ ફ્રી ટ્રેડ ડીલની સીધી અસર સામાન્ય ભારતીય ગ્રાહકોના ખિસ્સા પર જોવા મળશે. ન્યુઝીલેન્ડથી આવતા તાજા ફળો, ખાસ કરીને કીવી અને સફરજન, પર હવે ઓછો ટેક્સ લાગશે. આ ઉપરાંત ઊન અને તેમાંથી બનેલા ઉત્પાદનો, લાકડું તેમજ કેટલીક ખાસ પ્રકારની ડેરી વસ્તુઓના ભાવમાં પણ ઘટાડો થવાની શક્યતા છે.

‘ડે-વન’થી જ મળશે ડ્યુટી ફ્રી લાભ

ન્યુઝીલેન્ડ સરકારના જણાવ્યા મુજબ આ કરારની સૌથી મોટી ખાસિયત એ છે કે કરારના પહેલા જ દિવસે (ડે-વન) અડધાથી વધુ ઉત્પાદનો પર કોઈ ડ્યુટી લાગશે નહીં. એટલે કે આવતીકાલથી જ ન્યુઝીલેન્ડથી આવતો મોટો હિસ્સો ભારતીય બજારમાં કોઈ વધારાના ટેક્સ વિના ઉપલબ્ધ થશે. પરિણામે વિદેશી ફળો, વાઇન અને ડેરી ઉત્પાદનો ભારતીય મિડલ ક્લાસ માટે વધુ સસ્તા બનશે.

2030 સુધી ભારતીય અર્થતંત્ર $7 ટ્રિલિયન થવાનો અંદાજ

ન્યુઝીલેન્ડે આ ડીલ ભારતની વધતી આર્થિક શક્તિને ધ્યાનમાં રાખીને કરી છે. કીવી સરકારનો અંદાજ છે કે વર્ષ 2030 સુધીમાં ભારતીય અર્થતંત્ર લગભગ 12 ટ્રિલિયન ન્યુઝીલેન્ડ ડોલર (લગભગ ₹627 લાખ કરોડ)નું થઈ જશે. વધતી વસ્તી અને ખરીદ શક્તિને કારણે ભારત ન્યુઝીલેન્ડના ડેરી, તાજા ફળ અને ઊન ઉદ્યોગ માટે વિશાળ તકનું કેન્દ્ર બની રહ્યું છે.

10 વર્ષ બાદ ચર્ચા ફરી શરૂ, 9 મહિનામાં ડીલ ફાઇનલ

ભારત-ન્યુઝીલેન્ડ વચ્ચેનો આ વ્યાપારી કરાર છેલ્લા 10 વર્ષથી અટકેલો હતો. આ વર્ષે માર્ચમાં બંને દેશોએ ફરીથી ચર્ચા શરૂ કરી અને માત્ર 9 મહિનામાં ડીલ ફાઇનલ કરી લીધી. આ પહેલા ભારતે ઓસ્ટ્રેલિયા અને UAE સાથે પણ આવા જ ફ્રી ટ્રેડ એગ્રીમેન્ટ કર્યા છે. છેલ્લા 5 વર્ષમાં ભારતે 7 ફ્રી ટ્રેડ ડીલ્સ સાઇન કરી છે, જેનાથી દેશની ગ્લોબલ ટ્રેડ પાર્ટનરશિપ વધુ મજબૂત બની છે.