₹700 કરોડ ક્લબમાં ‘ધુરંધર’ની ધમાકેદાર એન્ટ્રી, રણવીર સિંહની ફિલ્મે વિશ્વભરમાં મચાવી ધૂમ

રણવીર સિંહની ફિલ્મ ‘ધુરંધર’ એ વિશ્વભરમાં દર્શકોને ઘેલું લગાવી દીધા છે. રિલીઝ થયાના સતત 15મા દિવસે પણ ફિલ્મનો બોક્સ ઓફિસ પર દબદબો યથાવત્ જોવા મળી રહ્યો છે. ‘ધુરંધર’ની આંધી વચ્ચે હોલિવૂડની બહુપ્રતિક્ષિત ફિલ્મ ‘અવતાર 3: ફાયર એન્ડ એશ’ પણ ફિક્કી પડતી નજરે પડી છે. ભારતમાં ‘અવતાર’ ફ્રેન્ચાઇઝીની મોટી ફેન ફોલોઇંગ હોવા છતાં, ‘ધુરંધર’ના પ્રભાવને કારણે ‘અવતાર 3’ને ‘અવતાર 2’ની સરખામણીએ અડધી ઓપનિંગ મળી છે.

15 દિવસમાં ₹737 કરોડથી વધુની કમાણી

5 ડિસેમ્બર 2025ના રોજ રિલીઝ થયેલી ‘ધુરંધર’એ પહેલા દિવસથી જ રેકોર્ડ બ્રેક કમાણી શરૂ કરી હતી. ત્રીજા શુક્રવારે પણ ફિલ્મે સૌથી વધુ કમાણીના રેકોર્ડ તોડી નાખ્યા. ફિલ્મ ભારતમાં 500 કરોડ ક્લબ અને વિશ્વભરમાં 700 કરોડ ક્લબમાં સામેલ થઈ ચૂકી છે.

બોક્સ ઓફિસના આંકડા દર્શાવતી વેબસાઇટ ‘સેકનિલ્ક’ ના રિપોર્ટ અનુસાર, શુક્રવારે (19 ડિસેમ્બર) ફિલ્મને 15 દિવસ પૂર્ણ થયા અને તેણે ભારતમાં કુલ ₹579.5 કરોડની કમાણી કરી. જ્યારે વિદેશી બજારમાંથી ₹158 કરોડનો વ્યવસાય થયો. આ રીતે, 15 દિવસના અંતે ‘ધુરંધર’એ કુલ ₹737.5 કરોડની ભવ્ય કમાણી કરી છે.

‘છાવા’ અને ‘એનિમલ’ના રેકોર્ડ તૂટ્યા

‘ધુરંધર’એ ત્રીજા શુક્રવારે ₹22-23 કરોડનું નેટ કલેક્શન કર્યું. અગાઉ વિકી કૌશલની ફિલ્મ ‘છાવા’એ ત્રીજા શુક્રવારે ₹13.30 કરોડની કમાણી કરી હતી. આ ઉપરાંત, હિન્દી સિનેમામાં ₹500 કરોડ ક્લબમાં પહોંચવાના મામલે પણ ‘ધુરંધર’એ રણબીર કપૂરની ‘એનિમલ’ ને પાછળ છોડી દીધી છે. ‘એનિમલ’ને આ ક્લબમાં સામેલ થવામાં 16 દિવસ લાગ્યા હતા, જ્યારે ‘ધુરંધર’એ આ કારનામું તે પહેલાં જ કરી બતાવ્યું.

‘અવતાર’ની દુનિયા પણ પડી ફિક્કી

જેમ્સ કેમરૂનની ‘અવતાર’ ફ્રેન્ચાઇઝી વિશ્વની સૌથી મોટી ફિલ્મ શ્રેણીઓમાંની એક છે. 2009માં આવેલી ‘અવતાર’ અને 2022માં રિલીઝ થયેલી ‘અવતાર 2’ એ વિશ્વભરમાં ધૂમ મચાવી હતી. ‘અવતાર 2’એ ભારતમાં ₹40 કરોડની ઓપનિંગ કરી હતી. જોકે, ‘અવતાર 3: ફાયર એન્ડ એશ’ ને ભારતમાં માત્ર ₹20 કરોડની આસપાસની ઓપનિંગ મળી છે, જે અગાઉની ફિલ્મની સરખામણીએ અડધી ગણાય છે.

‘ધુરંધર’ની વાર્તા શું છે?

આદિત્ય ધરના નિર્દેશનમાં બનેલી ‘ધુરંધર’ ફિલ્મ હમઝા નામના એક ભારતીય જાસૂસ એજન્ટની વાર્તા રજૂ કરે છે. હમઝા રહેમાન ડકૈતની ગેંગમાં ઘૂસણખોરી કરવા પાકિસ્તાન પહોંચે છે, જ્યાંથી રાષ્ટ્રવિરોધી ષડયંત્રોને નિષ્ફળ બનાવે છે. ફિલ્મની કહાની 2001ના સંસદ ભવન હુમલા અને 26/11 મુંબઈ આતંકી હુમલા જેવી વાસ્તવિક ઘટનાઓથી પ્રેરિત છે.

બોક્સ ઓફિસ પર સતત મજબૂત પકડ સાથે ‘ધુરંધર’ હવે નવા રેકોર્ડ સર્જવાની દિશામાં આગળ વધી રહી છે, અને રણવીર સિંહના કરિયરમાં આ ફિલ્મ એક ઐતિહાસિક માઈલસ્ટોન સાબિત થતી નજરે પડે છે.