24 કલાકમાં ₹140 કરોડની કમાણી! બિઝનેસના મેદાનમાં વિરાટ કોહલીની ધમાકેદાર સિક્સર

તાજેતરમાં ક્રિકેટના મેદાન પરથી નિવૃત્તિની જાહેરાત કરનાર વિરાટ કોહલીએ હવે બિઝનેસની દુનિયામાં પણ પોતાની તાકાતનો પરિચય આપી દીધો છે. તેની નવી સ્પોર્ટ્સ ફૂટવેર બ્રાન્ડ ‘One8’ લોન્ચ થતાં જ બજારમાં જબરદસ્ત પ્રતિસાદ મળ્યો છે. અહેવાલો મુજબ, લોન્ચિંગના માત્ર 24 કલાકમાં જ 1.5 લાખથી વધુ શૂઝ વેચાઈ ગયા, જેના આધારે અંદાજે ₹140 કરોડનો બિઝનેસ થયો હોવાનું માનવામાં આવી રહ્યું છે.

માત્ર 24 કલાકમાં ₹140 કરોડનો બિઝનેસ

‘One8’ બ્રાન્ડના શૂઝની શરૂઆતી કિંમત ₹9,230 રાખવામાં આવી છે. જો આ કિંમતના આધારે ગણતરી કરવામાં આવે તો 1.5 લાખ જોડી શૂઝના વેચાણથી કુલ આશરે ₹138.45 કરોડની આવક થાય છે, એટલે કે અંદાજે ₹140 કરોડનો બિઝનેસ માત્ર એક જ દિવસમાં નોંધાયો છે.

રસપ્રદ વાત એ છે કે ₹9,230ની કિંમત વિરાટ કોહલીના ટેસ્ટ ક્રિકેટમાં બનાવેલા કુલ 9,230 રનને ધ્યાનમાં રાખીને નક્કી કરવામાં આવી હોવાનું જણાવવામાં આવી રહ્યું છે. આ અનોખી માર્કેટિંગ સ્ટ્રેટેજીને સોશિયલ મીડિયા પર પણ ભારે પ્રશંસા મળી રહી છે.

સોશિયલ મીડિયા પર ‘One8’નો જબરદસ્ત ક્રેઝ

બ્રાન્ડ લોન્ચ થતાં જ સોશિયલ મીડિયા પર #One8 અને વિરાટ કોહલી ટ્રેન્ડ થવા લાગ્યા. સ્ટોર્સની બહાર ચાહકોની લાંબી કતારો જોવા મળી હતી, જ્યારે ઓનલાઈન પ્લેટફોર્મ પર પણ ઘણા મોડલ્સ ઝડપથી સોલ્ડ આઉટ થયા હોવાના દાવા કરવામાં આવી રહ્યા છે.

વિરાટના ચાહકો માટે આ માત્ર એક શૂઝ નહીં પરંતુ તેમના મનપસંદ ક્રિકેટરની નવી ઓળખ તરીકે પણ જોવામાં આવી રહ્યું છે.

વિરાટ હવે માત્ર ક્રિકેટર નહીં, એક વૈશ્વિક બ્રાન્ડ

વિરાટ કોહલી છેલ્લા ઘણા વર્ષોથી વિશ્વના સૌથી મોટા સ્પોર્ટ્સ બ્રાન્ડ્સ માટે સૌથી વિશ્વસનીય ચહેરા તરીકે ઓળખાય છે. તેની ફિટનેસ, લોકપ્રિયતા અને વૈશ્વિક ફેન ફોલોઇંગને કારણે અનેક આંતરરાષ્ટ્રીય કંપનીઓ તેને બ્રાન્ડ એમ્બેસેડર બનાવવા માટે કરોડો રૂપિયાના કરારો કરે છે.

વર્ષ 2017માં વિરાટે જર્મનની સ્પોર્ટ્સવેર કંપની Puma સાથે આશરે ₹110 કરોડની મોટી ભાગીદારી કરી હતી. આ કરાર હેઠળ માત્ર બ્રાન્ડ પ્રમોશન જ નહીં પરંતુ ‘Puma One8’ નામથી કપડાં અને શૂઝની સંપૂર્ણ રેન્જ પણ લોન્ચ કરવામાં આવી હતી, જેને બજારમાં જબરદસ્ત સફળતા મળી હતી.

₹300 કરોડની ઓફર પણ ઠુકરાવી

અહેવાલો અનુસાર, કરાર પૂર્ણ થયા બાદ Pumaએ વિરાટ કોહલીને લગભગ ₹300 કરોડની નવી ઓફર આપી હતી. જોકે વિરાટે આ ઓફર સ્વીકારી નહીં અને પોતાની સ્વતંત્ર બ્રાન્ડ ઉભી કરવાનો નિર્ણય લીધો.

હવે વિરાટ પોતાની નવી ‘One8’ બ્રાન્ડને વૈશ્વિક સ્તરે સ્થાપિત કરવા પર ધ્યાન કેન્દ્રિત કરી રહ્યો છે. મીડિયા અહેવાલો અનુસાર, આ નવા પ્રોજેક્ટમાં Pumaના પૂર્વ મેનેજિંગ ડિરેક્ટર પણ તેની સાથે જોડાયેલા છે.

ભારતની સૌથી મૂલ્યવાન સેલિબ્રિટી

વિરાટ કોહલી માત્ર ક્રિકેટમાં જ નહીં પરંતુ બ્રાન્ડ વેલ્યુમાં પણ દેશના ટોચના સેલિબ્રિટી છે. ફોર્ચ્યુન ઈન્ડિયા અને ઇન્ટરબ્રાન્ડના અભ્યાસ અનુસાર વિરાટની બ્રાન્ડ વેલ્યુ આશરે ₹3,542 કરોડ છે, જે તેમને ભારતની સૌથી મૂલ્યવાન સેલિબ્રિટી બનાવે છે.

આ યાદીમાં બીજા ક્રમે શાહરુખ ખાન અને ત્રીજા ક્રમે પ્રિયંકા ચોપરા જોનાસ છે. ટોપ-10માં ત્રણ ક્રિકેટર અને સાત ફિલ્મી સેલિબ્રિટીઓનો સમાવેશ થાય છે.

ભારતની ટોપ-10 વેલ્યુએબલ સેલિબ્રિટી

ક્રમ	સેલિબ્રિટી	વ્યવસાય
1	વિરાટ કોહલી	ક્રિકેટર
2	શાહરુખ ખાન	અભિનેતા
3	પ્રિયંકા ચોપરા	અભિનેત્રી
4	મહેન્દ્ર સિંહ ધોની	ક્રિકેટર
5	રણવીર સિંહ	અભિનેતા
6	અક્ષય કુમાર	અભિનેતા
7	અમિતાભ બચ્ચન	અભિનેતા
8	સચિન તેંડુલકર	ક્રિકેટર
9	આલિયા ભટ્ટ	અભિનેત્રી
10	અલ્લુ અર્જુન	અભિનેતા

બ્રાન્ડ વેલ્યુ કેવી રીતે નક્કી થાય છે?

બ્રાન્ડ વેલ્યુ નક્કી કરતી વખતે માત્ર કમાણી કે સોશિયલ મીડિયા ફોલોઅર્સને જ ધ્યાનમાં લેવામાં આવતા નથી. તેમાં લોકપ્રિયતા, વિશ્વાસ, બ્રાન્ડ સાથેનું જોડાણ, જવાબદારી, માર્કેટ ઇમ્પેક્ટ અને ગ્રાહકો સાથેની ભાવનાત્મક કનેક્ટિવિટી જેવા અનેક પરિબળોનો પણ સમાવેશ થાય છે.

ક્રિકેટ બાદ બિઝનેસમાં પણ વિરાટની જીત

ક્રિકેટના મેદાન પર અનેક રેકોર્ડ પોતાના નામે કરનાર વિરાટ કોહલી હવે બિઝનેસની દુનિયામાં પણ નવી ઇનિંગ્સ રમતો જોવા મળી રહ્યો છે. ‘One8’ બ્રાન્ડને મળેલા પ્રારંભિક પ્રતિસાદે સ્પષ્ટ કરી દીધું છે કે વિરાટનું નામ માત્ર ક્રિકેટ સુધી સીમિત નથી, પરંતુ તે હવે એક શક્તિશાળી વૈશ્વિક બ્રાન્ડ તરીકે પણ ઉભરી રહ્યું છે. જો આગામી સમયમાં પણ વેચાણનો આ જ ટ્રેન્ડ ચાલુ રહેશે તો ‘One8’ ભારતીય સ્પોર્ટ્સવેર માર્કેટમાં મોટું સ્થાન મેળવી શકે છે.