2026 સુધી AI-પાવર્ડ ડ્રોન અને મિસાઈલ બનાવશે અદાણી ગ્રુપ, ડિફેન્સમાં ₹1.8 લાખ કરોડનું ઇન્વેસ્ટમેન્ટ

અદાણી ગ્રુપે આવતા વર્ષે ડિફેન્સ મેન્યુફેક્ચરિંગ સેક્ટરમાં ₹1.8 લાખ કરોડનું રોકાણ કરવાની યોજના જાહેર કરી છે. આ રોકાણ દ્વારા કંપની માનવરહિત (Unmanned) અને ઓટોનોમસ સિસ્ટમ્સ, તેમજ એડવાન્સ્ડ ગાઈડેડ વેપન્સના વિકાસ પર ખાસ ધ્યાન આપશે, જેથી ભવિષ્યની લડાઈની જરૂરિયાતોને અનુરૂપ પ્રોડક્ટ્સ તૈયાર કરી શકાય.

PTIના રિપોર્ટ અનુસાર, 2025માં થયેલા ‘ઓપરેશન સિંદૂર’ જેવા મિશન્સમાં અદાણીના મિલિટરી હાર્ડવેરનો પહેલેથી જ ઉપયોગ થઈ ચૂક્યો છે. હવે અદાણી ડિફેન્સ એન્ડ એયરોસ્પેસ AI-ઇનેબલ્ડ મલ્ટી-ડોમેન ઓપરેશન્સ, સેન્સર્સ અને ઇલેક્ટ્રોનિક્સ, તેમજ મોટા પાયે MRO (મેન્ટેનન્સ, રિપેર અને ઓવરહોલ) તથા ટ્રેનિંગ ઇન્ફ્રાસ્ટ્રક્ચરમાં રોકાણ વધારશે.

ત્રણેય સેનાઓમાં અદાણીના હથિયારોની હાજરી

અદાણી ડિફેન્સ આજે દેશના સૌથી મોટા ઇન્ટિગ્રેટેડ પ્રાઇવેટ સેક્ટર ડિફેન્સ પ્લેયર્સમાં સામેલ થઈ ગયું છે. 2025માં કંપનીના અનેક સૈન્ય સાધનો ‘ઓપરેશન સિંદૂર’માં ઉપયોગમાં લેવામાં આવ્યા હતા.

• નૌકાદળ અને સેનામાં ડ્રોન: 2025માં કંપનીના દ્રષ્ટિ-10 UAVs લાંબા અંતરના ઇન્ટેલિજન્સ, સર્વેલન્સ અને રિકોનિસન્સ (ISR) મિશન્સ માટે ભારતીય નૌકાદળ અને સેનામાં સામેલ થયા.
• કાઉન્ટર-ડ્રોન સિસ્ટમ: અદાણીની કાઉન્ટર-ડ્રોન સિસ્ટમએ સેના, નૌકાદળ અને વાયુસેના દ્વારા કરવામાં આવેલા તમામ ટ્રાયલ્સ સફળતાપૂર્વક પાર કર્યા છે.
• ગાઈડેડ વેપન્સ: કંપનીના અગ્નિકા લોઇટરિંગ મ્યુનિશન્સએ ઇલેક્ટ્રોનિક વોરફેરમાં પોતાની ક્ષમતા સાબિત કરી છે. ઉપરાંત, ખભા પરથી ફાયર થતી ARKA MANPADS મિસાઈલ સિસ્ટમ પણ ત્રણેય સેનાઓ માટે તૈયાર કરી લેવામાં આવી છે.
• DRDO સાથે ભાગીદારી: ફેબ્રુઆરીમાં અદાણી ડિફેન્સ એન્ડ એયરોસ્પેસે DRDO સાથે મળીને વિકસાવેલી વ્હીકલ-માઉન્ટેડ કાઉન્ટર-ડ્રોન સિસ્ટમ અનવીલ કરી હતી.

ઓટોનોમસ સિસ્ટમ્સ શું છે?

ઓટોનોમસ સિસ્ટમ્સ એવી ટેક્નોલોજી છે જે હવા, પાણી અને જમીન પર માણસ વગર કામ કરી શકે છે. સેન્સર્સ, સોફ્ટવેર અને સુરક્ષિત નેટવર્ક દ્વારા આ સિસ્ટમ્સ ઓછી માનવીય મદદથી કાર્ય કરે છે, જેના કારણે સૈનિકોની સુરક્ષા વધે છે.

• હવામાં: ડ્રોન જાસૂસી, દેખરેખ, મેસેજ ડિલિવરી અને સચોટ હુમલામાં મદદ કરે છે અને લાંબા સમય સુધી ઉડી શકે છે.
• પાણીમાં: ક્રૂ વગરના જહાજો દેખરેખ, પાણીની અંદરની લડાઈ અને માઈન ક્લિયરન્સમાં ઉપયોગી છે.
• જમીન પર: ઓટોનોમસ વાહનો સામાન પહોંચાડવા, જાસૂસી, બોમ્બ નિષ્ક્રિય કરવું અને સરહદ સુરક્ષામાં મદદ કરે છે.

પ્રાઈવેટ ડિફેન્સમાં 25% હિસ્સેદારીનું લક્ષ્ય

2026 સુધી અદાણી ગ્રુપ હવા, પાણી અને જમીન પર ડ્રોન ક્ષમતાઓમાં વધારો કરશે. સચોટ હુમલાની શક્તિ વધારવાની સાથે સર્વિસ અને ટ્રેનિંગ સેન્ટર્સ વિકસાવાશે. AI આધારિત મલ્ટી-ડોમેન સિસ્ટમ્સને વધુ મજબૂત બનાવવાની યોજના છે, જે ભારતના ડિફેન્સ રોડમૅપ સાથે સુસંગત છે.

રિપોર્ટ્સ મુજબ, આ વિશાળ રોકાણથી ડિફેન્સ સેક્ટરને નવી તાકાત મળશે અને મોટા પ્રમાણમાં રોજગાર સર્જન થશે. અદાણી ગ્રુપનું લક્ષ્ય પ્રાઈવેટ ડિફેન્સ સેક્ટરમાં 25% હિસ્સેદારી મેળવવાનું છે.