ઝાકિર ખાને લાંબા બ્રેકની જાહેરાત: ‘હેલ્થ માટે વિરામ જરૂરી, 2029-30માં ફરી મળીશું’

સ્ટેન્ડ-અપ કોમેડિયન ઝાકિર ખાને પોતાના સ્ટેજ શોથી લાંબા વિરામ લેવાની સત્તાવાર જાહેરાત કરી છે. હાલમાં તે પોતાના સ્ટેન્ડ-અપ સ્પેશિયલ ‘પાપા યાર’ સાથે દેશભરમાં ટૂર કરી રહ્યો છે. આ ટૂર દરમિયાન હૈદરાબાદના શોમાં સ્ટેજ પરથી ઝાકિરે જણાવ્યું કે, હવે તે લાંબા બ્રેક પર જઈ રહ્યો છે અને હૈદરાબાદમાં યોજાયેલો આ શો તેનો છેલ્લો સ્ટેજ શો હોઈ શકે છે.

ઝાકિરે કહ્યું કે, તે 2028-29 અથવા 2030માં ફરી સ્ટેજ પર પરત ફરી શકે છે. તેણે સ્પષ્ટ કર્યું કે આ બ્રેક તેણે પોતાના સ્વાસ્થ્ય અને અંગત કારણોને ધ્યાનમાં રાખીને લીધો છે.

‘દરેક દર્શક મારા દિલની નજીક’

સ્ટેજ પરથી ભાવુક બની ઝાકિરે દર્શકોનો આભાર વ્યક્ત કર્યો. તેણે કહ્યું કે, ત્યાં હાજર દરેક વ્યક્તિ તેના દિલની ખૂબ નજીક છે અને તેને મળેલો પ્રેમ તે હંમેશા યાદ રાખશે.

સોશિયલ મીડિયા પર પણ ઈશારો

વાયરલ વીડિયોની વચ્ચે ઝાકિરે મંગળવારે પોતાની ઇન્સ્ટાગ્રામ સ્ટોરી શેર કરી હતી. દુબઈ પહોંચ્યા પછી પોસ્ટ કરેલી આ સ્ટોરીમાં તેણે લખ્યું હતું, “20 જૂન સુધીના દરેક શો એક સેલિબ્રેશન જેવા હશે.” સાથે જ તેણે કહ્યું કે, આ વખતે તે ઘણા શહેરોમાં જઈ શકશે નહીં, તેથી દર્શકો થોડો વધુ પ્રયાસ કરીને શોમાં જરૂર આવે.

સપ્ટેમ્બરમાં આપેલો હેલ્થ અપડેટ

ગયા વર્ષે સપ્ટેમ્બરમાં પણ ઝાકિરે પોતાના સ્વાસ્થ્ય અંગે ખુલાસો કર્યો હતો. તેણે કહ્યું હતું કે, તે એક વર્ષથી વધુ સમયથી સારું અનુભવી રહ્યો ન હતો, છતાં સતત કામ કરતો રહ્યો. છેલ્લા દસ વર્ષથી તે સતત ટૂર કરી રહ્યો છે અને ઘણીવાર દિવસમાં બે થી ત્રણ શો કરવાના થતા હતા. ઊંઘનો અભાવ, અનિયમિત ભોજન અને સતત મુસાફરીથી તેની તબિયત પર ખરાબ અસર પડી હતી.

તેણે લખ્યું હતું કે, “દરેકને ખુશ કરવાની કોશિશ, સતત શો, ઊંઘની કમી અને અસ્તવ્યસ્ત જીવનશૈલીએ મને નબળો બનાવી દીધો.”

‘મોડું થાય તે પહેલાં રોકાઈ જવું સારું’

ઝાકિરે જણાવ્યું હતું કે, તેને સ્ટેજ પર રહેવું ખૂબ ગમે છે, પરંતુ હવે સમયસર બ્રેક લેવો જરૂરી બની ગયો છે. તે એક વર્ષથી આ વાત અવગણતો રહ્યો હતો, પરંતુ હવે તેને લાગ્યું કે મોડું થાય તે પહેલાં રોકાઈ જવું વધુ સારું છે.

આ જ કારણોસર આ વખતે ભારતનો ટૂર અમુક શહેરો સુધી જ સીમિત રાખવામાં આવ્યો છે અને વધુ શો ઉમેરવામાં આવશે નહીં. ‘પાપા યાર’ સ્પેશિયલના રેકોર્ડિંગ બાદ ઝાકિર લાંબા બ્રેક પર જશે.

ઝાકિર ખાને લીધેલો આ નિર્ણય ચાહકો માટે ભાવુક છે, પરંતુ તેમના સ્વાસ્થ્ય માટે જરૂરી ગણાઈ રહ્યો છે. હવે ચાહકો 2028-30માં તેમના ધમાકેદાર કમબેકની રાહ જોશે.