ટ્રમ્પે યુરોપિયન દેશો પર ટેરિફની ધમકી પાછી ખેંચી, ગ્રીનલેન્ડ-આર્કટિક માટે NATO સાથે ફ્રેમવર્ક નક્કી

અમેરિકાના રાષ્ટ્રપતિ ડોનાલ્ડ ટ્રમ્પે બુધવારે જણાવ્યું કે તેઓ હવે 8 યુરોપિયન દેશો પર 10% ટેરિફ લાગુ નહીં કરશે. આ ટેરિફ 1 ફેબ્રુઆરીથી લાગુ થવાનો હતો. ટ્રમ્પે આ નિર્ણય દાવોસમાં NATO સેક્રેટરી જનરલ માર્ક રૂટે સાથે ગ્રીનલેન્ડ અને આર્કટિક વિસ્તાર પર વાતચીત કર્યા બાદ લીધો.

ટ્રમ્પે જણાવ્યું કે બંને નેતાઓએ ગ્રીનલેન્ડ અને સમગ્ર આર્કટિક ક્ષેત્રને લઈને ભવિષ્યના વેપાર અને સુરક્ષા સોદાનું ફ્રેમવર્ક નક્કી કર્યું છે, જેનાથી અમેરિકા અને NATO સભ્યોને લાભ થશે. ટ્રમ્પે પોતાના સોશિયલ મિડિયા પેજ ટ્રુથ પર લખ્યું, “આ સમજૂતીના આધારે હું ટેરિફ નહીં લગાવું.” ટ્રમ્પ અગાઉ યુરોપિયન દેશોને ખોટા અભિગમના કારણે 10% ટેરિફની ધમકી આપી ચૂક્યા હતા.

ગ્રીનલેન્ડ-આર્કટિક ડીલનું ફ્રેમવર્ક
ટ્રમ્પ અને NATO વચ્ચે થયેલી ગ્રીનલેન્ડ ફ્રેમવર્ક હેઠળ અનેક મુદ્દાઓ પર સહમતિ સર્જાઈ છે. તેમાં ગ્રીનલેન્ડ અને સમગ્ર આર્કટિક વિસ્તારની સુરક્ષા અંગે NATO અને અમેરિકા દ્વારા સહયોગ કરવામાં આવશે. ડેઇલી મેલના અહેવાલ પ્રમાણે, અમેરિકાને ગ્રીનલેન્ડમાં કેટલાક મર્યાદિત વિસ્તારોમાં સૈન્ય ઠેકાણાં સ્થાપવાની મંજૂરી મળશે.

આ ઠેકાણાઓ જમીન, સમુદ્ર અને હવા ત્રણે મોરચાની દેખરેખ અને રક્ષણ માટે ઉપયોગ કરવામાં આવશે. NATO સાથે મળીને, અમેરિકા પોતાના ‘ગોલ્ડન ડોમ’ મિસાઈલ ડિફેન્સ પ્રોજેક્ટમાં પણ સહયોગ કરશે. ગ્રીનલેન્ડના ખનિજ સંસાધનો પર અમેરિકા સાથે ભાગીદારી કરવામાં આવશે, અને રશિયા અને ચીનને આ ક્ષેત્રમાં આર્થિક કે સૈન્ય પકડ બનાવતાં રોકવામાં આવશે.

ગોલ્ડન ડોમ પ્રોજેક્ટ અને સુરક્ષા
ટ્રમ્પે જણાવ્યું કે ગોલ્ડન ડોમ પ્રોજેક્ટ અંગે ચર્ચાઓ ચાલુ છે અને વધુ માહિતી ઉપલબ્ધ થતા રજૂ કરવામાં આવશે. ઉપરાષ્ટ્રપતિ, વિદેશ સચિવ અને વિશેષ દૂત સહીત જવાબદાર અધિકારીઓ સીધા ટ્રમ્પને રિપોર્ટ કરશે. ગોલ્ડન ડોમ અમેરિકાનો મિસાઈલ ડિફેન્સ પ્રોજેક્ટ છે, જે ઇઝરાઇલના આયર્ન ડોમથી પ્રેરિત છે. આ પ્રોજેક્ટનો હેતુ ચીન, રશિયા જેવા જોખમોથી અમેરિકા અને NATOને સુરક્ષિત રાખવાનો છે. ટ્રમ્પે ગ્રીનલેન્ડને ગોલ્ડન ડોમ માટે મહત્વપૂર્ણ ગણાવી ચૂક્યા છે.

જૂનથી 25% ટેરિફની ધમકી
17 જાન્યુઆરીએ ટ્રમ્પે 8 યુરોપિયન દેશો – ડેનમાર્ક, નોર્વે, સ્વીડન, ફ્રાંસ, જર્મની, યુનાઇટેડ કિંગડમ, નેધરલેન્ડ અને ફિનલેન્ડ – પર 10% ટેરિફ લાગુ કરવાની જાહેરાત કરી હતી. તેમણે ચેતવણી આપી હતી કે જો ગ્રીનલેન્ડને લઈને કોઈ સમજૂતી નહીં થાય, તો 1 જૂનથી આ ટેરિફ વધારીને 25% કરી દેવામાં આવશે. યુરોપિયન યુનિયન દ્વારા પણ આ નિર્ણય પર આર્થિક પ્રતિસાદ વિશે ચર્ચા શરૂ કરવામાં આવી હતી.

ટ્રમ્પનું આ તાજેતરનું પગલું અમેરિકા-યુરોપ સંબંધોને સુધારવા અને NATO સાથે સહયોગ મજબૂત બનાવવાની દિશામાં મહત્વપૂર્ણ ગણાય છે.