ટોલ ન ચૂકવ્યો તો ગાડી વેચી નહીં શકો: NOC, ફિટનેસ અને નેશનલ પરમિટ પર લાગશે રોક

સરકારે મંગળવારે નેશનલ હાઈવે પર ટોલ વસૂલાતને વધુ કડક બનાવતાં નવા નિયમો જાહેર કર્યા છે. હવે જો કોઈ વાહન પર ટોલ બાકી રહેશે, તો તેને NOC, ફિટનેસ સર્ટિફિકેટ અને નેશનલ પરમિટ જેવી મહત્વપૂર્ણ સેવાઓ નહીં મળે. આ ફેરફારો સેન્ટ્રલ મોટર વ્હીકલ્સ રૂલ્સ, 2026 હેઠળ અમલમાં લાવવામાં આવ્યા છે. સરકારનું મુખ્ય લક્ષ્ય ઇલેક્ટ્રોનિક ટોલ કલેક્શન (ETC) સિસ્ટમને મજબૂત બનાવવું અને ટોલ ચોરી રોકવાનું છે.

ટોલ બાકી રહેશે તો કઈ સેવાઓ બંધ થશે?

નવા નિયમો મુજબ, જો વાહન પર કોઈ ટોલ બાકી રહેશે તો નીચેની સેવાઓ અટકાવી દેવામાં આવશે:

• NOC (No Objection Certificate): વાહન વેચવા કે અન્ય રાજ્યમાં ટ્રાન્સફર કરવા માટે ટોલ ક્લિયરન્સ વિના NOC નહીં મળે.
• ફિટનેસ સર્ટિફિકેટ: કોમર્શિયલ અને અન્ય વાહનો માટે ફિટનેસ સર્ટિફિકેટનું રિન્યુઅલ કે નવું સર્ટિફિકેટ ટોલ ચુકવણી સુધી રોકાઈ જશે.
• નેશનલ પરમિટ: ટ્રક અને બસ જેવા વાહનોને પરમિટ જારી કરતા પહેલાં ટોલ બાકી નથી તેની તપાસ થશે.

કેવી રીતે જોડાશે ટોલ બાકી ગાડીના રેકોર્ડ સાથે?

આ સમગ્ર પ્રક્રિયા સંપૂર્ણપણે ડિજિટલ અને ઓટોમેટેડ હશે:

1. ટોલ પ્લાઝા પર સ્કેનિંગ: RFID રીડર ફાસ્ટેગ સ્કેન કરશે. બેલેન્સ ઓછું હોય અથવા ફાસ્ટેગ બ્લેકલિસ્ટ હોય તો વાહનનો રજીસ્ટ્રેશન નંબર નોંધાઈ જશે. MLFF સિસ્ટમમાં કેમેરા સીધા નંબર પ્લેટ કૅપ્ચર કરશે.
2. NPCI અને બેંકને સૂચના: ટોલ પ્લાઝાનો સર્વર NETC મારફતે NPCI સુધી માહિતી મોકલશે.
3. વાહન પોર્ટલ સાથે સિંક: NPCI ડેટા મંત્રાલયના ‘વાહન’ પોર્ટલ સાથે શેર કરશે અને બાકી ટોલ રકમ ગાડીના ડિજિટલ રેકોર્ડમાં ઉમેરાઈ જશે.

‘અનપેડ ટોલ યુઝર’ની નવી વ્યાખ્યા

સરકારએ ‘અનપેડ ટોલ યુઝર’ની પણ નવી વ્યાખ્યા નક્કી કરી છે. જો વાહનની અવરજવર ETC સિસ્ટમમાં નોંધાઈ છે પરંતુ ચુકવણી થઈ નથી, તો તે રકમ બાકી ગણાશે. એટલે કે ફાસ્ટેગમાં બેલેન્સ ઓછું હોવા છતાં જો વાહન ટોલ પાર કરી ગયું હોય, તો તે રકમ સીધી વાહનના રેકોર્ડમાં જોડાશે.

બેરિયર વિના ટોલ વસૂલાતની તૈયારી

આ નિયમો ભવિષ્યમાં અમલમાં આવનારી મલ્ટી-લેન ફ્રી ફ્લો (MLFF) સિસ્ટમ માટે અત્યંત મહત્વપૂર્ણ છે. આ સિસ્ટમમાં ટોલ પ્લાઝા કે બેરિયર નહીં હોય. કેમેરા અને સેન્સર આપમેળે ટોલ વસૂલશે. પરિણામે લાંબી કતારો ઘટશે, સમય અને ઇંધણની બચત થશે.

ફોર્મ 28માં મોટો ફેરફાર

NOC માટે ઉપયોગમાં લેવાતા ફોર્મ 28માં પણ ફેરફાર કરવામાં આવ્યો છે. હવે વાહન માલિકે ઘોષણા કરવી પડશે કે તેની ગાડી પર કોઈ ટોલ બાકી નથી. આ ફોર્મના કેટલાક ભાગ હવે ઓનલાઈન પોર્ટલ દ્વારા ડિજિટલ રીતે પણ ભરી શકાશે.

વાહન માલિકો માટે મહત્વની સૂચના

સરકારના આ નિર્ણયથી હવે વાહન માલિકોને ટોલ ચૂકવવામાં બેદરકારી રાખવી મોંઘી પડી શકે છે. સમયસર ટોલ ચુકવણી કરવી હવે માત્ર કાયદેસર ફરજ જ નહીં, પરંતુ વાહનના દસ્તાવેજો મેળવવા માટે પણ અનિવાર્ય બની ગઈ છે.