નિરમા-ટાઈડના કોડવર્ડથી ‘મ્યાઉં મ્યાઉં’ ડ્રગ્સનો ધંધો: નવા વર્ષની ઉજવણી વચ્ચે સુરત SOGની મોટી કાર્યવાહી, 7 લાખના MD સાથે પેડલર ઝડપાયો

જ્યારે આખું સુરત શહેર વર્ષ 2026ના આગમનની ઉજવણીમાં મગ્ન હતું, ત્યારે સુરત SOGની ટીમે નશાના કાળા કારોબાર પર મોટો પ્રહાર કર્યો છે. અમરોલીના છાપરાભાઠા વિસ્તારમાંથી પોલીસે 21 વર્ષીય જીલ ભૂપતભાઇ ઠુંમર નામના યુવકને ઝડપી લીધો છે. તેની પાસેથી 236 ગ્રામથી વધુ હાઈ પ્યુરિટી ‘મ્યાઉં મ્યાઉં’ તરીકે ઓળખાતું મેફેડ્રોન (MD) ક્રિસ્ટલ ડ્રગ્સ જપ્ત કરવામાં આવ્યું છે, જેની બજાર કિંમત અંદાજે રૂ. 7 લાખથી વધુ થાય છે.

પોલીસ તપાસમાં સામે આવ્યું છે કે જીલ ઠુંમર પોતાના ‘આકા’ના ઇશારે કમિશનની લાલચે આ ડ્રગ્સની ડિલિવરી કરવા માટે નીકળ્યો હતો. નવા વર્ષની પાર્ટીઓમાં આ નશીલા પદાર્થની સપ્લાય થાય એ પહેલાં જ સુરત SOGએ બાતમીના આધારે વોચ ગોઠવી આરોપીને દબોચી લીધો હતો. હાલ આ સમગ્ર ડ્રગ્સ રેકેટના મૂળ સુધી પહોંચવા માટે વધુ તપાસ ચાલી રહી છે.

નિરમા-ટાઈડના નામે વેચાતું હતું મોતનું પડીકું

બાતમીના આધારે SOGએ અમરોલીના છાપરાભાઠા રોડ પર ગણેશનગર રો-હાઉસ નજીક વોચ ગોઠવી હતી. આ દરમિયાન શંકાસ્પદ હાલતમાં ફરતા જીલ ઠુંમરને અટકાવી તપાસ કરતા મોટી માત્રામાં નશીલા પદાર્થનો જથ્થો મળી આવ્યો. પોલીસ પણ આ જોઈને ચોંકી ગઈ હતી.

આરોપી મેફેડ્રોન ડ્રગ્સ માટે ‘NIRMA’, ‘TIDE’, ‘OG’ અને ‘દવા’ જેવા કોડવર્ડ વાપરતો હતો. જો કોઈ ગ્રાહક મેસેજમાં ‘નિરમા’ અથવા ‘ટાઈડ’ માંગે તો તેનો અર્થ હાઈ પ્યુરિટી ક્રિસ્ટલ MD ડ્રગ્સ થતો હતો. સામાન્ય માણસને કપડાં ધોવાના પાવડરની વાત લાગતી, પરંતુ અંદરખાને મોતનો સામાન વેચાતો હતો.

236 ગ્રામ MD ડ્રગ્સ સહિત રૂ.7.55 લાખનો મુદ્દામાલ જપ્ત

પોલીસે જીલ ઠુંમરની તલાશી લેતા તેની પાસેથી 236.780 ગ્રામ હાઈ પ્યુરિટી ક્રિસ્ટલ મેફેડ્રોન (MD) ડ્રગ્સ મળ્યું. આ જથ્થાની કિંમત આશરે રૂ. 7,10,340 આંકવામાં આવી છે. આ સાથે રૂ.45,000 કિંમતનો મોબાઈલ ફોન મળી કુલ રૂ. 7,55,340નો મુદ્દામાલ જપ્ત કરવામાં આવ્યો છે. આ ડ્રગ્સ નશાના બજારમાં ખૂબ ઊંચી માગ ધરાવે છે.

સોશિયલ મીડિયા બન્યું ડ્રગ્સ ડીલિંગનું હબ

તપાસમાં બહાર આવ્યું છે કે જીલ ઠુંમર ગ્રાહકો મેળવવા અને ઓર્ડર લેવા માટે WhatsApp, Instagram અને Snapchat જેવા સોશિયલ મીડિયા પ્લેટફોર્મનો ઉપયોગ કરતો હતો. પોલીસની નજરથી બચવા માટે તે ફોન કોલ્સ ટાળી ઇન્ટરનેટ કોલિંગ અને ચેટિંગ દ્વારા જ ડીલિંગ કરતો હતો. કોડવર્ડ્સના માધ્યમથી તે યુવાધનને નશાની લત તરફ ધકેલી રહ્યો હતો, પરંતુ SOGની ટેક્નિકલ સર્વેલન્સે તેની હાઈટેક ચાલને નિષ્ફળ બનાવી દીધી.

માત્ર પ્યાદું હતો આરોપી, આકા હજુ ફરાર

પૂછપરછમાં સામે આવ્યું છે કે જીલ ઠુંમર મૂળ જૂનાગઢ જિલ્લાના ભેંસાણ તાલુકાના બામણગઢ ગામનો રહેવાસી છે અને સુરતમાં નોકરી કરતો હતો. ઝડપથી પૈસા કમાવવાની લાલચે તે ડ્રગ્સના ધંધામાં ફસાયો હતો. તેણે કબૂલાત કરી છે કે તે માત્ર પ્યાદું હતો. મુખ્ય સૂત્રધાર તરીકે ખુશાલ વલ્લભભાઇ રાણપરીયા અને ભરત ઉર્ફે ભાણો દામજીભાઇ લાઠીયાના નામ સામે આવ્યા છે, જે હાલ પોલીસ પકડથી દૂર છે. બંનેને વોન્ટેડ જાહેર કરવામાં આવ્યા છે.

અન્ય શહેરો સુધી તાર જોડાયેલા હોવાની શંકા

અમરોલી પોલીસ સ્ટેશનમાં NDPS એક્ટની કલમ 8(C), 22(C) અને 29 હેઠળ ગુનો નોંધવામાં આવ્યો છે. પોલીસ હવે તપાસ કરી રહી છે કે આરોપીએ અત્યાર સુધી કેટલા યુવાનોને ‘નિરમા-ટાઈડ’ના કોડવર્ડથી ડ્રગ્સ સપ્લાય કર્યું છે અને આ રેકેટના તાર અન્ય કયા શહેરો સુધી જોડાયેલા છે.

DCPનો ખુલાસો

SOGના DCP રાજદીપસિંહ નકુમે જણાવ્યું હતું કે આ સમગ્ર ડ્રગ્સ રેકેટ Instagram અને Snapchat મારફતે ચલાવવામાં આવતું હતું. કયા સોશિયલ મીડિયા આઈડી દ્વારા આ નેટવર્ક કાર્યરત હતું એ અંગે ઊંડી તપાસ હાથ ધરવામાં આવી છે.

‘મ્યાઉં મ્યાઉં’ યુવાધન માટે ઘાતક

વિશેષજ્ઞો મુજબ મેફેડ્રોન જેવી સસ્તી સિન્થેટિક ડ્રગ્સ પાર્ટીઓમાં ‘મ્યાઉં મ્યાઉં’ અથવા MD નામે લોકપ્રિય બની રહી છે. રિપોર્ટ્સ મુજબ મોટા શહેરોમાં 10માંથી 8 ડ્રગ એડિક્ટ્સ આ પાર્ટી ડ્રગના શિકાર બની રહ્યા છે. અનેક દેશોમાં પ્રતિબંધિત આ ડ્રગ્સ માનસિક વિકાર, હૃદયરોગ અને મૃત્યુનું કારણ પણ બની શકે છે.

નવા વર્ષની ઉજવણી વચ્ચે સુરત SOGની આ કાર્યવાહીથી શહેરમાં નશાના કાળા કારોબાર સામે કડક સંદેશો ગયો છે.