વર્લ્ડ કપમાંથી બહાર થયા પછી ગિલ વિજય હઝારે ટ્રોફીમાં રમશે, પંજાબ ટીમમાં અભિષેક-અર્શદીપ પણ

ભારતની વનડે અને ટેસ્ટ ટીમના કેપ્ટન શુભમન ગિલ હવે ઘરેલુ ક્રિકેટમાં નજર આવશે. પંજાબ ક્રિકેટ એસોસિએશને સોમવારે વિજય હઝારે ટ્રોફી માટે પોતાની 18 સભ્યોની ટીમની જાહેરાત કરી છે, જેમાં શુભમન ગિલ સાથે અભિષેક શર્મા અને અર્શદીપ સિંહ જેવા મોટા નામો પણ સામેલ છે.

પંજાબ પોતાની વિજય હઝારે ટ્રોફીની શરૂઆત 24 ડિસેમ્બરે મહારાષ્ટ્ર સામે કરશે. જોકે, ગિલ, અભિષેક અને અર્શદીપ કેટલી મેચ રમશે તે અંગે હજુ સ્થિતિ સ્પષ્ટ નથી, કારણ કે 11 જાન્યુઆરીથી ભારત-ન્યુઝીલેન્ડ વનડે અને T20 સીરિઝ શરૂ થવાની છે.

ગિલ માટે પોતાને સાબિત કરવાની મોટી તક

શુભમન ગિલની પસંદગી ખાસ મહત્વની માનવામાં આવી રહી છે, કારણ કે તાજેતરમાં તેમને ભારતની આગામી T20 વર્લ્ડ કપ ટીમ અને ન્યુઝીલેન્ડ સામેની T20 સીરિઝમાંથી બહાર રાખવામાં આવ્યા છે. આવી સ્થિતિમાં વિજય હઝારે ટ્રોફી ગિલ માટે પોતાનું ફોર્મ પાછું મેળવવાની, વ્હાઇટ-બોલ ક્રિકેટમાં પોતાની ક્લાસ બતાવવાની અને પસંદગીકારોને પ્રભાવિત કરવાની મોટી તક બની રહેશે.

પંજાબની તમામ મેચ જયપુરમાં

પંજાબ તેની સાતેય લીગ મેચો જયપુરમાં રમશે. ગયા સિઝનમાં ક્વાર્ટર ફાઇનલમાં બહાર થયા હોવા છતાં, આ વખતે પંજાબને ખિતાબ માટે મજબૂત દાવેદાર માનવામાં આવી રહ્યું છે.
બેટિંગમાં શુભમન ગિલ અને અભિષેક શર્મા ઉપરાંત પ્રભસિમરન સિંહ, અનમોલપ્રીત સિંહ, નમન ધીર, રમણદીપ સિંહ, સનવીર સિંહ અને હરપ્રીત બ્રાર ટીમને મજબૂતી આપે છે.

બોલિંગની કમાન અર્શદીપ સિંહ પાસે

બોલિંગ વિભાગની જવાબદારી ફરી એકવાર અર્શદીપ સિંહના ખભા પર રહેશે. તે 2024-25 સીઝનમાં પંજાબનો સૌથી વધુ વિકેટ લેનાર બોલર રહ્યો હતો. તેને ફાસ્ટ બોલર ગુરનૂર બ્રાર અને કૃષ્ણ ભગતનો સાથ મળશે. નવી બોલથી શરૂઆતની વિકેટો લેવી અને ડેથ ઓવર્સમાં સચોટ બોલિંગ અર્શદીપને પંજાબની સૌથી મોટી તાકાત બનાવે છે.

કેપ્ટનનું એલાન બાકી

પંજાબે હજી સુધી પોતાની ટીમના કેપ્ટનનું એલાન કર્યું નથી. ટીમ એક પડકારજનક ગ્રુપમાં છે, જેમાં મુંબઈ, ગોવા, છત્તીસગઢ, ઉત્તરાખંડ, હિમાચલ પ્રદેશ અને સિક્કિમ જેવી ટીમો સામેલ છે. લીગ તબક્કાના મુકાબલા 8 જાન્યુઆરીએ પૂર્ણ થશે.

પંજાબની વિજય હઝારે ટ્રોફી ટીમ

શુભમન ગિલ, અભિષેક શર્મા, અર્શદીપ સિંહ, પ્રભસિમરન સિંહ (વિકેટકીપર), હરનૂર પન્નુ, અનમોલપ્રીત સિંહ, ઉદય સહરાન, નમન ધીર, સલીલ અરોરા (વિકેટકીપર), સનવીર સિંહ, રમણદીપ સિંહ, જસનપ્રીત સિંહ, ગુરનૂર બ્રાર, હરપ્રીત બ્રાર, રઘુ શર્મા, કૃષ્ણ ભગત, ગૌરવ ચૌધરી અને સુખદીપ બાજવા.