વેકેશન બાદ વિદ્યાર્થીઓના કિલ્લોલથી વર્ગખંડો ગુંજ્યાં: કંકુ તિલક-મોઢું મીઠું કરાવી સ્વાગત, ભૂલકાઓ રડ્યાં; ગરમીને લઈ સ્કૂલોમાં વિશેષ વ્યવસ્થા

રાજ્યભરમાં ઉનાળુ વેકેશન પૂર્ણ થતાં સોમવાર, 8 જૂનથી શૈક્ષણિક વર્ષ 2026-27નો વિધિવત પ્રારંભ થયો છે. સરકારી, અર્ધસરકારી અને ખાનગી શાળા-કોલેજોમાં આજે ફરી એકવાર વિદ્યાર્થીઓના આગમન સાથે ચહલપહલ અને ઉત્સાહનો માહોલ જોવા મળ્યો હતો. છેલ્લા બે મહિનાથી સૂમસામ રહેલા વર્ગખંડો વિદ્યાર્થીઓના કિલ્લોલથી ગુંજી ઊઠ્યા હતા.

વહેલી સવારથી જ શાળાઓના ગેટ પર આચાર્યો, શિક્ષકો અને સ્ટાફ વિદ્યાર્થીઓના સ્વાગત માટે હાજર રહ્યા હતા. અનેક શાળાઓમાં વિદ્યાર્થીઓનું કંકુ તિલક કરીને અને મોઢું મીઠું કરાવીને ભવ્ય સ્વાગત કરવામાં આવ્યું હતું. વિદ્યાર્થીઓએ પણ શિક્ષકોને પગે લાગી આશીર્વાદ લીધા હતા. નવા શૈક્ષણિક વર્ષની શરૂઆતને લઈને વિદ્યાર્થીઓમાં ખાસ ઉત્સાહ જોવા મળ્યો હતો.

નવા અને જૂના મિત્રોને મળવાનો આનંદ વિદ્યાર્થીઓના ચહેરા પર સ્પષ્ટ જોવા મળ્યો હતો. લાંબા વેકેશન બાદ મિત્રો અને શિક્ષકો સાથે ફરી મળવાની ખુશી વિદ્યાર્થીઓએ વ્યક્ત કરી હતી. બીજી તરફ, પ્રથમવાર અથવા નીચલા ધોરણોમાં પ્રવેશ લેનારા નાના ભૂલકાઓમાં શાળાનો ડર પણ જોવા મળ્યો હતો. કેટલાક બાળકો વાલીઓથી અલગ થતાં રડવા લાગ્યા હતા, ત્યારે શિક્ષકોએ તેમને પ્રેમથી સંભાળીને વર્ગખંડ સુધી પહોંચાડ્યા હતા.

ગરમી વચ્ચે વિદ્યાર્થીઓની સુરક્ષા માટે ખાસ આયોજન

રાજ્યમાં હાલ ગરમીનો માહોલ યથાવત હોવા છતાં વહીવટી તંત્ર તરફથી વેકેશન લંબાવવાની કોઈ સૂચના આપવામાં આવી ન હોવાથી પૂર્વનિર્ધારિત સમયપત્રક મુજબ જ શાળાઓ શરૂ કરવામાં આવી છે. ગરમીને ધ્યાનમાં રાખીને શાળા સંચાલકો દ્વારા વિદ્યાર્થીઓની સુરક્ષા અને સુવિધા માટે ખાસ વ્યવસ્થાઓ ગોઠવવામાં આવી છે.

દરેક વર્ગખંડમાં પંખા, યોગ્ય વેન્ટિલેશન અને અન્ય મૂળભૂત સુવિધાઓ સુનિશ્ચિત કરવામાં આવી છે. ઉપરાંત વિદ્યાર્થીઓને શુદ્ધ અને ઠંડુ પીવાનું પાણી મળી રહે તે માટે વોટર કુલર સહિતની વિશેષ વ્યવસ્થા પણ ઉભી કરવામાં આવી છે.

રાજકોટમાં કુમકુમ તિલકથી વિદ્યાર્થીઓનું સ્વાગત

રાજકોટની ન્યૂ એરા સ્કૂલ અને વી. જે. મોદી સ્કૂલમાં વિદ્યાર્થીઓનું કુમકુમ તિલક અને ફૂલોથી સ્વાગત કરવામાં આવ્યું હતું. વી. જે. મોદી સ્કૂલમાં પ્રથમ દિવસે પ્રાર્થના અને વૈદિક મંત્રોચ્ચાર સાથે શૈક્ષણિક વર્ષની શરૂઆત કરવામાં આવી હતી, જેના કારણે સમગ્ર કેમ્પસમાં આધ્યાત્મિક અને દિવ્ય વાતાવરણ સર્જાયું હતું.

સ્કૂલના પ્રિન્સિપાલ ડોલી વાજાએ જણાવ્યું હતું કે, ‘શિક્ષા સે સંસ્કાર અભિયાન’ અંતર્ગત વિદ્યાર્થીઓને વેકેશન દરમિયાન મુલાકાત લીધેલા સ્થળોની ભૌગોલિક અને ધાર્મિક વિશેષતાઓ વિશે જાણવાની પ્રેરણા આપવામાં આવી હતી. નવા સત્રના પ્રથમ દિવસે વૈદિક મંત્રોચ્ચાર સાથે બાળકોનું સ્વાગત કરવામાં આવ્યું હતું.

વેકેશનની યાદો સાથે શાળાએ પરત ફર્યા વિદ્યાર્થીઓ

વિદ્યાર્થિની સ્વરા બરાસરાએ જણાવ્યું હતું કે, ઉનાળાના વેકેશનમાં તે પરિવાર સાથે હરિદ્વાર ગઈ હતી અને ખૂબ આનંદ માણ્યો હતો. વિદ્યાર્થી અક્ષ નથવાણીએ જણાવ્યું હતું કે, તે પરિવાર સાથે આણંદ ખાતે માસીના ઘરે ગયો હતો અને હવે નવા શિક્ષકો તથા નવા મિત્રો સાથે મળવાની આતુરતા છે.

વિદ્યાર્થિની ધ્યાના ગોહિલે જણાવ્યું હતું કે, તે મનાલી પ્રવાસે ગઈ હતી જ્યાં તેણે રિવર રાફ્ટિંગ અને ટીમ વર્ક જેવી અનેક બાબતો શીખી હતી. તેણે ભવિષ્યમાં ડોક્ટર અથવા પાયલોટ બનવાની ઈચ્છા વ્યક્ત કરી હતી.

અમદાવાદ અને સુરતમાં પણ ઉત્સાહનો માહોલ

અમદાવાદની સેટેલાઈટ વિસ્તારમાં આવેલી આર. એચ. કાપડિયા સ્કૂલમાં વિદ્યાર્થીઓને તિલક કરીને અને મોઢું મીઠું કરાવીને પ્રવેશ આપવામાં આવ્યો હતો. અનેક વિદ્યાર્થીઓ શાળાના ગેટ બહાર પોતાના મિત્રોની રાહ જોતા જોવા મળ્યા હતા.

સુરતની પ્રેસિડેન્સી સ્કૂલમાં પણ વિદ્યાર્થીઓનું તિલક કરીને સ્વાગત કરવામાં આવ્યું હતું. વિદ્યાર્થીઓએ શિક્ષકોના આશીર્વાદ લીધા હતા અને નવા શૈક્ષણિક વર્ષની શરૂઆત ઉત્સાહપૂર્વક કરી હતી.

વડોદરામાં ત્રણ લાખથી વધુ વિદ્યાર્થીઓએ શરૂ કર્યું નવું સત્ર

વડોદરામાં અંદાજે ત્રણ લાખ જેટલા વિદ્યાર્થીઓએ નવા શૈક્ષણિક વર્ષની શરૂઆત કરી હતી. બ્રાઈટ સ્કૂલ, GSEB યુનિટ હરણીના ડાયરેક્ટર જીરલ શાહે જણાવ્યું હતું કે, ગરમીને ધ્યાનમાં રાખીને વિદ્યાર્થીઓ માટે વિશેષ વ્યવસ્થાઓ કરવામાં આવી છે. નવા અને જૂના વિદ્યાર્થીઓને કોઈપણ પ્રકારની મુશ્કેલી ન પડે તે માટે સુચારુ આયોજન ગોઠવવામાં આવ્યું છે.

વાલીઓની વહેલી સવારની દોડધામ ફરી શરૂ

શાળાઓ શરૂ થતાં જ વાલીઓની વહેલી સવારની દોડધામ પણ ફરી શરૂ થઈ ગઈ છે. બાળકોને તૈયાર કરવાથી લઈને શાળાએ પહોંચાડવાની જવાબદારી વચ્ચે વાલીઓમાં પણ નવા શૈક્ષણિક વર્ષની શરૂઆતનો ઉત્સાહ જોવા મળ્યો હતો.

આમ, રાજ્યભરમાં નવા શૈક્ષણિક વર્ષ 2026-27નો પ્રારંભ ઉત્સાહ, ઉમંગ અને નવી આશાઓ સાથે થયો છે. વિદ્યાર્થીઓ, શિક્ષકો અને વાલીઓ સૌએ શિક્ષણના નવા પ્રવાસની શરૂઆત હર્ષોલ્લાસ સાથે કરી છે.