રશિયાનો યુક્રેન પર તોફાની હુમલો: 700 એરસ્ટ્રાઈક, પોતાના જ શહેર પર 1000 કિલો બોમ્બ પડ્યો

યુક્રેન પર રશિયાનું મોટું એરસ્ટ્રાઈક: 653 ડ્રોન અને 51 મિસાઇલ હુમલા, પોતાના જ શહેર પર 1000 કિલો બોમ્બ પડ્યાનો દાવો; US-યુક્રેન વાટાઘાટો નિષ્ફળ

યુક્રેનમાં આર્મ્ડ ફોર્સિસ ડે પહેલાં રશિયાએ શનિવારે મોટા પાયે હવાઈ હુમલા કરીને યુદ્ધની જ્વાળાઓ ફરી ભભૂકાવી દીધી. યુક્રેન એરફોર્સના જણાવ્યા મુજબ રશિયાએ 29 સ્થાનો પર 653 ડ્રોન અને 51 મિસાઈલ ફેંકી. યુક્રેનએ 585 ડ્રોન અને 30 મિસાઈલ તોડી પાડવામાં સફળતા મેળવી, જોકે દેશભરમાં 8 લોકો ઘાયલ થયા અને ઊર્જા સ્ટેશન તેમજ રેલવે માળખાને નુકસાન થયું.

ઝાપોરિઝ્ઝિયા ન્યુક્લિયર પ્લાન્ટ થોડા સમય માટે બાહ્ય વીજળીથી કપાઈ ગયો, જોકે રિએક્ટર બંધ હોવાને કારણે કોઈ મોટું જોખમ સર્જાયું નથી.

રશિયાની મોટી ચૂક: પોતાના જ શહેર પર 1,000 કિલોનો બોમ્બ પડી ગયો

મીડિયા રિપોર્ટ્સ અનુસાર હુમલાઓ દરમિયાન રશિયાએ ભૂલથી પોતાના જ બેલ્ગોરોડ શહેર પર FAB-1000 હાઇ-એક્સપ્લોસિવ બોમ્બ ઝીંકી દીધો. આ બોમ્બ લગભગ 1,000 કિલોગ્રામનું હતું. તે સંપૂર્ણ ફાટ્યો ન હતો, પરંતુ શહેરમાં મોટો ખાડો પડી ગયો. સત્તાવાર પુષ્ટિ હજી સુધી નથી.

યુક્રેન–અમેરિકા વાટાઘાટો નિષ્ફળ

ત્યાંજ, હુમલાઓ બાદ યુક્રેનિયન અને અમેરિકી અધિકારીઓ વચ્ચે ફ્લોરિડામાં થયેલી ત્રણ દિવસની વાટાઘાટો કોઈ નક્કર પરિણામ વિના સમાપ્ત થઈ. ડોનાલ્ડ ટ્રમ્પના દૂત સ્ટીવ વિટકૉફ અને ટ્રમ્પના જમાઈ જેરેડ કુશનર વાટાઘાટોમાં હાજર રહ્યા.

યુક્રેનના રાષ્ટ્રપતિ ઝેલેન્સકીએ જણાવ્યું કે ચર્ચા સકારાત્મક રહી, પરંતુ કોઈ સમજૂતી થઈ નથી. બંને દેશો માને છે કે શાંતિ માટે રશિયાએ હત્યાઓ રોકવી પડશે અને ડી-એસ્કેલેશનના પગલાં ભરવા પડશે.

યુરોપની ચિંતા વધી: લંડનમાં હાઈ-લેવલ બેઠક

સોમવારે લંડનમાં ઝેલેન્સકી, બ્રિટિશ PM કીર સ્ટાર્મર, જર્મન ચાન્સેલર મર્ઝ અને ફ્રેન્ચ રાષ્ટ્રપતિ મેક્રોન મળશે. શાંતિ, સુરક્ષા ગેરંટી અને રશિયાની આક્રમકતા પર ચર્ચા થશે.

ફ્રેન્ચ રાષ્ટ્રપતિ મેક્રોને કહ્યું કે રશિયા શાંતિ ઈચ્છતું નથી અને હિંસા વધારી રહ્યું છે.

યુરોપ–અમેરિકા વચ્ચે શંકાના વાદળો

લીક થયેલી એક સિક્રેટ વીડિયો-કોલમાં મેક્રોને ચિંતા વ્યક્ત કરી કે કદાચ અમેરિકા યુક્રેનને પૂરતી સુરક્ષા ગેરંટી વિના પ્રદેશ છોડવા મજબૂર કરી શકે. યુરોપિયન નેતાઓએ ટ્રમ્પના બંને પ્રતિનિધિઓ વિટકૉફ અને કુશનર પર અવિશ્વાસ વ્યક્ત કર્યો.

જર્મન ચાન્સેલર મર્ઝે ઝેલેન્સકીને ચેતવણી આપી કે “આવનારા દિવસોમાં ખૂબ સાવચેત રહેજો.”

યુક્રેનના રાષ્ટ્રપતિ કાર્યાલયે આ તમામ “લીક” રિપોર્ટને ખોટું કહ્યુ છે.

રશિયાનો દાવો: યુક્રેનએ અમારી ઓઈલ રિફાઇનરીઓ પર હુમલા વધાર્યા

રશિયાએ દાવો કર્યો કે તેણે 116 યુક્રેનિયન ડ્રોન તોડી પાડ્યા અને યુક્રેનએ રયાઝાન ઓઈલ રિફાઇનરી પર લાંબા અંતરના ડ્રોનથી હુમલો કર્યો.

યુક્રેન છેલ્લા કેટલાક મહિનાથી રશિયાની રિફાઇનરીઓને ટાર્ગેટ કરી રહ્યું છે જેથી તેની ઓઈલ નિકાસ ઘટે. યુક્રેન અને અમેરિકા દાવો કરે છે કે રશિયા આ ઓઈલ વેચાણમાંથી મળેલા પૈસાથી યુદ્ધ ચલાવી રહ્યું છે.

પુતિનની ધમકી: “યુરોપે યુદ્ધ કર્યું તો કોઈને વાતચીત કરવાની તક નહીં મળે”

રશિયન રાષ્ટ્રપતિ પુતિને કહ્યું કે જો યુરોપે યુદ્ધ શરૂ કર્યું તો જવાબ એટલો કડક હશે કે “વાતચીત માટે કોઈ નહીં બચે.”
તેમણે દાવો કર્યો કે રશિયા યુક્રેનમાં સંપૂર્ણ યુદ્ધ નથી લડી રહ્યું, માત્ર સીમિત ઑપરેશન ચલાવી રહ્યું છે.

2022થી ચાલતું યુદ્ધ શમવાનું નામ નથી લેતું

ફેબ્રુઆરી 2022થી શરૂ થયેલું રશિયા–યુક્રેન યુદ્ધ અત્યાર સુધી હજારો લોકોના જીવ લઈ ચૂક્યું છે. 20% યુક્રેનિયન વિસ્તાર પર રશિયાનો કબજો છે અને લાખો લોકો દેશ છોડવા મજબૂર થયા છે.