રાજકોટમાં 120 કિલોથી વધુ ચાંદીની મોટી ચોરી, રાતે વેપારીના ઘરમાં તસ્કરો ઘૂસ્યા

રાજકોટના ચંપકનગર વિસ્તારમાં આજે એક મોટી અને ચોંકાવનારી ચોરીની ઘટના સામે આવી છે. અતુલભાઈ પટેલ નામના ચાંદીના વેપારીના પરિચિત બિપિનભાઈના ઘરમાં રાત્રીના સમયે તસ્કરોએ ઘૂસીને કરોડો રૂપિયાની ચાંદીની ચોરી કરી લીધી છે. આ ઘટનાના પગલે સમગ્ર વિસ્તારમાં ભય અને આક્રોશનો માહોલ સર્જાયો છે.

રાતના સમયે ફોર વ્હીલમાં આવ્યા તસ્કરો

મળતી માહિતી મુજબ, તસ્કરોએ રાત્રીના અંધારાનો લાભ લઈ બિપિનભાઈના મકાનમાં પ્રવેશ કર્યો હતો. રાતના અંદાજે 2 થી 2:30 વાગ્યા દરમિયાન ફોર વ્હીલ વાહનમાં આવેલા ત્રણ જેટલા તસ્કરોએ ઘરમાંથી 1 કરોડ રૂપિયાથી વધુની કિંમતની ચાંદી અને ચાંદીના દાગીનાની ચોરી કરી હતી. ઘટના બાદ તસ્કરો ફરાર થઈ ગયા હતા.

ચોરીની જાણ થતાં પોલીસ તંત્ર દોડતું થયું

ચોરીની જાણ થતાં જ અતુલભાઈ પટેલે તાત્કાલિક ધારાસભ્ય ઉદય કાનગડને જાણ કરી હતી. આ પછી પોલીસના ઉચ્ચ અધિકારીઓ તરત જ ઘટનાસ્થળે પહોંચ્યા હતા અને તપાસ શરૂ કરી હતી. ઘટના ગંભીર હોવાને કારણે પોલીસ તંત્રમાં પણ હડકંપ મચી ગયો છે.

120થી 125 કિલોગ્રામ ચાંદી ચોરી ગઈ

રાજકોટ ઝોન-વનના ડીસીપી હેતલ પટેલે માહિતી આપતા જણાવ્યું હતું કે ફરિયાદી અતુલ લિંબાભાઈ ગુસા, જેઓ લાંબા સમયથી ચાંદીના વ્યવસાય સાથે જોડાયેલા છે, તેમના પરિચિત બિપિનભાઈના ચંપકનગર સ્થિત મકાનમાં રાખેલી અંદાજે 120થી 125 કિલોગ્રામ ચાંદીની ચોરી થઈ છે. ચાંદીની કિંમત એક કરોડ રૂપિયાથી વધુ હોવાનું પ્રાથમિક અંદાજ છે.

CCTV ફૂટેજના આધારે તપાસ શરૂ

ઘટનાની જાણ થતાં જ બી ડિવિઝન પોલીસ, ક્રાઈમ બ્રાન્ચ અને ઝોન-વન પોલીસની ટીમો સંયુક્ત રીતે તપાસમાં જોડાઈ ગઈ છે. આસપાસના વિસ્તારોમાં લાગેલા CCTV કેમેરાની ફૂટેજ તપાસવામાં આવી રહી છે. ચોરોની ઓળખ અને તેમની ધરપકડ માટે વિવિધ દિશામાં તપાસ હાથ ધરવામાં આવી છે.

ઉચ્ચ અધિકારીઓ ઘટના સ્થળે

આ હાઈપ્રોફાઇલ ચોરીના કેસમાં ઇન્ચાર્જ પોલીસ કમિશનર મહેન્દ્ર બગડીયા, ડીસીપી ક્રાઈમ, ડીસીપી ઝોન-વન, બી ડિવિઝન પોલીસ તથા ક્રાઈમ બ્રાન્ચના અધિકારીઓ ઘટના સ્થળે પહોંચ્યા હતા. પોલીસ દ્વારા દરેક પાસેથી તપાસ કરવામાં આવી રહી છે.

વેપારને કારણે ચોરી થઈ હોવાની આશંકા

પ્રાથમિક તપાસમાં એવું અનુમાન લગાવવામાં આવી રહ્યું છે કે ચોરીનો સંબંધ અતુલભાઈ પટેલના ચાંદીના વેપાર સાથે હોઈ શકે છે. પોલીસ તમામ પાસાઓને ધ્યાનમાં રાખીને તપાસ કરી રહી છે. શહેરમાં આ મોટી ચોરીની ઘટનાએ સુરક્ષા વ્યવસ્થા પર પણ અનેક સવાલો ઊભા કર્યા છે.