મધરાતે આકાશમાં અજાણી રોશની! ‘આ ડ્રોન છે’ એવી કચ્છીઓની બુમો, નિષ્ણાતોએ સેટેલાઇટ-ઉલ્કાની શક્યતા નકારી

કચ્છ જિલ્લાના ગાંધીધામમાં મધરાતે આકાશમાં પક્ષીઓની હરમાળ જેવી સંખ્યાબંધ રોશની દેખાતા સ્થાનિકોમાં કુતૂહલ અને ગભરામણ જોવા મળી હતી. અજાણી રોશની દેખાતાં લોકો ધાબા પર દોડ્યા અને ‘આ ડ્રોન છે, ડ્રોન છે!’ કહીને આ દૃશ્યો પોતાના મોબાઇલ ફોનમાં કેદ કર્યા હતાં. આકાશમાં દેખાયેલી આ લાઈટ્સનું સાચું કારણ શું છે તે હજી સ્પષ્ટ થયું નથી. જોકે ખગોળશાસ્ત્રીએ જણાવ્યું કે આ રોશની કોઈ સેટેલાઇટ, ઉલ્કાવર્ષા અથવા અન્ય સામાન્ય ખગોળીય ઘટના હોવાની શક્યતા નહિવત્ છે. પ્રાથમિક નિરીક્ષણ મુજબ આ ડ્રોન અથવા માનવસર્જિત કોઈ ઉડતી શક્તિ હોવાની શક્યતાઓ વધારે દેખાઈ રહી છે. સ્થાનિકોમાં આ ઘટના અંગે ચર્ચાઓ જોર પકડી રહી છે અને લોકો આકાશમાં દેખાયેલી રહસ્યમય લાઈટ્સ અંગે વધુ સ્પષ્ટતા માટે રાહ જોઈ રહ્યા છે.

લોકોએ કચ્છી ભાષામાં ડ્રોન હોવાનું જણાવ્યું

ગત મધ્યરાત્રિના સમયે ગાંધીધામ વિસ્તારમાં કેટલાક લોકોને આકાશમાં સામૂહિક રીતે ટમટમતા તારા જેવી રોશની દેખાઈ હતી. આશ્ચર્યચકિત થયેલા લોકો ઠંડી હોવા છતાં મકાનની છત પર ચડીને આ દ્રશ્યો રેકોર્ડ કર્યા હતા. વીડિયોમાં લોકો કચ્છી ભાષામાં આ વસ્તુઓને ‘ડ્રોન’ ગણાવી રહ્યા હતા, જોકે તેની વાસ્તવિકતા સ્પષ્ટ થઈ નથી.

આકાશમાં રહસ્યમય રોશની અંગે ખગોળશાસ્ત્રીનું નિવેદન: ‘સેટેલાઇટ કે ઉલ્કા નહીં, ડ્રોન હોવાની શક્યતા વધુ’

કચ્છના ગાંધીધામમાં મધરાતે આકાશમાં પક્ષીઓને હરમાળ જેવી અજબ રોશની દેખાતા સ્થાનિકોમાં ભારે ચર્ચા જાગી હતી. લોકો ધાબા પર દોડી જઈ ‘ડ્રોન છે, ડ્રોન!’ કહીને ઘટના વિડિઓમાં કેદ કરી રહ્યા હતા. આ રહસ્યમય રોશની અંગે હવે ખગોળશાસ્ત્રીએ પણ મહત્વપૂર્ણ સ્પષ્ટતા આપી છે.

ભુજ સ્થિત રિજનલ સાયન્સ સેન્ટરના ખગોળશાસ્ત્રી હેતભાઈ આહીરે જણાવ્યું કે લોકોને દેખાયેલી આકાશીય રોશની સેટેલાઇટ કે ઉલ્કા હોવાની સંભાવના લગભગ નહિવત્ છે.
તેમણે સમજાવ્યું કે—

• સેટેલાઇટ સામાન્ય રીતે કતારબંધ જોવા મળે છે,
• જ્યારે ઉલ્કા વાતાવરણમાં પ્રવેશતા જ સળગી ઊઠે છે અને તેવો તેજસ્વી પ્રકાશ પેદા કરે છે.

આહિરે વધુમાં ઉમેર્યું કે વિડિયોમાં જોવા મળતી રોશની ડ્રોન હોવાની શક્યતા વધુ છે. શક્ય છે કે આ કોઈ કાર્યક્રમ અથવા પ્રોજેક્શન માટે મોટી આકૃતિઓ બનાવવા માટેની પ્રેક્ટિસ ડ્રિલ હોઈ શકે.

આકાશમાં દેખાયેલી આ અજબ રોશની બાદ સ્થાનિકોમાં કુતૂહલ વધ્યું છે અને ઘટનાની સત્તાવાર પુષ્ટિ માટે લોકો હજી પણ આતુર છે.