Jio-Hotstar સબ્સ્ક્રિપ્શન મોંઘું થયું: નવા માસિક પ્લાન, હોલિવૂડ કન્ટેન્ટ માટે વધારાના ખર્ચા

Jio-Hotstar એ  તેના OTT પ્લેટફોર્મ પર નવા અપડેટેડ સબ્સ્ક્રિપ્શન પ્લાન લોન્ચ કર્યા છે. કંપનીએ પહેલીવાર મોબાઇલ, સુપર અને પ્રીમિયમ કેટેગરીમાં માસિક (મંથલી) પ્લાન રજૂ કર્યા છે.

નવા નિયમો અનુસાર, મોબાઇલ પ્લાન પર કન્ટેન્ટ જોવા માટે યુઝર્સને ઓછામાં ઓછા ₹79 ખર્ચવા પડશે. સુપર અને પ્રીમિયમ પ્લાનની કિંમતોમાં 47% સુધીનો વધારો કર્યો છે. નવા ભાવ 28 જાન્યુઆરી 2026થી લાગુ પડશે.

જૂના ગ્રાહકો પર નહીં પડે અસર

Jio-Hotstar એ  જણાવ્યું છે કે, આ બદલાવ ફક્ત નવા ગ્રાહકો માટે છે. જેઓ પાસે પહેલાથી એક્ટિવ સબ્સ્ક્રિપ્શન છે, તેઓ જૂની કિંમતો પર સર્વિસ મેળવી શકશે, જો તેઓનું ઓટો-રિન્યુઅલ મોડ ચાલુ રહેશે. જો જૂનું સબ્સ્ક્રિપ્શન પૂરુ થઈ જાય અને યુઝર નવો પ્લાન લે છે, તો તેને નવી કિંમતો ચૂકવવી પડશે.

કનેક્ટેડ ટીવી પર વધી વ્યુઅરશિપ, બદલાયા રેટ

Jio-Hotstarના હેડ સુશાંત શ્રીરામે જણાવ્યું કે, છેલ્લા 11 મહિનામાં કનેક્ટેડ ટીવી (મોટી સ્ક્રીન) પર કન્ટેન્ટ જોનારા યુઝર્સની સંખ્યા ઝડપી વધી છે. આને ધ્યાનમાં લઈને કંપનીએ પ્રાઇસિંગ સ્ટ્રક્ચરમાં ફેરફાર કર્યો છે. પ્લેટફોર્મ પાસે હાલમાં 45 કરોડથી વધુ મંથલી એક્ટિવ યુઝર્સ છે અને ગૂગલ પ્લે સ્ટોર પર 100 કરોડથી વધુ ડાઉનલોડ થઇ ચૂક્યા છે.

હોલિવૂડ કન્ટેન્ટ માટે અલગ ચુકવણી

નવા નિયમો મુજબ, મોબાઇલ પ્લાન લેનારા યુઝર્સ હવે હોલિવૂડ ફિલ્મો અને સિરીઝ માટે અલગ ‘એડ-ઓન’ પેક ખરીદવું પડશે. ₹79 વાળા મોબાઇલ પ્લાનમાં જો હોલિવૂડ કન્ટેન્ટ જોવું હોય, તો ₹49 વધારાના ચુકવવા પડશે. સુપર અને પ્રીમિયમ પ્લાનમાં હોલિવૂડ કન્ટેન્ટ પહેલાની જેમ જ સામેલ રહેશે.

પ્રીમિયમ વાર્ષિક પ્લાન સૌથી મોંઘો

પ્રીમિયમ વાર્ષિક પ્લાનની કિંમત પહેલાં ₹1,499 હતી, હવે ₹2,199 થઈ ગઈ છે. સુપર વાર્ષિક પ્લાન ₹899 થી વધીને ₹1,099 થયો છે. પ્રીમિયમ પ્લાનમાં યુઝર્સ 4 ડિવાઇસ પર 4K ક્વોલિટીમાં કન્ટેન્ટ જોઈ શકે છે, સુપર પ્લાનમાં 2 ડિવાઇસ અને મોબાઇલ પ્લાનમાં ફક્ત 1 મોબાઇલ ડિવાઇસ પર જ એક્સેસ મળશે.

લાઇવ સ્પોર્ટ્સમાં જાહેરાતો દેખાશે

Jio-Hotstar એ જાહેરાતની પોલિસી અંગે સ્પષ્ટતા કરી છે. મોબાઇલ અને સુપર પ્લાન લેનારા યુઝર્સ માટે તમામ કન્ટેન્ટ (ફિલ્મો, સિરીઝ) વચ્ચે જાહેરાતો દેખાશે. પ્રિમિયમ યુઝર્સ માટે એન્ટરટેઇનમેન્ટ કન્ટેન્ટ એડ-ફ્રી રહેશે, પરંતુ લાઇવ સ્પોર્ટ્સ અને લાઇવ શો દરમિયાન તેમને પણ જાહેરાતો જોવી પડશે.