18 દિવસનું ફાસ્ટ શૂટિંગ, હાસ્યનો ડોઝ ડબલ: ‘જય કનૈયાલાલ કી’માં ગુજ્જુભાઈની ધમાલ

ગુજરાતી સિનેમામાં ‘કનૈયા’નો જયકારો: 9 જાન્યુઆરીએ આવશે મલ્ટિ-સ્ટારર ફિલ્મ ‘જય કનૈયાલાલ કી’

ગુજરાતી સિનેમા માટે વર્ષ 2025 ખરા અર્થમાં ઐતિહાસિક અને ‘કૃષ્ણમય’ રહ્યું હતું અને હવે નવા વર્ષ 2026ની શરૂઆત પણ ‘કનૈયા’ના જયકારા સાથે થવા જઈ રહી છે. આગામી 9 જાન્યુઆરીના રોજ સિનેમાઘરોમાં રિલીઝ થવા જઈ રહી છે મલ્ટિ-સ્ટારર ગુજરાતી ફિલ્મ ‘જય કનૈયાલાલ કી’, જેમાં ગુજરાતી કોમેડી કિંગ સિદ્ધાર્થ રાંદેરિયા (ગુજ્જુભાઈ), સુપરસ્ટાર હિતુ કનોડિયા અને પ્રતિભાશાળી અભિનેત્રી વૈશાલી ઠક્કર મુખ્ય ભૂમિકામાં નજરે પડશે.

આ ફિલ્મ માત્ર હાસ્ય અને પારિવારિક મનોરંજન પૂરતી સીમિત નથી, પરંતુ તેમાં જીવનનો એક અત્યંત મહત્વપૂર્ણ અને પ્રાસંગિક સંદેશ પણ છુપાયેલો છે—પરિવાર સર્વોપરી છે.

દોસ્તારના વિચારમાંથી જન્મી ફિલ્મની વાર્તા

ફિલ્મના ડિરેક્ટર ધર્મેશ મહેતાએ જણાવ્યું કે ફિલ્મનો વિચાર મિત્ર અમિત આર્ય સાથે થયેલી ચર્ચામાંથી જન્મ્યો હતો.
તેમણે કહ્યું,
“દેશમાં સૌથી વધુ મિડલ ક્લાસ પરિવારો વસે છે. એટલે મને લાગ્યું કે જો વાર્તા વાસ્તવિક અને રોજિંદા જીવન જેવી હશે, તો દરેક વ્યક્તિ તેને પોતાની કહાની તરીકે અનુભવે.”

આ વિચાર જ્યારે સિદ્ધાર્થ રાંદેરિયા, વૈશાલી ઠક્કર અને હિતુ કનોડિયા સુધી પહોંચ્યો, ત્યારે બધાનું પહેલું રિએક્શન હતું—‘હા, કરીએ… મજા આવશે’. અને એ રીતે વિચારમાંથી વાર્તા અને વાર્તામાંથી ફિલ્મ બની.

‘મોહન VS મોહન’થી ‘જય કનૈયાલાલ કી’ સુધી

ફિલ્મના ટાઇટલ અંગે ધર્મેશ મહેતાએ ખુલાસો કરતા જણાવ્યું કે શરૂઆતમાં ફિલ્મનું નામ ‘મોહન VS મોહન’ રાખવાનું વિચરાયું હતું, પરંતુ તે નામ થોડું ગંભીર લાગતું હતું.
પછી અચાનક ‘કાનુડા’ની પ્રેરણાથી ‘જય કનૈયાલાલ કી’ નામ મનમાં બેઠું અને ભગવાનની કૃપાથી તે નામ અગાઉ કોઈએ રજિસ્ટર પણ કરાવ્યું ન હતું.

માત્ર 18 દિવસમાં પૂર્ણ થયું શૂટિંગ

ફિલ્મનું શૂટિંગ અમદાવાદ, વસો (આણંદ) અને મુંબઈમાં થયું છે.
ડિરેક્ટર અનુસાર, ત્રણ ગીતો સહિત ફિલ્મનું સંપૂર્ણ શૂટિંગ માત્ર 18 દિવસમાં પૂર્ણ કરવામાં આવ્યું, જે ગુજરાતી સિનેમામાં એક નોંધપાત્ર સિદ્ધિ ગણાય.

ગુજરાતી ફિલ્મોના ‘સિંઘમ’ હિતુ કનોડિયા

ફિલ્મમાં પોલીસ અધિકારીની ભૂમિકામાં નજરે પડતા હિતુ કનોડિયાએ કહ્યું,
“ધર્મેશભાઈનો ફોન ઉપાડતાની સાથે જ મેં કહી દીધું—હું કરું છું. સ્ટોરી સાંભળ્યા બાદ તો મને લાગ્યું કે હું ખરેખર ભાગ્યશાળી છું.”

હિતુ કનોડિયા અગાઉ પણ અનેક ફિલ્મોમાં પોલીસની ભૂમિકામાં જોવા મળ્યા છે, પરંતુ તેઓ દરેક પાત્રમાં અલગ વેરિએશન લાવવાનું પસંદ કરે છે.
તેમણે મજાકમાં કહ્યું,
“હવે તો પોલીસની વર્દી ઘરમાં જ વસાવી લીધી છે, આ ફિલ્મ માટે પણ હું મારા પોતાના પોલીસ શૂઝ પહેરીને ગયો હતો.”

‘પતિ રામ હોય તો પત્નીએ સીતાજી બનવું જ પડે’

ફિલ્મમાં સિદ્ધાર્થ રાંદેરિયા સિદ્ધાંતવાદી પતિના રોલમાં છે, જ્યારે વૈશાલી ઠક્કર તેમની પત્ની અને સપોર્ટ સિસ્ટમ તરીકે જોવા મળશે.
વૈશાલીએ કહ્યું,
“જેના પતિ રામ હોય, તેમની પત્નીએ સીતાજી જેવી મુશ્કેલીઓનો સામનો કરવો જ પડે—આ તો આપણે સૌ જાણીએ છીએ.”

પરિવાર પ્રથમ કે કાયદા સર્વોપરી?

આ મહત્વના પ્રશ્ન પર હિતુ કનોડિયાએ હસતાં કહ્યું,
“આ સવાલનો જવાબ તો શ્રીકૃષ્ણ જ આપી શકે… પરંતુ ફિલ્મમાં આ દ્ધંદ્વને ખૂબ સુંદર રીતે રજૂ કરવામાં આવ્યો છે અને તેનો જવાબ ક્લાઈમેક્સમાં મળશે.”

‘ગુજ્જુભાઈ’ની ઓફ-સ્ક્રીન કોમેડીથી સેટ પર ધમાલ

ડિરેક્ટર ધર્મેશ મહેતાએ જણાવ્યું કે સિદ્ધાર્થ રાંદેરિયાની ઓફ-સ્ક્રીન કોમેડી પણ એટલી જ મજેદાર છે.
“સીન શૂટ થાય એ પહેલા જ કોઈ પંચલાઈન આવી જાય અને અમે હસી-હસીને લોટપોટ થઈ જઈએ, ઘણીવાર તો ‘એક્શન’ બોલવું પણ મુશ્કેલ થઈ જતું.”

મુશ્કેલીઓ વચ્ચે પણ ‘કલાકાર પ્રથમ’

શૂટિંગ દરમિયાન સિદ્ધાર્થ રાંદેરિયાના જીવનમાં અણધાર્યો બનાવ બન્યો હતો, છતાં તેઓ થોડા દિવસોમાં ફરી સેટ પર પરત ફર્યા.
હિતુ કનોડિયાએ કહ્યું,
“આ મુશ્કેલ સમયમાં પણ તેમણે શૂટિંગ પૂર્ણ કર્યું—એ દરેક કલાકાર માટે પ્રેરણાદાયક છે.”

---

ફિલ્મ એક નજરમાં

ફિલ્મની કહાની કનૈયાલાલ નામના સિદ્ધાંતવાદી, આખાબોલા અને ચુસ્ત સ્વભાવના નિવૃત્ત કર્મચારીની આસપાસ ફરે છે. જીવનભર સિદ્ધાંતો પર ચાલેલો માણસ જ્યારે પરિવાર પર આફત આવે છે, ત્યારે પોતાના જ સિદ્ધાંતોને પ્રશ્ન કરે છે.
કનૈયાલાલ કહે છે—
“સિદ્ધાંતોની પણ એક્સપાયરી ડેટ હોય છે, અને પરિવારથી ઉપર કોઈ સિદ્ધાંત હોતો નથી.”

9 જાન્યુઆરીએ સિનેમાઘરોમાં

‘જય કનૈયાલાલ કી’ એક Slice of Life ફિલ્મ છે, જેમાં હાસ્ય, લાગણી અને જીવનના ઊંડા સત્યને સુંદર રીતે ગૂંથવામાં આવ્યા છે.
ફિલ્મ 9 જાન્યુઆરી 2026ના રોજ સિનેમાઘરોમાં રિલીઝ થવાની છે.