ગુજરાતમાં ગરમી વચ્ચે ચોમાસાની આહટ: બનાસકાંઠામાં વાદળછાયું વાતાવરણ, દક્ષિણ ગુજરાત-સૌરાષ્ટ્રમાં વરસાદની આગાહી

ગુજરાતમાં ઉનાળાની કાળઝાળ ગરમીનો પ્રકોપ હજુ યથાવત્ છે, પરંતુ હવે ચોમાસાના આગમનના સંકેતો દેખાવા લાગ્યા છે. હવામાન વિભાગના જણાવ્યા અનુસાર રાજ્યના મોટાભાગના વિસ્તારોમાં મહત્તમ તાપમાન સામાન્ય કે સામાન્યથી વધુ નોંધાઈ રહ્યું છે. છેલ્લા 24 કલાક દરમિયાન રાજ્યમાં હવામાન સંપૂર્ણપણે સૂકું રહ્યું હતું. 8 જૂને અમદાવાદમાં રાજ્યનું સૌથી વધુ 42.2 ડિગ્રી સેલ્સિયસ તાપમાન નોંધાયું હતું, જે સામાન્ય કરતાં 1.3 ડિગ્રી વધુ છે.

બીજી તરફ દક્ષિણ-પશ્ચિમ ચોમાસું દેશમાં ઝડપી ગતિએ આગળ વધી રહ્યું છે. માત્ર પાંચ દિવસમાં ચોમાસું 13 રાજ્યો સુધી પહોંચી ગયું છે અને સોમવારે તે તેલંગાણામાં પ્રવેશી ચૂક્યું છે. પશ્ચિમ કિનારે ચોમાસું હવે મુંબઈથી આશરે 150 કિલોમીટર દૂર છે અને આગામી 48 કલાકમાં મુંબઈમાં દસ્તક આપે તેવી શક્યતા વ્યક્ત કરવામાં આવી છે.

આ દરમિયાન આજે વહેલી સવારથી બનાસકાંઠા જિલ્લામાં વાતાવરણમાં અચાનક પલટો જોવા મળ્યો છે. અમીરગઢ, ઈકબાલગઢ, ડીસા, પાલનપુર, દાંતીવાડા, ધાનેરા અને કાંકરેજ સહિતના વિસ્તારોમાં આકાશમાં ઘેરા વાદળો છવાઈ ગયા છે અને વરસાદી માહોલ સર્જાયો છે. આ બદલાયેલા વાતાવરણને કારણે ખેડૂતોમાં ચિંતા વ્યાપી ગઈ છે.

હાલમાં ખેતરોમાં બાજરી અને મગફળી સહિતના અનેક પાક તૈયાર હાલતમાં છે. જો અચાનક વરસાદ વરસે તો પાકને નુકસાન પહોંચવાની ભીતિ છે. પરિણામે ખેડૂતો પાકને સુરક્ષિત રાખવા માટે તાત્કાલિક પગલાં લઈ રહ્યા છે અને તૈયાર પાકની વહેલી તકે કાપણી તથા સંગ્રહના પ્રયાસો શરૂ કર્યા છે.

અમદાવાદમાં કેવું રહેશે હવામાન?

હવામાન વિભાગના અનુમાન મુજબ અમદાવાદમાં આગામી દિવસોમાં આકાશ આંશિક વાદળછાયું રહી શકે છે. શહેરમાં મહત્તમ તાપમાન 42 ડિગ્રી સેલ્સિયસની આસપાસ રહેવાની શક્યતા છે. હાલ કોઈ મોટી હવામાન ચેતવણી જાહેર કરવામાં આવી નથી.

આગામી 7 દિવસની વરસાદી આગાહી

હવામાન વિભાગના જણાવ્યા અનુસાર આગામી એક સપ્તાહ દરમિયાન રાજ્યના તાપમાનમાં કોઈ મોટો ફેરફાર થવાની શક્યતા નથી. જોકે પ્રિ-મોન્સૂન એક્ટિવિટીના કારણે અનેક વિસ્તારોમાં હળવાથી મધ્યમ વરસાદ અને ગાજવીજ સાથે ઝાપટાં પડી શકે છે.

9 અને 10 જૂન: ડાંગ, તાપી, નવસારી, વલસાડ, દમણ તથા દાદરા-નગર હવેલીમાં છૂટાછવાયા સ્થળોએ હળવાથી મધ્યમ વરસાદની શક્યતા છે. અન્ય વિસ્તારોમાં હવામાન મોટાભાગે શુષ્ક રહેશે.

11 જૂન: દક્ષિણ ગુજરાતના સુરત, નર્મદા, છોટાઉદેપુર, ડાંગ, તાપી, નવસારી અને વલસાડ સહિતના વિસ્તારોમાં ગાજવીજ સાથે વરસાદ થઈ શકે છે.

12 જૂન: ઉત્તર ગુજરાતના કેટલાક વિસ્તારો ઉપરાંત પંચમહાલ, દાહોદ, મહિસાગર, વડોદરા, ભરૂચ, સુરત અને સૌરાષ્ટ્રના અમરેલી, ભાવનગર તથા ગીર સોમનાથ જિલ્લામાં વરસાદની સંભાવના છે.

13 જૂન: અરવલ્લી, પંચમહાલ, દાહોદ, મહિસાગર સહિત ઉત્તર ગુજરાતના વિસ્તારો તેમજ દક્ષિણ ગુજરાત અને સૌરાષ્ટ્રના પોરબંદર, જૂનાગઢ, અમરેલી અને ભાવનગરમાં ગાજવીજ સાથે વરસાદની આગાહી છે.

14 જૂન: ઉત્તર ગુજરાતના કેટલાક જિલ્લાઓ, દક્ષિણ ગુજરાતના તમામ જિલ્લાઓ અને સૌરાષ્ટ્રના દરિયાકાંઠાના વિસ્તારોમાં મધ્યમ વરસાદ પડી શકે છે.

દેશભરમાં ચોમાસાની ઝડપી પ્રગતિ

દેશના અનેક રાજ્યોમાં પ્રિ-મોન્સૂન વરસાદ શરૂ થઈ ગયો છે. મધ્ય પ્રદેશના ભોપાલમાં સોમવારે વરસાદ નોંધાયો હતો, જ્યારે ઉત્તર પ્રદેશના ગોરખપુર અને જાલૌનમાં પણ ભારે વરસાદ પડ્યો હતો. રાજસ્થાનના કેટલાક વિસ્તારોમાં 60થી 120 કિમી પ્રતિ કલાકની ઝડપે પવન ફૂંકાયો હતો.

જોકે પશ્ચિમ રાજસ્થાનમાં હીટવેવનો ખતરો યથાવત્ છે. શ્રીગંગાનગરમાં 45.6 ડિગ્રી સેલ્સિયસ તાપમાન નોંધાયું હતું, જ્યારે ફલોદી, જેસલમેર અને બીકાનેરમાં પણ 44 ડિગ્રીથી વધુ તાપમાન રહ્યું હતું.

હવામાન વિભાગના જણાવ્યા અનુસાર આજે દેશના 15 રાજ્યોમાં વરસાદનું એલર્ટ જાહેર કરવામાં આવ્યું છે. કેરળ અને કર્ણાટકના કેટલાક વિસ્તારોમાં ભારે વરસાદને પગલે રેડ એલર્ટ જાહેર કરવામાં આવ્યું છે. આવી સ્થિતિમાં ગુજરાતમાં પણ આગામી દિવસોમાં ચોમાસાના આગમન સાથે હવામાનમાં વધુ ફેરફાર જોવા મળી શકે છે.