કેડબરી ખવડાવતા જ આરોપીએ ઓકી દીધા 2.49 કરોડની લૂંટના તમામ રહસ્યો! શાપર લૂંટ કેસમાં 3 આરોપી પાંચ દિવસના રિમાન્ડ પર, ગામમાં અજાણ્યા ઘૂસે તો કુકડાઓ આપી દેતા એલર્ટ

રાજકોટ જિલ્લાના શાપર-વેરાવળમાં જૂના રાજવી પરિવારના સભ્ય જીતેન્દ્રસિંહ જાડેજાના ઘરે થયેલી રૂ. 2.49 કરોડની સનસનાટીભરી લૂંટનો ભેદ આખરે રાજકોટ ગ્રામ્ય પોલીસે ઉકેલી લીધો છે. પોલીસે મધ્યપ્રદેશમાંથી ત્રણ આરોપીઓની ધરપકડ કરીને રૂ. 76.86 લાખનો મુદ્દામાલ કબજે કર્યો છે. આરોપીઓને કોર્ટમાં રજૂ કરતાં પાંચ દિવસના રિમાન્ડ મંજૂર કરવામાં આવ્યા છે. આ દરમિયાન એક ચોંકાવનારી વાત સામે આવી છે કે, આરોપીને કેડબરી ચોકલેટ આપતાં જ તેણે સમગ્ર લૂંટની કબૂલાત કરી દીધી હતી.

19 જૂનની મધરાતે બની હતી કરોડોની લૂંટ

19 અને 20 જૂન, 2026ની મધરાતે શાપર-વેરાવળ વિસ્તારમાં આવેલા જૂના રાજવી પરિવારના સભ્ય અને 77 વર્ષીય જીતેન્દ્રસિંહ અજીતસિંહ જાડેજાના નિવાસસ્થાને પાંચ બુકાનીધારી લૂંટારુઓ ત્રાટક્યા હતા. તે સમયે જીતેન્દ્રસિંહ ઘરમાં એકલા હતા.

લૂંટારુઓએ દરવાજો તોડી ઘરમાં પ્રવેશ કર્યો હતો. એક આરોપી લોખંડની પાઇપ લઈને જીતેન્દ્રસિંહની છાતી પર ચડી ગયો હતો અને તેમનું મોઢું દબાવી દીધું હતું, જ્યારે અન્ય ચાર આરોપીઓએ તિજોરી અને કબાટ તોડી રોકડ, સોના-ચાંદીના દાગીના, પરવાનાવાળી 12 બોર રાયફલ અને મોબાઇલ ફોન સહિત કુલ રૂ. 2.49 કરોડની લૂંટ ચલાવી ફરાર થઈ ગયા હતા.

પોલીસની અનેક ટીમોએ હાથ ધરી તપાસ

ઘટનાની જાણ થતાં જ રાજકોટ રેન્જ IG, જિલ્લા પોલીસ વડા વિજયસિંહ ગુર્જર, DYSP, શાપર-વેરાવળ પોલીસ, LCB અને SOG સહિતની ટીમો ઘટનાસ્થળે પહોંચી હતી. FSL, ડોગ સ્ક્વોડ અને ફિંગરપ્રિન્ટ નિષ્ણાતોની મદદથી વૈજ્ઞાનિક તપાસ શરૂ કરવામાં આવી હતી.

તપાસ દરમિયાન મળેલા ટેકનિકલ અને માનવ ગુપ્તચર આધારોના આધારે પોલીસે આરોપીઓ સુધી પહોંચવાનો માર્ગ શોધી કાઢ્યો.

મધ્યપ્રદેશના જંગલમાંથી ત્રણ આરોપીઓ ઝડપાયા

પોલીસે મધ્યપ્રદેશના જંગલ અને પહાડી વિસ્તારમાં દરોડા પાડી ત્રણ આરોપીઓને ઝડપી પાડ્યા છે. તેમની ઓળખ બનસીંગ ઉર્ફે બન્ના હેમરાજ સિંગાડ (જાંબુવા, મધ્યપ્રદેશ), સેતાન દીવાન અમલિયાર (ગરબાડા, દાહોદ) અને દિનેશ સેતાન પરમાર તરીકે થઈ છે.

આરોપીઓ પાસેથી રૂ. 43.18 લાખ રોકડ, રૂ. 21.22 લાખના દાગીના, લૂંટમાં વપરાયેલ હથિયારો, બોલેરો કાર, લૂંટાયેલી રાયફલ સહિત કુલ રૂ. 76.86 લાખનો મુદ્દામાલ કબજે કરવામાં આવ્યો છે.

કોર્ટ દ્વારા ત્રણેય આરોપીઓને પાંચ દિવસના પોલીસ રિમાન્ડ મંજૂર કરવામાં આવ્યા છે. હવે ઘટનાસ્થળનું રિકન્સ્ટ્રક્શન, ફરિયાદીના મોબાઇલની શોધખોળ અને અન્ય પુરાવા એકત્ર કરવાની કાર્યવાહી હાથ ધરવામાં આવશે.

હજુ પાંચ આરોપી ફરાર

પોલીસના જણાવ્યા અનુસાર, મુખ્ય સૂત્રધાર સહિત હજુ પાંચ આરોપીઓ ફરાર છે. તેમની શોધખોળ માટે પોલીસની એક વિશેષ ટીમ હજુ પણ મધ્યપ્રદેશમાં અલગ-અલગ સ્થળોએ કામગીરી કરી રહી છે. જરૂર પડશે તો વધુ પોલીસ ટીમો પણ મોકલવામાં આવશે.

કુકડાઓ બન્યા હતા આરોપીઓની ‘સિક્યોરિટી સિસ્ટમ’

તપાસ દરમિયાન એક અનોખી માહિતી પણ સામે આવી છે. આરોપીઓના ગામમાં મોટાભાગના લોકો ઘરમાં પાલતુ કુકડાઓ રાખે છે. આ કુકડાઓ અજાણ્યા વ્યક્તિને જોતા જ એકસાથે જોરથી અવાજ કરવા લાગે છે. પરિણામે ગામમાં કોઈ પોલીસ કે અજાણી વ્યક્તિ પ્રવેશ કરે તો આરોપીઓને તરત જ તેની જાણ થઈ જતી હતી અને તેઓ સતર્ક બની જતા હતા.

આ કારણે પોલીસ માટે ગામમાં ગુપ્ત રીતે પ્રવેશ કરવો મોટો પડકાર બની ગયો હતો. આખરે પોલીસે વેશપલટો કરીને ગામમાં પ્રવેશ મેળવી આરોપીઓ સુધી પહોંચવામાં સફળતા મેળવી.

કેડબરી બની પોલીસ માટે સૌથી મોટું હથિયાર

આ સમગ્ર કેસમાં સૌથી રસપ્રદ ઘટના પૂછપરછ દરમિયાન બની હતી. મુખ્ય આરોપી બનસીંગ શરૂઆતમાં પોલીસ સમક્ષ કંઈપણ બોલવા તૈયાર નહોતો.

પોલીસે જ્યારે તેને પૂછ્યું કે તેને શું ખાવાનું ગમે છે ત્યારે તેણે ચોકલેટની માંગણી કરી. પોલીસે તરત જ કેડબરી ડેરી મિલ્ક મંગાવી આપી. ચોકલેટ મળ્યા બાદ આરોપીનો મિજાજ બદલાઈ ગયો અને તેણે લૂંટ કેવી રીતે કરી, કોણ-કોણ સામેલ હતું અને મુદ્દામાલ ક્યાં છુપાવ્યો હતો તેની વિગતવાર માહિતી પોલીસને આપી દીધી.

આ અનોખી માનસિક યુક્તિના કારણે પોલીસને કેસ ઉકેલવામાં મહત્વની સફળતા મળી હોવાનું માનવામાં આવી રહ્યું છે.

પડકારજનક રહ્યો આખો ઓપરેશન

જિલ્લા પોલીસ વડા વિજયસિંહ ગુર્જરે જણાવ્યું કે આરોપીઓ રીઢા ગુનેગાર હોવાથી અને તેમનું રહેઠાણ મધ્યપ્રદેશના પહાડી તથા જંગલ વિસ્તારમાં હોવાથી આ કેસ ઉકેલવો અત્યંત પડકારજનક હતો. તેમ છતાં સતત ટેકનિકલ સર્વેલન્સ, માનવ સૂત્રો અને ટીમવર્કના આધારે પોલીસે ત્રણ આરોપીઓને ઝડપી પાડ્યા છે અને હવે બાકીના આરોપીઓને પણ ટૂંક સમયમાં પકડી પાડવાની આશા વ્યક્ત કરી છે.

શાપરની કરોડોની લૂંટના આ કેસમાં પોલીસની તપાસ હજુ ચાલુ છે. ફરાર આરોપીઓની ધરપકડ અને બાકીના મુદ્દામાલની વસૂલાત બાદ આ સમગ્ર કેસમાં વધુ મોટા ખુલાસા થવાની સંભાવના વ્યક્ત કરવામાં આવી રહી છે.