ભારતમાં ‘ગઝવા-એ-હિંદ’ સ્થાપિત કરવાનો ઉદ્દેશ રાખી આતંકી હુમલાની તૈયારી કરી રહેલા બે આરોપીઓને ગુજરાત ATSએ ઝડપી લીધા છે. સિદ્ધપુરનો ઇરફાન પઠાણ અને મુંબઈનો મુરશીદ નામના આ બંને યુવાનો સોશિયલ મીડિયા દ્વારા કટ્ટર વિચારો ફેલાવવાના પ્રયાસમાં સક્રિય હતા.
સોશિયલ મીડિયા દ્વારા કટ્ટરતા ફેલાવવાનો પ્રયાસ
તપાસ દરમિયાન સામે આવ્યું છે કે આરોપીઓ પાકિસ્તાની કટ્ટરપંથી સંગઠનો તેમજ સિરિયાના ISIS સહિતના સંગઠનોને ફોલો કરતા હતા. તેઓ આવા સંગઠનોના વીડિયો અને મેસેજીસ વિવિધ વોટ્સએપ ગ્રુપમાં શેર કરીને યુવાનોને પ્રભાવિત કરવાનો પ્રયાસ કરી રહ્યા હતા.
12-13 વોટ્સએપ ગ્રુપ દ્વારા નેટવર્ક તૈયાર
બંને આરોપીઓએ 12થી 13 સભ્યો ધરાવતા અનેક વોટ્સએપ ગ્રુપ બનાવ્યા હતા, જેમાં કટ્ટર માનસિકતા ધરાવતા લોકોને જોડવામાં આવ્યા હતા. ATSને આરોપીઓના મોબાઇલમાંથી આ તમામ ગ્રુપ અને તેના સભ્યોની મહત્વપૂર્ણ માહિતી મળી છે. હાલમાં તમામ સભ્યોની ઓળખ અને તપાસ કરવામાં આવી રહી છે.
નેતાઓ અને RSSને નિશાન બનાવવાનો પ્લાન
તપાસમાં બહાર આવ્યું છે કે આ ગ્રુપમાં દેશના ચોક્કસ નેતાઓ અને RSS સાથે જોડાયેલા લોકો પર હુમલા કરવાની વાતો કરવામાં આવી રહી હતી. સાથે જ દેશ વિરુદ્ધ યુદ્ધ જેવી પ્રવૃત્તિઓને પ્રોત્સાહન આપતું વિવાદાસ્પદ સામગ્રી પણ શેર કરવામાં આવી હતી.
ફંડિંગ અને હથિયાર મેળવવાની કોશિશ
ATS મુજબ, બંને આરોપીઓ દેશભરમાં સમાન વિચારધારા ધરાવતા યુવાનોને એકત્રિત કરી મોટી ઘટનાને અંજામ આપવાની યોજના બનાવી રહ્યા હતા. તેઓ ફંડિંગ મેળવવા અને હથિયાર એકત્રિત કરવા માટે પણ પ્રયત્નશીલ હતા. હાલ તપાસ ચાલી રહી છે કે આ દિશામાં તેમણે કેટલો આગળ વધ્યો હતો.
સોશિયલ મીડિયા પર એજન્સીઓની ખાસ નજર
આ ઘટનાના પગલે ATS સહિત તમામ સુરક્ષા એજન્સીઓ સોશિયલ મીડિયાના તમામ પ્લેટફોર્મ પર ખાસ નજર રાખી રહી છે. તપાસ દરમિયાન હજુ વધુ ચોંકાવનારી વિગતો સામે આવવાની શક્યતા વ્યક્ત કરવામાં આવી રહી છે.
તમામ લેટેસ્ટ ન્યૂઝના અપડેટ્સ સીધા તમારા મોબાઈલ પર મેળવવા માટે, નીચે આપેલા બટન પર ક્લિક કરીને અમારા વોટ્સએપ ગ્રુપમાં જોડાઓ.
Join WhatsApp Group
Leave feedback about this