અમદાવાદ એરપોર્ટ પર 4 કરોડથી વધુનું સોનું ઝડપાયું: ફ્લાઈટના ટોઇલેટના સ્પીકરમાં છુપાવ્યા હતા 24 ગોલ્ડ બિસ્કિટ, દાણચોરીની નવી તરકીબનો પર્દાફાશ

અમદાવાદના સરદાર વલ્લભભાઈ પટેલ આંતરરાષ્ટ્રીય એરપોર્ટ પર કસ્ટમ વિભાગે મોટી કાર્યવાહી હાથ ધરીને અંદાજે ₹4.26 કરોડની કિંમતનું સોનું જપ્ત કર્યું છે. દુબઈથી આવેલી ઇન્ડિગોની ફ્લાઇટમાં દાણચોરોએ સોનું છુપાવવા માટે અપનાવેલી નવી મોડસ ઓપરેન્ડી સામે આવતાં કસ્ટમ અધિકારીઓ પણ ચોંકી ઉઠ્યા હતા.

ગુપ્ત બાતમીના આધારે હાથ ધરાયેલી તપાસ દરમિયાન ફ્લાઇટના આગળના લેવેટરી (ટોઇલેટ) વિસ્તારમાં આવેલા સ્પીકર બોક્સની અંદર કાળા પ્લાસ્ટિક ટેપથી લપેટેલા બે શંકાસ્પદ પાઉચ મળી આવ્યા હતા. તપાસ કરતાં તેમાંથી 24 વિદેશી મૂળના સોનાના બિસ્કિટ મળી આવ્યા હતા.

સ્પીકર બોક્સમાં સંતાડ્યું હતું કરોડોનું સોનું

12 જૂને દુબઈથી અમદાવાદ આવેલી ઇન્ડિગો ફ્લાઇટ નંબર 6E-1478ની તપાસ દરમિયાન કસ્ટમ અધિકારીઓએ એરક્રાફ્ટ એન્જિનિયરોની મદદથી વિમાનના ટોઇલેટમાં આવેલા સ્પીકર બોક્સનું નિરીક્ષણ કર્યું હતું. આ દરમિયાન સ્પીકરની અંદર કાળા ટેપથી સારી રીતે છુપાવવામાં આવેલા બે પાઉચ મળી આવ્યા હતા.

જ્યારે પાઉચ ખોલવામાં આવ્યા ત્યારે તેમાં 999.0 શુદ્ધતા ધરાવતા 24 કેરેટના 24 સોનાના બિસ્કિટ મળી આવ્યા હતા. જપ્ત કરાયેલા સોનાનું કુલ વજન 2,799.3 ગ્રામ હોવાનું જાણવા મળ્યું છે.

બજાર કિંમત ₹4.26 કરોડથી વધુ

કસ્ટમ વિભાગના જણાવ્યા અનુસાર જપ્ત કરાયેલા સોનાની સ્થાનિક બજારમાં અંદાજિત કિંમત ₹4,26,89,325 જેટલી થાય છે. આટલી મોટી માત્રામાં સોનું વિમાનની અંદર ગુપ્ત રીતે સંતાડવામાં આવ્યું હોવાને કારણે દાણચોરીના આંતરરાષ્ટ્રીય નેટવર્કની સંડોવણી હોવાની પણ આશંકા વ્યક્ત કરવામાં આવી રહી છે.

કોઈએ માલિકીનો દાવો કર્યો નહીં

કસ્ટમ અધિકારીઓએ જણાવ્યું કે સોનાની કાયદેસર માલિકી અંગે કોઈ વ્યક્તિ આગળ આવી નથી. જેના કારણે કસ્ટમ્સ એક્ટ-1962ની જોગવાઈઓ હેઠળ સમગ્ર જથ્થાને ‘અનક્લેમ્ડ ગૂડ્સ’ તરીકે જપ્ત કરવામાં આવ્યો છે.

અધિકારીઓના મતે સોનાને ભારતમાં ગેરકાયદેસર રીતે ઘૂસાડવાના ઇરાદાથી વિમાનના સ્પીકર બોક્સમાં છુપાવવામાં આવ્યું હતું. આ પદ્ધતિ દર્શાવે છે કે દાણચોરો હવે મુસાફરોના શરીર કે સામાનને બદલે એરક્રાફ્ટના વિવિધ ભાગોનો ઉપયોગ કરીને કસ્ટમ્સની નજરથી બચવાનો પ્રયાસ કરી રહ્યા છે.

અમદાવાદ એરપોર્ટ પર વધી રહ્યા છે દાણચોરીના પ્રયાસો

છેલ્લા કેટલાક સમયથી અમદાવાદ એરપોર્ટ પર સોનાની દાણચોરીના અનેક કિસ્સાઓ સામે આવી રહ્યા છે. માત્ર એક દિવસ અગાઉ જ કસ્ટમ વિભાગે 60 લાખ રૂપિયાથી વધુ કિંમતના સોનાના હૂક સાથે એક મુસાફરને ઝડપી પાડ્યો હતો.

આ ઉપરાંત થોડા સમય પહેલા કુઆલાલમ્પુરથી આવેલી એક મહિલા મુસાફર પાસેથી 83 લાખ રૂપિયાથી વધુ કિંમતનું સોનું જપ્ત કરવામાં આવ્યું હતું. મહિલાએ પોતાના ગુપ્ત અંગમાં સોનાની પેસ્ટ ભરેલી કેપ્સ્યુલ છુપાવી હતી.

CCTV અને ટેક્નિકલ તપાસ શરૂ

હાલ કસ્ટમ વિભાગે એરપોર્ટ અને વિમાનના CCTV ફૂટેજની તપાસ શરૂ કરી છે. કોણે સોનું સ્પીકર બોક્સમાં છુપાવ્યું, તે ક્યારે રાખવામાં આવ્યું અને તેનો રિસીવર કોણ હતો તે સહિતના મુદ્દાઓ પર તપાસ ચાલી રહી છે.

કસ્ટમ્સ એર ઇન્ટેલિજન્સ યુનિટ (AIU) હવે સમગ્ર ઘટનાના મૂળ સુધી પહોંચવા માટે એરલાઇન સ્ટાફ, ગ્રાઉન્ડ હેન્ડલિંગ કર્મચારીઓ અને સંભવિત સ્મગલિંગ નેટવર્કના કનેક્શનોની પણ તપાસ કરી રહી છે.

આ ઘટનાએ ફરી એકવાર સ્પષ્ટ કર્યું છે કે સોનાની દાણચોરીમાં સંડોવાયેલા તત્વો સતત નવી-નવી તરકીબો અપનાવી રહ્યા છે, પરંતુ કસ્ટમ વિભાગની સતર્કતા અને ટેક્નિકલ મોનિટરિંગના કારણે તેમના પ્રયાસો નિષ્ફળ સાબિત થઈ રહ્યા છે.