ચીનમાં ટ્રમ્પ-જિનપિંગની ઐતિહાસિક મુલાકાત: જિનપિંગ બોલ્યા- અમેરિકા-ચીન ભાગીદાર બને, હરીફ નહીં; ટ્રમ્પે કહ્યું- તમારા મિત્ર બનવું સન્માનની વાત

અમેરિકાના રાષ્ટ્રપતિ Donald Trump અને ચીનના રાષ્ટ્રપતિ Xi Jinping વચ્ચે ગુરુવારે બેઇજિંગમાં મહત્વપૂર્ણ શિખર બેઠક યોજાઈ હતી. બેઇજિંગના Great Hall of the People ખાતે જિનપિંગે ટ્રમ્પનું ભવ્ય સ્વાગત કર્યું હતું. ટ્રમ્પને ગાર્ડ ઓફ ઓનર આપવામાં આવ્યું અને બંને નેતાઓએ ઉષ્માભેર હાથ મિલાવ્યા હતા. દુનિયાભરમાં આ બેઠક પર નજર રાખવામાં આવી રહી છે, કારણ કે અમેરિકા અને ચીન વચ્ચે છેલ્લા કેટલાક વર્ષોથી વેપાર, ટેકનોલોજી અને તાઇવાન મુદ્દે તણાવ ચાલી રહ્યો છે.

બેઠકની શરૂઆતમાં જિનપિંગે કહ્યું કે દુનિયા ઝડપથી બદલાઈ રહી છે અને અમેરિકા-ચીન સંબંધો વૈશ્વિક સ્થિરતા માટે અત્યંત મહત્વપૂર્ણ છે. તેમણે ભારપૂર્વક કહ્યું કે બંને દેશોએ “હરીફ નહીં, પરંતુ ભાગીદાર” બનવું જોઈએ. જિનપિંગે ઉમેર્યું કે અમેરિકા અને ચીન સાથે મળીને વૈશ્વિક પડકારોનો સામનો કરી શકે છે અને દુનિયાને વધુ સ્થિરતા આપી શકે છે.

જવાબમાં ટ્રમ્પે જિનપિંગની પ્રશંસા કરતા કહ્યું કે “તમારા મિત્ર બનવું એ સન્માનની વાત છે.” ટ્રમ્પે વિશ્વાસ વ્યક્ત કર્યો કે અમેરિકા અને ચીન વચ્ચેના સંબંધો હવે પહેલા કરતા વધુ સારા બનશે. તેમણે કહ્યું કે તેઓ વિશ્વના અગ્રણી અમેરિકન ઉદ્યોગપતિઓને સાથે લઈને ચીન આવ્યા છે, જે બંને દેશો વચ્ચેના વેપાર અને રોકાણ સંબંધોને વધુ મજબૂત બનાવશે.

મસ્ક, ટિમ કૂક અને Nvidia CEO પણ પ્રતિનિધિમંડળમાં સામેલ

ટ્રમ્પના પ્રતિનિધિમંડળમાં Elon Musk, Tim Cook અને Jensen Huang સહિત અનેક મોટા અમેરિકન ઉદ્યોગપતિઓ સામેલ થયા હતા. અહેવાલો મુજબ Nvidiaના CEO જેન્સેન હુઆંગને છેલ્લી ઘડીએ ટ્રમ્પે વ્યક્તિગત રીતે પ્રવાસમાં જોડાવા આમંત્રણ આપ્યું હતું. આથી AI ચિપ્સ અને ટેકનોલોજી સહકાર મુદ્દે મહત્વપૂર્ણ ચર્ચા થવાની અટકળો તેજ બની છે.

₹9 લાખ કરોડની Boeing ડીલ ચર્ચાના કેન્દ્રમાં

આ મુલાકાતની સૌથી મોટી ચર્ચા Boeing સાથે સંભવિત વિશાળ વિમાન ખરીદી કરારને લઈને છે. અહેવાલો અનુસાર ચીન લગભગ ₹9 લાખ કરોડના વિમાનો ખરીદવા માટે Boeing સાથે ડીલ કરી શકે છે. જો આ કરાર થાય છે, તો તે દુનિયાની સૌથી મોટી એવિએશન ડીલ્સમાં સામેલ થઈ શકે છે.

વેપાર યુદ્ધ અને તાઇવાન મુદ્દે પણ ચર્ચા

બેઠક દરમિયાન વેપાર, ટેરિફ, સેમિકન્ડક્ટર, આર્ટિફિશિયલ ઇન્ટેલિજન્સ (AI), રેયર અર્થ મિનરલ્સ અને તાઇવાન જેવા સંવેદનશીલ મુદ્દાઓ પર ચર્ચા થઈ રહી છે. જિનપિંગે સ્પષ્ટ ચેતવણી આપી કે જો તાઇવાન મુદ્દાને યોગ્ય રીતે હેન્ડલ કરવામાં નહીં આવે તો અમેરિકા-ચીન સંબંધો “ખતરનાક તબક્કે” પહોંચી શકે છે.

જિનપિંગે ટ્રેડ વોર મુદ્દે પણ કહ્યું કે “ટ્રેડ વોરમાં કોઈ વિજેતા હોતો નથી.” તેમણે બંને દેશોને સહકાર અને પરસ્પર લાભના માર્ગે આગળ વધવા અપીલ કરી.

બાળકો દ્વારા ટ્રમ્પનું ભવ્ય સ્વાગત

ટ્રમ્પના બેઇજિંગ પહોંચતા જ એરપોર્ટ પર લગભગ 300 બાળકો વાદળી અને સફેદ યુનિફોર્મમાં સ્વાગત માટે હાજર રહ્યા હતા. બાળકો હાથમાં અમેરિકા અને ચીનના ધ્વજ લઈને ઉભા રહ્યા હતા. બાદમાં ગ્રેટ હોલ ઓફ ધ પીપલ ખાતે પણ બાળકોએ ફૂલોથી ટ્રમ્પનું અભિવાદન કર્યું હતું.

સ્ટેટ ડિનરનું આયોજન

ચીનના રાષ્ટ્રપતિ જિનપિંગ ટ્રમ્પના સન્માનમાં સ્ટેટ ડિનરનું આયોજન પણ કરશે. ચીનમાં આવા સ્ટેટ ડિનરને વિશેષ રાજદ્વારી સન્માન માનવામાં આવે છે. નિષ્ણાતોના મતે આ કાર્યક્રમ એ સંકેત છે કે ચીન અમેરિકા સાથેના સંબંધોને વ્યૂહાત્મક રીતે ખૂબ મહત્વ આપી રહ્યું છે.

નિર્ધારિત સમય કરતાં વધુ ચાલી બેઠક

બીબીસીના અહેવાલ મુજબ ટ્રમ્પ અને જિનપિંગ વચ્ચેની બેઠક નિર્ધારિત સમય કરતાં વધુ લાંબી ચાલી હતી. આથી બંને દેશો વચ્ચે અનેક મહત્વપૂર્ણ મુદ્દાઓ પર ગંભીર ચર્ચા થઈ રહી હોવાનો સંકેત મળી રહ્યો છે.