ટ્રમ્પે એક વર્ષમાં ₹18 હજાર કરોડનું ભંડોળ લીધું:બદલામાં કરોડોના ફાયદા આપ્યા; લિસ્ટમાં સુંદર પિચાઈ અને સત્ય નડેલા જેવા 6 ભારતીય મૂળના બિઝનેસમેન સામેલ

અમેરિકામાં ડોનાલ્ડ ટ્રમ્પ બીજી વખત રાષ્ટ્રપતિ બન્યા બાદ તેમની ટીમે રેકોર્ડ પ્રમાણમાં ભંડોળ એકત્ર કર્યું છે. ન્યૂયોર્ક ટાઈમ્સની તપાસ મુજબ, ચૂંટણી પછી ટ્રમ્પ અને તેમના નજીકના સાથીઓએ અલગ–અલગ ફંડ અને યોજનાઓ મારફતે લગભગ 2 અબજ ડોલર (અંદાજે ₹18 હજાર કરોડ) એકત્ર કર્યા છે, જે તેમની ચૂંટણી પ્રચાર દરમિયાન એકત્ર થયેલી રકમ કરતાં પણ વધુ છે.

ટાઈમ્સે સરકારી દસ્તાવેજો, ફંડિંગ રેકોર્ડ્સ અને અનેક સ્ત્રોતો સાથે વાતચીત કરીને ખુલાસો કર્યો છે કે ઓછામાં ઓછા 346 મોટા દાતાઓ એવા છે, જેમણે દરેકે 2.5 લાખ ડોલર કે તેથી વધુનું દાન આપ્યું છે. માત્ર આ દાતાઓ પાસેથી જ 500 મિલિયન ડોલરથી વધુની રકમ આવી હોવાનું જાણવા મળ્યું છે.

ફાયદા મેળવનારા દાતાઓમાં 6 ભારતીય મૂળના બિઝનેસમેન
તપાસમાં ખુલ્યું છે કે આશરે 200 દાતાઓ એવા છે, જેમને અથવા જેમના બિઝનેસને ટ્રમ્પ સરકારના નિર્ણયોથી સીધો કે આડકતરો ફાયદો થયો. આ યાદીમાં સુંદર પિચાઈ અને સત્ય નડેલા સહિત 6 ભારતીય મૂળના ઉદ્યોગપતિઓના નામો પણ સામેલ હોવાનું કહેવાય છે.

ભારતીય મૂળના બિઝનેસમેનો ને મળેલા ફાયદા:

ફાયદાઓમાં રાષ્ટ્રપતિ માફી, ચાલુ કેસો બંધ થવા, મોટા સરકારી કોન્ટ્રાક્ટ, વ્હાઇટ હાઉસ સુધી સીધી પહોંચ અથવા સરકારમાં મહત્વના પદો મળવાનું સામેલ છે. રિપોર્ટમાં કહેવામાં આવ્યું છે કે પૈસા અને ફાયદા વચ્ચે સીધી ડીલ સાબિત કરવી મુશ્કેલ છે, પરંતુ આ સંબંધ અનેક સવાલો ઊભા કરે છે.

MAGA Inc.થી લઈને શપથ સમારોહ સુધી ભંડોળના અનેક રસ્તા
ટ્રમ્પની ટીમે ભંડોળ એકત્ર કરવા માટે અનેક પ્લેટફોર્મ બનાવ્યા હતા. તેમાં સૌથી મોટું MAGA Inc., એક સુપર PAC છે, જેણે નવેમ્બર 2024થી જૂન 2025 વચ્ચે આશરે 200 મિલિયન ડોલર એકત્ર કર્યા.

આ ઉપરાંત, ટ્રમ્પના શપથ ગ્રહણ સમારોહ માટેની કમિટીએ 240 મિલિયન ડોલર ભેગા કર્યા, જે અમેરિકાના ઇતિહાસમાં સૌથી વધુ છે. વ્હાઇટ હાઉસમાં ભવ્ય બોલરૂમ બનાવવા માટે પણ ભંડોળ એકત્ર થયું છે, જેમાં ટ્રમ્પના દાવા મુજબ 350 મિલિયન ડોલર સુધીની રકમ સામેલ છે.

દાન આપનારાઓના નામ મોટેભાગે ગુપ્ત
ઘણા સંગઠનોમાં દાતાઓના નામ જાહેર કરવાની ફરજ ન હોવાથી આખી વ્યવસ્થા મોટાભાગે ગુપ્ત રહી છે. રિપોર્ટ અનુસાર, ટ્રમ્પ પોતે નિયમિત રીતે જાણતા રહે છે કે કોણ કેટલું દાન આપી રહ્યું છે અને ઘણા લોબીસ્ટ પોતાના ક્લાયન્ટ્સને સલાહ આપે છે કે ટ્રમ્પ સુધી પહોંચ માટે આ સંગઠનોને દાન કરવું ફાયદાકારક હોઈ શકે.

કોન્ટ્રાક્ટ, માફી અને રાજદૂત પદ સુધી પહોંચ
રિપોર્ટમાં એવા અનેક કિસ્સાઓ દર્શાવવામાં આવ્યા છે, જેમાં દાન બાદ દાતાઓને સરકારી કોન્ટ્રાક્ટ, નીતિમાં રાહત, રાજદૂત પદ અથવા કાનૂની રાહત મળી. ક્રિપ્ટોકરન્સી, ડિફેન્સ, ઓઇલ-ગેસ અને ટેક કંપનીઓને ખાસ ફાયદા મળ્યાના ઉદાહરણો પણ આપવામાં આવ્યા છે.

વ્હાઇટ હાઉસનો ઇનકાર, પરંતુ સવાલો યથાવત
વ્હાઇટ હાઉસે તમામ આરોપો નકારી કાઢતાં કહ્યું છે કે ટ્રમ્પ દેશહિતમાં નિર્ણય લે છે અને દાન આપનારાઓને શંકાની નજરે જોવી યોગ્ય નથી. જોકે ન્યૂયોર્ક ટાઈમ્સના અહેવાલ મુજબ, આ ભંડોળ વ્યવસ્થા અમેરિકી રાજકારણમાં પારદર્શિતા અને નૈતિકતા અંગે ગંભીર ચર્ચા ઊભી કરી રહી છે.

આગામી સમયમાં પણ ટ્રમ્પની ટીમ વધુ ભંડોળ એકત્ર કરવાની તૈયારીમાં છે, જેમાં રાષ્ટ્રપતિ લાઈબ્રેરી અને ‘ફ્રીડમ 250’ જેવા નવા અભિયાનો માટે કરોડો ડોલર એકત્ર કરવાની યોજના સામેલ છે.

whatsapp_cta]