T20 વર્લ્ડ કપ વોર્મ-અપ મેચોનું શેડ્યૂલ જાહેર, ભારત સાઉથ આફ્રિકા સામે ઉતરશે; ઇન્ડિયા A ટીમની પણ જાહેરાત

T20 વર્લ્ડ કપની તૈયારીઓ હવે અંતિમ તબક્કામાં પહોંચી ગઈ છે. ICC દ્વારા વર્લ્ડ કપ પહેલાં યોજાનારી વોર્મ-અપ મેચોનું શેડ્યૂલ જાહેર કરવામાં આવ્યું છે. આ વોર્મ-અપ મેચો 2 થી 6 ફેબ્રુઆરી દરમિયાન રમાશે અને કુલ 7 અલગ-અલગ મેદાનો પર યોજાશે. ખાસ વાત એ છે કે ઇંગ્લેન્ડની ટીમ આ વોર્મ-અપ મેચોમાં ભાગ નહીં લે, જ્યારે ઓસ્ટ્રેલિયા, ન્યુઝીલેન્ડ, પાકિસ્તાન, સાઉથ આફ્રિકા અને વેસ્ટ ઇન્ડીઝ જેવી મોટી ટીમો એક-એક વોર્મ-અપ મેચ રમશે.

ભારતીય ટીમ પણ એક વોર્મ-અપ મેચ રમશે. ટીમ ઇન્ડિયા 4 ફેબ્રુઆરીએ સાઉથ આફ્રિકા સામે મુંબઈના DY પાટીલ સ્ટેડિયમમાં મેદાને ઉતરશે. બાકીની બે વોર્મ-અપ મેચોમાં ઇન્ડિયા A ટીમ રમશે, જે યુવા ખેલાડીઓ માટે મહત્વની તક સાબિત થશે.

BCCIએ ઇન્ડિયા A ટીમ જાહેર કરી

BCCIએ વોર્મ-અપ મેચો માટે ઇન્ડિયા A ટીમની જાહેરાત કરી દીધી છે. ટીમની કમાન આયુષ બડોનીને સોંપવામાં આવી છે. આ ટીમમાં તિલક વર્માનો પણ સમાવેશ કરવામાં આવ્યો છે. તિલક વર્મા વિજય હઝારે ટ્રોફી દરમિયાન ઇજાગ્રસ્ત થયા હતા અને હવે તેઓ ઓછામાં ઓછી એક વોર્મ-અપ મેચ રમીને પોતાની ફિટનેસ સાબિત કરશે.

ઇન્ડિયા A ટીમ:
આયુષ બડોની (કેપ્ટન), નમન ધીર, આશુતોષ શર્મા, પ્રિયાંશ આર્ય, એન. જગદીશન (વિકેટકીપર), તિલક વર્મા, રિયાન પરાગ, માનવ સુથાર, અશોક શર્મા, ઉર્વિલ પટેલ (વિકેટકીપર), ગુરજપનીત સિંહ, વિપ્રાજ નિગમ, રવિ બિશ્નોઈ, ખલીલ અહેમદ અને મયંક યાદવ.

અફઘાનિસ્તાન-સ્કોટલેન્ડ મેચથી વોર્મ-અપની શરૂઆત

વોર્મ-અપ મેચોની શરૂઆત અફઘાનિસ્તાન અને સ્કોટલેન્ડ વચ્ચેની મેચથી થશે. આ મેચ બેંગલુરુ સ્થિત BCCIના સેન્ટર ઓફ એક્સેલન્સના મેદાન-1 પર રમાશે. તે જ દિવસે મુંબઈના DY પાટીલ સ્ટેડિયમમાં ઇન્ડિયા A ટીમ યુનાઇટેડ સ્ટેટ્સ ઑફ અમેરિકા (USA) સામે ટકરાશે. ઉપરાંત, પ્રથમ દિવસે કેનેડા અને ઇટાલીની મેચ ચેન્નઈમાં યોજાશે.

7 ફેબ્રુઆરીથી T20 વર્લ્ડ કપનો પ્રારંભ

T20 વર્લ્ડ કપની શરૂઆત 7 ફેબ્રુઆરીથી થશે. પ્રથમ મેચ કોલંબોમાં નેધરલેન્ડ અને પાકિસ્તાન વચ્ચે રમાશે. ભારતીય ટીમ પોતાની પ્રથમ મેચ 7 ફેબ્રુઆરીએ અમેરિકા સામે મુંબઈમાં રમશે. ટૂર્નામેન્ટની ફાઇનલ મેચ 8 માર્ચે યોજાશે, જેનું સ્થળ પાકિસ્તાન ફાઇનલમાં પહોંચે છે કે નહીં તેના આધારે નક્કી થશે.

વોર્મ-અપ મેચો ક્યાં જોઈ શકાય?

તમામ વોર્મ-અપ મેચોની વીડિયો હાઇલાઇટ્સ ICCના ડિજિટલ પ્લેટફોર્મ્સ પર ઉપલબ્ધ રહેશે. ભારત અને સાઉથ આફ્રિકા વચ્ચેની વોર્મ-અપ મેચનું લાઈવ સ્ટ્રીમિંગ સ્ટાર સ્પોર્ટ્સ અને જિયો હોટસ્ટાર પર થશે. આ ઉપરાંત, ચાહકો ICC.tv પર પણ આ મેચો મફતમાં લાઈવ જોઈ શકશે.