સુરતનો ‘મોલ ઇન ગાર્ડન’ બનશે શહેરની નવી ઓળખ: 6 માળના મોલમાં 4 લાખ છોડ, જાપાનનાં ફૂલો સાથે કાશ્મીર જેવી અનુભૂતિ

તમે અત્યાર સુધી કાચ અને સિમેન્ટના મોલ જોયા હશે, પરંતુ સુરતના સિટીલાઇટ વિસ્તારમાં આકાર પામી રહેલું આ પ્રોજેક્ટ જોશો તો તમારી આંખો પહોળી થઈ જશે. આ કોઈ સામાન્ય શોપિંગ સેન્ટર નથી, પરંતુ કુદરત અને આધુનિકતાનું અદ્ભુત સંગમ છે. સુરતમાં પહેલીવાર ‘ગાર્ડન ઇન મોલ’ નહીં, પરંતુ ‘મોલ ઇન ગાર્ડન’નો અનોખો કન્સેપ્ટ અમલમાં આવી રહ્યો છે, જે સમગ્ર ગુજરાતમાં ચર્ચાનો વિષય બન્યો છે.

જાપાનનાં ફૂલો અને સુરતનું એન્જિનિયરિંગ

આ મોલની સૌથી ચોંકાવનારી ખાસિયત એ છે કે અહીં 4 લાખથી વધુ છોડનું વાવેતર કરવામાં આવ્યું છે. ‘વેલી ઓફ ફ્લાવર્સ’ માટે ખાસ જાપાનથી રંગબેરંગી ફૂલોના છોડ મગાવવામાં આવ્યા છે. મોલમાં પ્રવેશતા જ એવું લાગશે કે તમે સુરતની ગરમીમાંથી સીધા કાશ્મીરની કોઈ ઠંડી વાદીમાં આવી પહોંચ્યા છો.

હાઇ-ટેક ટેક્નોલોજીથી ટેમ્પરેચર અને હ્યુમિડિટી કંટ્રોલ

6 માળના આ મોલમાં પગથિયાં આકારના સ્ટેપ ગાર્ડન બનાવાયા છે, જ્યાં 20થી વધુ રંગોના ફૂલો ખીલશે. ઇન્ડોર અને ટ્રોપિકલ ગાર્ડન માટે ખાસ હાઈ-ટેક મશીનો દ્વારા ટેમ્પરેચર અને હ્યુમિડિટી કંટ્રોલ કરવામાં આવે છે, જેથી વિદેશી છોડને પણ અનુકૂળ વાતાવરણ મળી રહે. ખાસ વાત એ છે કે બેઝમેન્ટ અને પાર્કિંગ એરિયામાં પણ કુદરતી છોડ રાખવામાં આવ્યા છે.

શોપિંગ સાથે કુદરતનો અનુભવ

આ મોલમાં 4 માળ શોપિંગ માટે અને 2 માળ ફૂડ તથા મનોરંજન માટે નિર્ધારિત છે. જોકે અહીંનું મુખ્ય આકર્ષણ 6 અલગ-અલગ પ્રકારના ગાર્ડન છે—ઓર્કિડ ગાર્ડનથી લઈને ટેરેસ ગાર્ડન સુધી. કોંક્રીટના જંગલમાં આ મોલ એક ‘ગ્રીન આઇલેન્ડ’ સમાન બનશે.

‘આશીર્વાદ હાઇ સ્ટ્રીટ’માં કાશ્મીર જેવી અનુભૂતિ

આ પ્રોજેક્ટ સુરતના ઇતિહાસમાં એક અનોખું પ્રકરણ બનશે. હવે સુરતીઓને વીકએન્ડમાં કુદરતનો આનંદ માણવા માટે દૂર જવાની જરૂર નહીં રહે, કારણ કે ‘આશીર્વાદ હાઇ સ્ટ્રીટ’માં જ કાશ્મીર જેવી અનુભૂતિ મળશે.

મોલના સંચાલક મહેન્દ્ર રાઠી શું કહે છે?

મોલના સંચાલક મહેન્દ્ર રાઠીએ જણાવ્યું કે ભટાર, ઘોડદોડ રોડ અને વેસુ વચ્ચે આવેલા સિટીલાઇટ વિસ્તારમાં ‘આશીર્વાદ હાઇ સ્ટ્રીટ’ આકાર લઈ રહ્યો છે. લોકો અત્યાર સુધી મોલની અંદર ગાર્ડન જોયા છે, પરંતુ અહીં ગાર્ડનની અંદર મોલ બનાવવામાં આવ્યો છે—એ જ આ પ્રોજેક્ટની સૌથી મોટી વિશેષતા છે.

4 લાખ છોડ માટે 100 માળી, 6 વર્ષથી તૈયારી

પ્રકૃતિપ્રેમી એમ.ડી. ગોપાલભાઈના વિઝનથી તૈયાર થયેલા આ ગ્રીન બિલ્ડિંગની જાળવણી માટે 200 લોકોની ટીમ કામ કરી રહી છે. તેમાં 100 માળી, 50 સિક્યોરિટી અને 50 હાઉસકીપિંગ સ્ટાફ સામેલ છે. છેલ્લા 6 વર્ષથી આ પ્રોજેક્ટ પર સતત મહેનત ચાલી રહી છે.

પર્યાવરણ માટે નવી ઓળખ

પાર્કિંગ અને બેઝમેન્ટ જેવા વિસ્તારોમાં પણ કુદરતી છોડનું વિશાળ કલેક્શન રાખવામાં આવ્યું છે. આવનારા સમયમાં આ મોલ સુરત માટે પર્યાવરણલક્ષી અને આર્કિટેક્ચરલ ઓળખ બનશે.