પ્રયાગરાજ માઘ મેળામાં શંકરાચાર્ય અવિમુક્તેશ્વરાનંદનું ધરણું ચાલુ, 24 કલાકથી અન્ન-જળનો ત્યાગ

પ્રયાગરાજ માઘ મેળામાં શંકરાચાર્ય સ્વામી અવિમુક્તેશ્વરાનંદનું ધરણું હજુ પણ ચાલુ છે. પાલખી (રથયાત્રા) રોકવાના વિરોધમાં તેઓ તે જ સ્થળે ધરણાં પર બેઠા છે, જ્યાં પોલીસે તેમને ઉતારી દીધા હતા. શંકરાચાર્યે આખી રાત કડક ઠંડીમાં ફૂટપાથ પર પસાર કરી અને છેલ્લા 24 કલાકથી અન્નનો એક દાણો પણ ખાધો નથી. તેમણે પાણી પણ પીધું નથી.

સોમવારે બપોરે યોજાયેલી પ્રેસ કોન્ફરન્સમાં શંકરાચાર્યે સ્પષ્ટ શબ્દોમાં કહ્યું કે, જ્યાં સુધી પ્રશાસન આવીને માફી નહીં માંગે અને સન્માન સાથે તેમને ગંગાસ્નાન માટે લઈ નહીં જાય, ત્યાં સુધી તેઓ પોતાના આશ્રમમાં પ્રવેશ નહીં કરે. તેમણે કહ્યું, “હું પ્રયાગરાજના દરેક મેળામાં આવવાનો સંકલ્પ લઉં છું, પરંતુ ક્યારેય કેમ્પમાં નહીં રહીશ. હું ફૂટપાથ પર જ રહીશ.”

શંકરાચાર્યે જણાવ્યું કે ઇતિહાસમાં હંમેશા શંકરાચાર્ય પાલખીમાં જ સ્નાન કરવા ગયા છે. દર વર્ષે એક જ પરંપરા અનુસરવામાં આવી છે. છતાં આ વખતે પોલીસ પ્રશાસને પાલખી રોકી, જે તેમને અસ્વીકાર્ય છે.

મૌની અમાસના દિવસે શું થયું?

રવિવારે મૌની અમાવાસ્યાના દિવસે શંકરાચાર્ય સ્વામી અવિમુક્તેશ્વરાનંદ સ્નાન માટે સંગમ તરફ જઈ રહ્યા હતા. ત્યારે પોલીસે તેમની પાલખી રોકી દીધી અને તેમને પગપાળા જવા કહ્યું. આ દરમિયાન શિષ્યો અને પોલીસ વચ્ચે ધક્કામુક્કી થઈ. ઘણા શિષ્યોને અટકાયતમાં લેવામાં આવ્યા અને એક સાધુ સાથે મારપીટની પણ ઘટના બની.

આ ઘટનાથી નારાજ શંકરાચાર્યે સ્નાન કર્યા વગર જ પોતાની પાલખી સાથે શિબિર પર પાછા આવી ધરણું શરૂ કરી દીધું. તેમની પાલખીનું છત્ર પણ તૂટી ગયું હતું.

CCTV ફૂટેજ સામે આવ્યા

મૌની અમાવાસ્યાના દિવસે થયેલી અંધાધૂંધીના CCTV ફૂટેજ પણ સામે આવ્યા છે. વીડિયોમાં દેખાય છે કે પોલીસે રસ્તા પર બેરિકેડ લગાવ્યા હતા. સમર્થકોએ બેરિકેડ તોડી આગળ વધવાનો પ્રયાસ કર્યો, જેના કારણે પોલીસ અને સમર્થકો વચ્ચે ઝપાઝપી થઈ.

પ્રશાસનનો જવાબ

પ્રયાગરાજના DM મનીષ કુમાર વર્માએ કહ્યું કે, સ્વામી અવિમુક્તેશ્વરાનંદ મંજૂરી વિના પાલખી પર આવ્યા હતા અને તે સમયે સંગમ વિસ્તારમાં ભારે ભીડ હતી. તેમના સમર્થકોએ બેરિકેડ તોડ્યા અને પોલીસ સાથે ધક્કામુક્કી કરી, તેથી મામલાની તપાસ કરવામાં આવી રહી છે.

શંકરાચાર્યના કડક નિવેદન

શંકરાચાર્યે કહ્યું કે પોલીસ જે આરોપ લગાવી રહી છે, તે આધારવિહોણા છે. તેમણે કહ્યું, “જો અમે ઉદ્ધતાઈ કરી હોય તો CCTV બતાવો. પોલીસ પોતે અમને સંગમ સુધી લઈ જવાની વાત કરી હતી.”
તેમણે વધુમાં કહ્યું કે, “મા ગંગાને મળવાની મંજૂરી આપનારા લોકો કોણ છે?”

સંત સમાજનો સંદેશ

શંકરાચાર્યે જણાવ્યું કે 10 અને 11 માર્ચે દિલ્હીમાં સંતો એકજૂટ થઈને પોતાની તાકાત બતાવશે. તેમણે ગૌરક્ષા અને ધાર્મિક સન્માન માટે ચાલતી યાત્રા ચાલુ રાખવાનો સંકલ્પ પણ દોહરાવ્યો.

હાલ શંકરાચાર્ય અવિમુક્તેશ્વરાનંદ ફૂટપાથ પર જ ધરણાં પર બેઠા છે અને ત્યાં જ પૂજા-પાઠ કરી રહ્યા છે. તેમના સમર્થકો અને અનુયાયીઓ પણ સતત તેમની સાથે હાજર છે. પ્રશાસન તરફથી હજુ સુધી કોઈ અધિકારી તેમને મળવા આવ્યો નથી.

માઘ મેળામાં ચાલતું આ ધરણું હવે ધાર્મિક અને રાજકીય રીતે બંને દ્રષ્ટિએ મહત્વનું બની ગયું છે.