ઇન્ટરવ્યૂમાં ટ્રમ્પનો ગુસ્સો ફાટ્યો: મહિલા પત્રકાર સાથે ઉગ્ર દલીલ બાદ વચ્ચેથી ઊભા થઈ ચાલ્યા ગયા, મીડિયાને ગણાવ્યું ‘ભ્રષ્ટ’

અમેરિકાના રાષ્ટ્રપતિ ડોનાલ્ડ ટ્રમ્પનો વધુ એક વિવાદાસ્પદ ઇન્ટરવ્યૂ ચર્ચામાં આવ્યો છે. NBCના લોકપ્રિય કાર્યક્રમ ‘Meet the Press’ દરમિયાન ટ્રમ્પ અને એન્કર ક્રિસ્ટન વેલ્કર વચ્ચે તીખી બોલાચાલી થઈ હતી. ચર્ચા એટલી ઉગ્ર બની ગઈ કે ટ્રમ્પ ઇન્ટરવ્યૂ અધવચ્ચે જ છોડીને ઊભા થઈ ગયા અને મીડિયાને ‘નકલી, ગંદી અને ભ્રષ્ટ’ ગણાવ્યું.

વિસ્કોન્સિનના એક ખેતરમાં રેકોર્ડ કરાયેલા આ ઇન્ટરવ્યૂમાં શરૂઆતમાં ઈરાન યુદ્ધ, પરમાણુ હથિયારો અને અમેરિકાની વિદેશ નીતિ જેવા મુદ્દાઓ પર શાંતિપૂર્ણ ચર્ચા થઈ હતી. જોકે, વાત 2020ની અમેરિકી રાષ્ટ્રપતિ ચૂંટણી અને ચૂંટણીમાં ગેરરીતિના આરોપો સુધી પહોંચતા માહોલ ગરમાયો હતો.

ઈરાન યુદ્ધ અંગે ટ્રમ્પનો જવાબ

ઇન્ટરવ્યૂ દરમિયાન જ્યારે ટ્રમ્પને પૂછવામાં આવ્યું કે તેમણે અગાઉ અમેરિકાને વિદેશી યુદ્ધોથી દૂર રાખવાનું વચન આપ્યું હતું, તો હવે ઈરાન સાથેના સંઘર્ષને કેવી રીતે જોવે છે, ત્યારે ટ્રમ્પે જવાબ આપ્યો કે તેમણે ક્યારેય એવું કહ્યું નહોતું કે કોઈ યુદ્ધ નહીં થાય.

તેમણે કહ્યું, “જો હું ક્યારેય યુદ્ધ નહીં થાય એવું માનતો હોત તો દુનિયાની સૌથી મજબૂત સેના શા માટે બનાવતો? મને સતત ચાલતા યુદ્ધો પસંદ નથી, પરંતુ કેટલીક પરિસ્થિતિઓમાં કડક નિર્ણય લેવા પડે છે.”

‘એન્ટી-વેપનાઇઝેશન ઇનિશિયેટિવ’ પર શરૂ થઈ દલીલ

ચર્ચા દરમિયાન ક્રિસ્ટન વેલ્કરે ટ્રમ્પને તેમના પ્રસ્તાવિત 1.8 બિલિયન ડોલરના ‘એન્ટી-વેપનાઇઝેશન ઇનિશિયેટિવ’ વિશે પ્રશ્ન પૂછ્યો. આ ફંડ એવા લોકો માટે બનાવવામાં આવ્યું હોવાનું કહેવાય છે, જેઓ માને છે કે જો બાઈડેન પ્રશાસને તેમને અન્યાયપૂર્વક નિશાન બનાવ્યા હતા.

આ સવાલના જવાબમાં ટ્રમ્પે મીડિયા અને પૂર્વ રાષ્ટ્રપતિ જો બાઈડેન પર નિશાન સાધ્યું. તેમણે આરોપ લગાવ્યો કે મીડિયા અને બાઈડેન પ્રશાસને નિર્દોષ લોકોના જીવન બરબાદ કર્યા છે.

ચૂંટણીના આરોપો પર પુરાવા માંગતા ટ્રમ્પ ભડક્યા

જ્યારે એન્કર ક્રિસ્ટન વેલ્કરે ટ્રમ્પને 2020ની ચૂંટણીમાં ગેરરીતિના તેમના દાવા અંગે પુરાવા રજૂ કરવા કહ્યું, ત્યારે ટ્રમ્પનો ગુસ્સો ફાટી નીકળ્યો.

તેમણે દાવો કર્યો કે 2020ની ચૂંટણીમાં ગેરરીતિ થઈ હતી અને કેલિફોર્નિયામાં મતગણતરીની પ્રક્રિયા પણ સવાલો ઊભા કરે છે. જોકે, જ્યારે વેલ્કરે ફરી પુરાવા વિશે પૂછ્યું, ત્યારે ટ્રમ્પે મીડિયા પર સીધો હુમલો શરૂ કર્યો.

પત્રકારને કહ્યું- ‘તમે બેઈમાન અથવા મૂર્ખ છો’

ચર્ચા વધુ ઉગ્ર બનતાં ટ્રમ્પે NBC સહિત અન્ય મુખ્ય મીડિયા સંસ્થાઓની ટીકા કરી. તેમણે કહ્યું કે મીડિયા એકતરફી અને પક્ષપાતી છે.

વેલ્કરે પોતાને બેઈમાન ગણાવવાનો વિરોધ કરતાં કહ્યું કે તે માત્ર એક પત્રકાર તરીકે સવાલો પૂછી રહી છે. તેના જવાબમાં ટ્રમ્પે કહ્યું, “તમે કાં તો બેઈમાન છો અથવા તો મૂર્ખ છો.”

આ નિવેદન બાદ સ્ટુડિયોમાં થોડો સમય માટે તણાવપૂર્ણ વાતાવરણ સર્જાયું હતું.

ઇન્ટરવ્યૂ અધવચ્ચે છોડીને ચાલ્યા ગયા

વાતચીત દરમિયાન ટ્રમ્પે અચાનક માઇક હટાવી દીધો અને કહ્યું, “ચાલો, હવે આ અહીં જ પૂરું કરીએ. બહુ થઈ ગયું.”

એન્કર ક્રિસ્ટન વેલ્કરે તેમને રોકાવા અને ચર્ચા ચાલુ રાખવા વિનંતી કરી હતી, પરંતુ ટ્રમ્પે જવાબ આપ્યો કે તેમણે પૂરતો સમય આપ્યો છે અને મીડિયાએ પહેલા પોતાની વિશ્વસનીયતા સુધારવી જોઈએ.

ત્યારબાદ ટ્રમ્પ ખુરશી પરથી ઊભા થયા અને ઇન્ટરવ્યૂ અધવચ્ચે જ છોડી ચાલ્યા ગયા. આ સમગ્ર ઘટનાનો વીડિયો સોશિયલ મીડિયા પર ઝડપથી વાયરલ થયો હતો અને રાજકીય વર્તુળોમાં તેની ચર્ચા શરૂ થઈ ગઈ છે.

સોશિયલ મીડિયા પર ચર્ચા તેજ

ઘટના બાદ સોશિયલ મીડિયા પર લોકો બે ભાગમાં વહેંચાઈ ગયા છે. કેટલાક લોકો ટ્રમ્પના આક્રમક વલણને સમર્થન આપી રહ્યા છે, જ્યારે અન્ય લોકોનું કહેવું છે કે દેશના સર્વોચ્ચ પદ પર બેઠેલા નેતા પાસેથી વધુ સંયમિત વર્તનની અપેક્ષા રાખવામાં આવે છે.

આ ઇન્ટરવ્યૂ ફરી એકવાર અમેરિકામાં મીડિયા અને રાજકારણ વચ્ચેના વધતા તણાવને ઉજાગર કરતો કિસ્સો બની ગયો છે.