વડાપ્રધાન નરેન્દ્ર મોદીનો ફેસબુક પરથી હટાવવામાં આવેલો વીડિયો મેટાએ ફરીથી રિસ્ટોર કરી દીધો છે. કંપનીએ મંગળવારે સ્પષ્ટતા કરતા જણાવ્યું કે વીડિયો કોઈ નીતિભંગને કારણે નહીં પરંતુ ટેકનિકલ ખામીના કારણે ભૂલથી હટાવવામાં આવ્યો હતો. વીડિયો ફરી ઉપલબ્ધ થતાં સમગ્ર મામલે ચાલી રહેલી અટકળો પર વિરામ લાગ્યો છે.
આ વીડિયો વડાપ્રધાન મોદીએ 23 જુલાઈના રોજ સોશિયલ મીડિયા પર શેર કર્યો હતો. તેમાં તેમણે દેશના વિદ્યાર્થીઓ અને Gen-Z યુવાનોને સંબોધિત કરતાં પરીક્ષા પેપર લીક સામે સરકારની કાર્યવાહી અને પરીક્ષા વ્યવસ્થામાં સુધારા અંગે મહત્વપૂર્ણ સંદેશ આપ્યો હતો.
વીડિયો હટતા ઊભા થયા હતા સવાલો
વીડિયો થોડા સમય માટે ફેસબુક પર ઉપલબ્ધ ન રહેતાં સોશિયલ મીડિયા પર અનેક પ્રકારની ચર્ચાઓ શરૂ થઈ હતી. કેટલાક યુઝર્સને વીડિયો ખોલતા “This video isn’t available in India” જેવો સંદેશ જોવા મળ્યો હતો. ત્યારબાદ મેટાએ સ્પષ્ટતા કરી કે આ ટેકનિકલ સમસ્યાને કારણે થયું હતું અને સમસ્યા દૂર થતાં વીડિયો ફરી રિસ્ટોર કરવામાં આવ્યો છે.
MeitYએ મેટાના અધિકારીઓને બોલાવ્યાનો દાવો
ન્યૂઝ એજન્સી IANSના અહેવાલ મુજબ, ઇલેક્ટ્રોનિક્સ અને માહિતી પ્રૌદ્યોગિકી મંત્રાલય (MeitY)એ સમગ્ર ઘટનાને ગંભીરતાથી લીધી છે. સૂત્રોના જણાવ્યા અનુસાર, મેટાના ગ્લોબલ હેડ અને પબ્લિક પોલિસીના ગ્લોબલ હેડને પણ સ્પષ્ટતા માટે બોલાવવામાં આવ્યા છે. જોકે સરકાર તરફથી આ અંગે સત્તાવાર નિવેદન આવ્યું નથી.
વીડિયોમાં વિદ્યાર્થીઓને શું કહ્યું હતું?
23 જુલાઈની રાત્રે વડાપ્રધાન મોદીએ લગભગ 2 મિનિટ 56 સેકન્ડનો વીડિયો સંદેશ જાહેર કર્યો હતો. તેમાં તેમણે કહ્યું હતું કે પેપર લીક સામાન્ય ઘટના નથી પરંતુ લાખો વિદ્યાર્થીઓ અને તેમના પરિવાર માટે અત્યંત પીડાદાયક બાબત છે.
તેમણે જણાવ્યું હતું કે સરકારે છેલ્લા કેટલાક મહિનામાં અનેક આરોપીઓની ધરપકડ કરી છે અને વિદ્યાર્થીઓનું શૈક્ષણિક વર્ષ બગડે નહીં તે માટે ખૂબ ઓછા સમયમાં ફરીથી પરીક્ષા યોજવામાં આવી હતી. સાથે જ ભવિષ્યમાં આવી ઘટનાઓ અટકાવવા વધુ કડક વ્યવસ્થા લાવવાની ખાતરી પણ આપી હતી.
ફાસ્ટ ટ્રેક કોર્ટની પણ કરી હતી જાહેરાત
વિડિયોમાં વડાપ્રધાને જણાવ્યું હતું કે પેપર લીક જેવા કેસોમાં ઝડપથી ન્યાય મળે તે માટે ફાસ્ટ ટ્રેક કોર્ટની વ્યવસ્થા કરવાની સૂચના આપવામાં આવી છે. તેમણે ભારપૂર્વક કહ્યું કે સરકાર માત્ર ધરપકડથી સંતોષ માનવાની નથી પરંતુ પરીક્ષા પ્રણાલીને સંપૂર્ણપણે પારદર્શક અને સુરક્ષિત બનાવશે.
ત્યારબાદ વધુ બે વીડિયો પણ કર્યા હતા શેર
24 જુલાઈએ વડાપ્રધાન મોદીએ વધુ એક વીડિયો શેર કરીને લોકોનો આભાર વ્યક્ત કર્યો હતો. તેમણે જણાવ્યું કે પ્રથમ વીડિયોને મળેલા સકારાત્મક પ્રતિસાદ અને સૂચનો સરકાર માટે પ્રેરણારૂપ છે.
26 જુલાઈએ તેમણે ફરી વીડિયો સંદેશ જાહેર કરીને પરીક્ષા સુધારણા માટે હાઈપાવર ટાસ્ક ફોર્સની રચનાની જાહેરાત કરી હતી. આ ટાસ્ક ફોર્સના અધ્યક્ષ તરીકે ઇન્ફોસિસના સહ-સ્થાપક નંદન નીલેકણીની નિમણૂક કરવામાં આવી હોવાનું પણ જણાવ્યું હતું.
દિલ્હી પોલીસે સોશિયલ મીડિયા પ્લેટફોર્મને આપી હતી નોટિસ
આ દરમિયાન દિલ્હી પોલીસે જંતર-મંતર વિદ્યાર્થી આંદોલન અને 20 જુલાઈના સંસદ માર્ચ દરમિયાન વડાપ્રધાન અંગે કરવામાં આવેલી વાંધાજનક અને અપમાનજનક પોસ્ટ્સ તથા વીડિયોને હટાવવા માટે વિવિધ સોશિયલ મીડિયા પ્લેટફોર્મને નોટિસ પણ મોકલી હતી. પોલીસનું કહેવું હતું કે કેટલાક કન્ટેન્ટથી કાયદો અને વ્યવસ્થાની સ્થિતિ પર અસર પડી શકે છે.
મેટા વીડિયો કેવી રીતે હટાવે છે?
મેટા પોતાના પ્લેટફોર્મ પર અપલોડ થતા વીડિયોની દેખરેખ માટે પ્રથમ તબક્કામાં AI આધારિત સિસ્ટમનો ઉપયોગ કરે છે. જો કોઈ કન્ટેન્ટ કંપનીની કમ્યુનિટી ગાઇડલાઇનનું ઉલ્લંઘન કરતું હોવાનું લાગે તો તેને માનવીય મોડરેટર્સ દ્વારા સમીક્ષા કરવામાં આવે છે. જો સમીક્ષા દરમિયાન જાણવા મળે કે વીડિયો ભૂલથી હટાવવામાં આવ્યો હતો, તો તેને ફરીથી પ્લેટફોર્મ પર રિસ્ટોર કરવામાં આવે છે.
મેટાના જણાવ્યા મુજબ વડાપ્રધાન મોદીનો વીડિયો પણ આવી જ ટેકનિકલ ભૂલને કારણે હટાયો હતો અને તપાસ પૂર્ણ થયા બાદ તેને ફરીથી ઉપલબ્ધ કરવામાં આવ્યો છે.
તમામ લેટેસ્ટ ન્યૂઝના અપડેટ્સ સીધા તમારા મોબાઈલ પર મેળવવા માટે, નીચે આપેલા બટન પર ક્લિક કરીને અમારા વોટ્સએપ ગ્રુપમાં જોડાઓ.
Join WhatsApp Group
Leave feedback about this