આજથી બદલાયા 7 મોટા નિયમો: કોમર્શિયલ સિલિન્ડર ₹180 સુધી સસ્તો, પેટ્રોલ-ડીઝલના ભાવમાં ઘટાડો, પાસપોર્ટ મોંઘો અને ટ્રેનમાં બિનટિકિટ મુસાફરી પર બમણો દંડ

1 જુલાઈથી દેશભરમાં સામાન્ય લોકોના રોજિંદા જીવન અને ખિસ્સા પર સીધી અસર કરતા અનેક મહત્વના નિયમોમાં ફેરફાર થયા છે. કોમર્શિયલ LPG સિલિન્ડરના ભાવમાં સરેરાશ ₹180 સુધીનો ઘટાડો થયો છે, જ્યારે પ્રાઈવેટ ફ્યુઅલ કંપની નાયરા એનર્જીએ પેટ્રોલ પ્રતિ લિટર ₹5 અને ડીઝલ ₹3 સસ્તું કર્યું છે. બીજી તરફ પાસપોર્ટની ફીમાં વધારો થયો છે અને હવે ટ્રેનમાં ટિકિટ વગર મુસાફરી કરનારાઓને પહેલા કરતાં બમણો દંડ ભરવો પડશે.

જાણો 1 જુલાઈથી લાગુ થયેલા 7 મોટા ફેરફારો…

1. કોમર્શિયલ LPG સિલિન્ડર સરેરાશ ₹180 સુધી સસ્તો

સરકારી તેલ કંપનીઓએ 19 કિલોના કોમર્શિયલ LPG સિલિન્ડરના ભાવમાં સરેરાશ ₹180 સુધીનો ઘટાડો કર્યો છે. દિલ્હીમાં હવે આ સિલિન્ડર ₹2,930માં મળશે, જ્યારે અગાઉ તેની કિંમત ₹3,113.50 હતી.

મુખ્ય શહેરોમાં નવી કિંમતો:

• દિલ્હી: ₹2,930 (₹183.50નો ઘટાડો)
• કોલકાતા: ₹3,081.50 (₹174નો ઘટાડો)
• મુંબઈ: ₹2,885.50 (₹182નો ઘટાડો)
• ચેન્નઈ: ₹3,106 (₹177નો ઘટાડો)

જોકે, 14 કિલોના ઘરેલુ LPG સિલિન્ડરના ભાવમાં કોઈ ફેરફાર કરવામાં આવ્યો નથી.

અસર: હોટલ, રેસ્ટોરન્ટ, કેટરિંગ અને ફૂડ બિઝનેસનો ખર્ચ ઘટી શકે છે. તેના કારણે ભવિષ્યમાં ચા-નાસ્તા, ભોજન અને કેટરિંગ સેવાઓના ભાવમાં રાહત મળવાની શક્યતા છે.

2. ડીઝલ ભરાવવાની મર્યાદા દૂર

હવે પેટ્રોલ પંપ પરથી એક વાહનમાં એક દિવસમાં માત્ર 200 લિટર ડીઝલ ભરાવવાની મર્યાદા સમાપ્ત કરી દેવામાં આવી છે. સાથે જ ફેક્ટરીઓ અને મોટા કોમર્શિયલ ગ્રાહકો પર લાગુ કરાયેલા પ્રતિબંધો પણ હટાવી દેવામાં આવ્યા છે.

પેટ્રોલિયમ મંત્રાલયે 11 જૂને સપ્લાયની અછતને કારણે આ મર્યાદા લગાવી હતી, પરંતુ પુરવઠો સામાન્ય બનતા 29 જૂનના આદેશથી તેને પાછી ખેંચી લેવામાં આવી છે.

અસર: ટ્રાન્સપોર્ટર્સ, ઉદ્યોગો અને સામાન્ય વાહનચાલકો હવે પોતાની જરૂરિયાત મુજબ પેટ્રોલ પંપ પરથી સીધું જ ડીઝલ ભરાવી શકશે.

3. પાસપોર્ટ બનાવવો અને રિન્યૂ કરાવવો મોંઘો

કેન્દ્ર સરકારે 14 વર્ષ બાદ પાસપોર્ટની ફીમાં વધારો કર્યો છે. નવી ફી 1 જુલાઈથી અમલમાં આવી છે.

નવી ફી:

• 36 પાનાનો સામાન્ય પાસપોર્ટ: ₹1,500થી વધીને ₹2,500
• 36 પાનાનો તત્કાલ પાસપોર્ટ: ₹3,500થી વધીને ₹5,000
• 60 પાનાનો સામાન્ય પાસપોર્ટ: ₹2,000થી વધીને ₹3,500
• 60 પાનાનો તત્કાલ પાસપોર્ટ: ₹4,000થી વધીને ₹6,000

અસર: નવો પાસપોર્ટ બનાવનાર અથવા રિન્યૂ કરાવનાર લોકોને હવે ₹1,000થી ₹2,000 સુધી વધુ ખર્ચ કરવો પડશે.

4. ટ્રેનમાં બિનટિકિટ મુસાફરી પર હવે બમણો દંડ

રેલવે મંત્રાલયે ટિકિટ વગર મુસાફરી કરવા બદલ લાગતો લઘુત્તમ દંડ ₹250થી વધારીને ₹500 કરી દીધો છે.

હવે જો કોઈ મુસાફર બિનટિકિટ ઝડપાશે તો તેને ટિકિટનું સંપૂર્ણ ભાડું ઉપરાંત ઓછામાં ઓછો ₹500 દંડ ચૂકવવો પડશે. ગંભીર મામલામાં મેજિસ્ટ્રેટ કોર્ટ દ્વારા 6 મહિનાની જેલ, ₹1,000નો દંડ અથવા બંને સજા થઈ શકે છે.

અસર: બિનટિકિટ મુસાફરી હવે વધુ મોંઘી અને જોખમી બની જશે.

5. નાયરાએ પેટ્રોલ ₹5 અને ડીઝલ ₹3 સસ્તું કર્યું

પ્રાઈવેટ ફ્યુઅલ રિટેલર નાયરા એનર્જીએ પેટ્રોલના ભાવમાં પ્રતિ લિટર ₹5 અને ડીઝલમાં ₹3નો ઘટાડો જાહેર કર્યો છે. છેલ્લા બે વર્ષથી વધુ સમય બાદ કોઈ કંપનીએ ઇંધણના ભાવ ઘટાડ્યા છે.

પશ્ચિમ એશિયામાં તણાવ ઓછો થતાં આંતરરાષ્ટ્રીય બજારમાં ક્રૂડ ઓઈલના ભાવમાં ઘટાડો નોંધાયો છે, જેના કારણે કંપનીએ ગ્રાહકોને રાહત આપી છે.

6. આધારમાં ઈમેલ અપડેટ હવે મફત

UIDAIએ આધાર કાર્ડમાં ઈમેલ એડ્રેસ અપડેટ કરવા માટે વસૂલાતી ₹75ની ફી હટાવી દીધી છે.

આ સેવા 31 ડિસેમ્બર 2026 સુધી સંપૂર્ણપણે મફત રહેશે.

અસર: કરોડો આધાર ધારકો હવે કોઈપણ વધારાના ખર્ચ વગર પોતાનો ઈમેલ આઈડી અપડેટ અથવા લિંક કરાવી શકશે.

7. નવી કાર ખરીદવી થઈ મોંઘી

1 જુલાઈથી અનેક ઓટોમોબાઈલ કંપનીઓએ વાહનોના ભાવમાં વધારો કર્યો છે.

• કિયા ઇન્ડિયા: તમામ મોડલમાં 2% સુધી ભાવ વધારો
• ટાટા મોટર્સ: 1.5% સુધી ભાવ વધારો

આ વધારો પેટ્રોલ, ડીઝલ અને ઇલેક્ટ્રિક વાહનો સહિત વિવિધ મોડલ પર લાગુ થશે.

અસર: નવી કાર ખરીદવાનું આયોજન કરનારા ગ્રાહકોને હવે પહેલા કરતાં વધુ કિંમત ચૂકવવી પડશે.

એક નજરમાં 1 જુલાઈના મોટા ફેરફારો

• કોમર્શિયલ LPG સિલિન્ડર સરેરાશ ₹180 સુધી સસ્તો
• ડીઝલ ખરીદવાની 200 લિટરની મર્યાદા સમાપ્ત
• પાસપોર્ટની ફીમાં 14 વર્ષ બાદ વધારો
• ટ્રેનમાં બિનટિકિટ મુસાફરી પર દંડ ₹250થી વધીને ₹500
• નાયરા એનર્જીએ પેટ્રોલ ₹5 અને ડીઝલ ₹3 સસ્તું કર્યું
• આધારમાં ઈમેલ અપડેટ 31 ડિસેમ્બર સુધી મફત
• કિયા અને ટાટા સહિત અનેક કંપનીઓએ કારના ભાવ વધાર્યા