રાહુલ ગાંધીનો મોદી સરકાર પર મોટો પ્રહાર: ‘દેશ ચલાવવો PM મોદીના હાથની વાત નથી’

Rahul Gandhi એ સોમવારે પશ્ચિમ એશિયામાં ચાલી રહેલા તણાવ અને આર્થિક સંકટને લઈને વડાપ્રધાન Narendra Modi દ્વારા કરવામાં આવેલી ‘સાત અપીલો’ પર તીખો પ્રહાર કર્યો હતો. રાહુલ ગાંધીએ પીએમ મોદીના નિવેદનોને “ઉપદેશ” નહીં પરંતુ “સરકારની નિષ્ફળતાના પુરાવા” ગણાવ્યા હતા.

રાહુલ ગાંધીએ સોશિયલ મીડિયા પ્લેટફોર્મ X પર પોસ્ટ કરીને લખ્યું કે, “મોદીજીએ ગઈકાલે જનતા પાસેથી ત્યાગ માંગ્યો. આ ઉપદેશ નથી, આ નિષ્ફળતાના પુરાવા છે. 12 વર્ષમાં દેશને એવી સ્થિતિમાં લાવી દીધો છે કે હવે લોકોને કહેવું પડી રહ્યું છે કે શું ખરીદવું, શું નહીં ખરીદવું, ક્યાં જવું અને ક્યાં નહીં જવું.”

પીએમ મોદીએ શું કહ્યું હતું?

રવિવારે સિકંદરાબાદમાં આયોજિત જનસભામાં પીએમ મોદીએ પશ્ચિમ એશિયામાં ચાલી રહેલા યુદ્ધ અને વધતી વૈશ્વિક અનિશ્ચિતતાને ધ્યાનમાં રાખીને દેશવાસીઓને કેટલીક અપીલો કરી હતી. તેમણે કહ્યું હતું કે ભારતે આયાત પરની નિર્ભરતા ઘટાડવી પડશે, જેથી વિદેશી મુદ્રાની બચત થઈ શકે અને દેશની અર્થવ્યવસ્થા પર વધતા દબાણને ઓછું કરી શકાય.

પીએમ મોદીએ કહ્યું હતું કે, “ભારતમાં મોટા તેલના કૂવા નથી, તેથી પેટ્રોલ, ગેસ અને ડીઝલનો ઉપયોગ ઓછો કરવો પડશે. પડોશમાં ચાલી રહેલા યુદ્ધને કારણે દુનિયાભરમાં ઈંધણના ભાવ વધી રહ્યા છે અને તેની સીધી અસર ભારત પર પડે છે.”

PM મોદીની 7 મુખ્ય અપીલો

• પેટ્રોલ, ગેસ અને ડીઝલનો ઉપયોગ ઓછો કરો
• બિનજરૂરી વાહન વપરાશ ટાળો, મેટ્રો અને કારપૂલિંગ અપનાવો
• વર્ક ફ્રોમ હોમ જેવા વિકલ્પો વધારવા
• ખાવાના તેલનો ઉપયોગ ઓછો કરો
• રાસાયણિક ખાતરોનો ઉપયોગ અડધો કરી પ્રાકૃતિક ખેતી તરફ આગળ વધો
• થોડા સમય માટે વિદેશ પ્રવાસ ટાળો
• એક વર્ષ સુધી સોનું ખરીદવાનું અને દાન કરવાનું ટાળો

સોનાની આયાત અને ખર્ચ પર ચિંતા

ભારતમાં સોનાની આયાત પર દર વર્ષે લાખો કરોડ રૂપિયાનું વિદેશી મુદ્રા ખર્ચાઈ રહ્યું છે. વેપારી સંગઠન ASSOCHAM ના અહેવાલ અનુસાર ભારતીય ઘર અને મંદિરોમાં અંદાજે 50,000 ટન સોનું છે, જેની કિંમત લગભગ 10 ટ્રિલિયન ડોલર એટલે કે ₹830 લાખ કરોડ જેટલી થાય છે.

રિપોર્ટ મુજબ 2024-25 દરમિયાન સોનાની આયાત પર લગભગ ₹4.89 લાખ કરોડનો ખર્ચ થયો હતો, જે 2025-26માં વધીને ₹6.40 લાખ કરોડ સુધી પહોંચી ગયો છે. World Gold Council ના અહેવાલ મુજબ 2026ના પ્રથમ ક્વાર્ટરમાં ભારતમાં રોકાણ માટે સોનાની માંગ દાગીનાથી પણ વધુ નોંધાઈ છે.

વિદેશ પ્રવાસ અને વધતો ખર્ચ

ભારતીયો દ્વારા વિદેશ પ્રવાસ પર થતો ખર્ચ પણ ઝડપથી વધી રહ્યો છે. 2023-24માં ભારતીયોએ વિદેશ યાત્રાઓમાં ₹2.72 લાખ કરોડ ખર્ચ્યા હતા, જ્યારે 2025-26માં આ ખર્ચ ₹3.65 લાખ કરોડ સુધી પહોંચી ગયો છે.

ખાતર અને ક્રૂડ ઓઈલની આયાતથી દબાણ

ભારત આ વર્ષે લગભગ ₹1.50 લાખ કરોડનું ખાતર આયાત કરી ચૂક્યું છે, જે ગયા વર્ષની સરખામણીમાં 76% વધુ છે. ભારત સૌથી વધુ ખાતર Qatar માંથી આયાત કરે છે, જ્યાં પશ્ચિમ એશિયાના તણાવની અસર જોવા મળી રહી છે.

ક્રૂડ ઓઈલની વાત કરીએ તો ભારત તેની જરૂરિયાતનું લગભગ 70% તેલ આયાત કરે છે. 2024-25માં ભારતે તેલ આયાત પર ₹11.66 લાખ કરોડ ખર્ચ્યા હતા. જોકે, છેલ્લા બે મહિનામાં વૈશ્વિક યુદ્ધના માહોલને કારણે ક્રૂડના ભાવમાં લગભગ 50% વધારો થયો છે. આવી સ્થિતિમાં ભારતનું તેલ આયાત બિલ ₹17 લાખ કરોડ સુધી પહોંચી શકે છે.

રાજકીય માહોલ ગરમાયો

પીએમ મોદીની અપીલો બાદ હવે રાજકીય ઘમાસાણ તેજ બન્યું છે. કોંગ્રેસ આ નિવેદનોને સરકારની આર્થિક નીતિઓની નિષ્ફળતા ગણાવી રહી છે, જ્યારે ભાજપનું કહેવું છે કે વૈશ્વિક સંકટ વચ્ચે દેશહિતમાં બચત અને આત્મનિર્ભરતા જરૂરી બની છે.

પશ્ચિમ એશિયામાં વધી રહેલા તણાવ અને વધતી મોંઘવારી વચ્ચે હવે આ મુદ્દો રાજકીય ચર્ચાનો કેન્દ્ર બની ગયો છે.