G-7 સમિટમાં મોદી-ટ્રમ્પની 16 મહિના બાદ મુલાકાત: 5 મિનિટની ચર્ચા, મેલોનીએ કહ્યું- ‘અમે ઇન્સ્ટાગ્રામ પર સૌથી ફેમસ છીએ’

ફ્રાન્સના એવિયન શહેરમાં યોજાયેલી G-7 સમિટ દરમિયાન વડાપ્રધાન નરેન્દ્ર મોદી અને અમેરિકાના રાષ્ટ્રપતિ ડોનાલ્ડ ટ્રમ્પ વચ્ચે મહત્વપૂર્ણ મુલાકાત થઈ હતી. બંને નેતાઓ લગભગ 5 મિનિટ સુધી વાતચીત કરતા જોવા મળ્યા હતા. આ મુલાકાત છેલ્લા 16 મહિનામાં તેમની પ્રથમ રૂબરૂ મુલાકાત હોવાનું માનવામાં આવે છે.

G-7 આઉટરીચ સેશન દરમિયાન બંને નેતાઓ એકસાથે બેઠેલા જોવા મળ્યા હતા. અગાઉ બંનેની છેલ્લી મુલાકાત ફેબ્રુઆરી 2025માં વ્હાઇટ હાઉસ ખાતે થઈ હતી. વૈશ્વિક રાજકીય અને આર્થિક પરિસ્થિતિ વચ્ચે આ મુલાકાતને મહત્વપૂર્ણ માનવામાં આવી રહી છે.

વેપાર અને વ્યૂહાત્મક ભાગીદારી પર થઈ શકે ચર્ચા

સૂત્રોના જણાવ્યા અનુસાર બંને નેતાઓ વચ્ચે ભારત-અમેરિકા વેપાર કરાર, ટેરિફ, રોકાણ અને વ્યૂહાત્મક ભાગીદારી જેવા મુદ્દાઓ પર ચર્ચા થવાની સંભાવના છે. વ્હાઇટ હાઉસે પણ સંકેત આપ્યા છે કે બંને દેશો વચ્ચેના આર્થિક સંબંધોને વધુ મજબૂત બનાવવા માટે ચર્ચા થઈ શકે છે.

મેક્રોંએ કર્યું મોદીનું સ્વાગત

G-7 સમિટમાં ભાગ લેવા માટે વડાપ્રધાન મોદી મંગળવારે એવિયન પહોંચ્યા હતા. ફ્રાન્સના રાષ્ટ્રપતિ ઇમેન્યુઅલ મેક્રોંએ તેમનું ઉષ્માભર્યું સ્વાગત કર્યું હતું. સમિટ સ્થળે વિશ્વના અગ્રણી નેતાઓએ ગ્રુપ ફોટો સેશનમાં પણ ભાગ લીધો હતો.

મેલોની સાથે હળવી વાતચીત ચર્ચામાં

સમિટ દરમિયાન ઇટાલીના વડાપ્રધાન જ્યોર્જિયા મેલોની અને વડાપ્રધાન મોદી વચ્ચે પણ મિત્રતાભરી વાતચીત જોવા મળી હતી. મેલોનીએ મોદીને હસતાં કહ્યું, “ફરી મળીને સારું લાગ્યું, આપણે ઇન્સ્ટાગ્રામ પર સૌથી ફેમસ છીએ.”

મેલોની અને મોદીની આ ટિપ્પણી સોશિયલ મીડિયા પર પણ ચર્ચાનો વિષય બની છે. ગયા મહિને રોમમાં થયેલી મુલાકાત દરમિયાન મોદીએ મેલોનીને ‘મેલોડી’ ટોફી ભેટ આપી હતી, જેનો વીડિયો સોશિયલ મીડિયા પર વાયરલ થયો હતો.

PM મોદીના સંબોધનના મુખ્ય મુદ્દા

G-7 સમિટના સેશન દરમિયાન વડાપ્રધાન મોદીએ વૈશ્વિક સહયોગ અને વિશ્વાસના મહત્વ પર ભાર મૂક્યો હતો. તેમણે કહ્યું કે આજની દુનિયા પહેલાં કરતાં વધુ પરસ્પર જોડાયેલી છે, પરંતુ ભાગીદારીની સફળતા માટે વિશ્વાસ સૌથી મહત્વપૂર્ણ આધાર છે.

તેમણે જણાવ્યું કે વિશ્વ આજે સંસાધનોની નહીં પરંતુ વિશ્વાસની કમીનો સામનો કરી રહ્યું છે. ભારત દુનિયાને એક પરિવાર તરીકે જુએ છે અને વિકાસ ત્યારે જ સફળ બને છે જ્યારે તે લોકોની આશાઓ સાથે જોડાયેલો હોય.

મોદીએ વધુમાં કહ્યું કે ગ્લોબલ સાઉથને માત્ર સહાય નહીં પરંતુ સમાન ભાગીદારીની જરૂર છે અને વિકસિત દેશોએ લેણદેણની માનસિકતાથી આગળ વધીને સહયોગનો નવો માળખો ઉભો કરવો જોઈએ.

G-7 સમિટમાં 12 દેશોના નેતાઓની હાજરી

આ વર્ષની G-7 સમિટમાં અમેરિકા, ફ્રાન્સ, બ્રિટન, જર્મની, ઇટાલી, જાપાન અને કેનેડા સહિતના સભ્ય દેશોના નેતાઓ હાજર રહ્યા છે. સાથે જ ભારત, બ્રાઝિલ, ઇજિપ્ત, દક્ષિણ કોરિયા અને કેન્યા જેવા દેશોના નેતાઓને વિશેષ આમંત્રિત મહેમાન તરીકે આમંત્રણ આપવામાં આવ્યું છે.

ભારત G-7નો સભ્ય દેશ નથી, પરંતુ વિશ્વની અગ્રણી અર્થવ્યવસ્થાઓમાં સ્થાન ધરાવતું હોવાના કારણે તેને નિયમિત રીતે વિશેષ આમંત્રિત દેશ તરીકે બોલાવવામાં આવે છે.

G-7 સમિટમાં ભારતની 13મી હાજરી

આ G-7 સમિટમાં ભારતની 13મી હાજરી છે, જ્યારે વડાપ્રધાન નરેન્દ્ર મોદી સાતમી વખત આ વૈશ્વિક મંચ પર ભાગ લઈ રહ્યા છે. 2019થી લઈને અત્યાર સુધી મોદી સતત G-7 સમિટમાં ભારતનું પ્રતિનિધિત્વ કરી રહ્યા છે.

શું છે G-7?

G-7 એટલે ‘ગ્રુપ ઓફ સેવન’, જેમાં અમેરિકા, ફ્રાન્સ, બ્રિટન, જાપાન, ઇટાલી, કેનેડા અને જર્મનીનો સમાવેશ થાય છે. વિશ્વની અગ્રણી અર્થવ્યવસ્થાઓ ધરાવતા આ દેશો દર વર્ષે વૈશ્વિક અર્થતંત્ર, સુરક્ષા, રાજકીય પડકારો, ટેક્નોલોજી અને ક્લાઈમેટ ચેન્જ જેવા મુદ્દાઓ પર ચર્ચા કરવા માટે સમિટનું આયોજન કરે છે.

આ વર્ષે સમિટના એજન્ડામાં યુક્રેન યુદ્ધ, ઈરાન-ઈઝરાયલ તણાવ, મધ્ય પૂર્વની સ્થિતિ, વૈશ્વિક આર્થિક સહયોગ અને આર્ટિફિશિયલ ઈન્ટેલિજન્સ (AI) જેવા મહત્વના મુદ્દાઓ સામેલ છે.

મોદી-ટ્રમ્પ મુલાકાત, મેલોની સાથેની હળવી વાતચીત અને વૈશ્વિક પડકારો પર ભારતના મજબૂત અભિપ્રાયને કારણે G-7 સમિટમાં ભારતનું પ્રભાવશાળી સ્થાન ફરી એકવાર ચર્ચામાં આવ્યું છે.