વડોદરાથી દિલ્હી જતી ઇન્ડિગો ફ્લાઇટમાં ટેકનિકલ ખામી: AC-લાઇટ બંધ થતાં મુસાફરો ગરમીમાં તડફડાયા

વડોદરાથી દિલ્હી જતી ઇન્ડિગો એરલાઇન્સની ફ્લાઇટમાં મોટી ટેકનિકલ ખામી સર્જાતા મુસાફરોને ભારે હાલાકીનો સામનો કરવો પડ્યો હતો. એરપોર્ટ પર ઉભેલી ફ્લાઇટમાં અચાનક વીજ પુરવઠો ખોરવાઈ જતાં એર કન્ડિશનર (AC) અને લાઇટો સંપૂર્ણપણે બંધ થઈ ગઈ હતી. કાળઝાળ ગરમી વચ્ચે ફ્લાઇટની અંદર અંધારપટ છવાઈ જતાં મુસાફરો ગૂંગળામણ અનુભવવા લાગ્યા હતા. ગરમીથી બચવા માટે મુસાફરો હાથમાં રહેલા પૂંઠા, ફાઇલ અને ન્યૂઝપેપર વડે પવન નાખતા નજરે પડ્યા હતા.

25 મિનિટ સુધી ફ્લાઇટમાં જ ફસાયેલા રહ્યા મુસાફરો

મળતી માહિતી અનુસાર, વડોદરાથી દિલ્હી જતી ઇન્ડિગોની ફ્લાઇટ નંબર 6E657માં આ ઘટના બની હતી. રાત્રે અંદાજે 08:50 વાગ્યાથી 09:15 વાગ્યા સુધી, એટલે કે આશરે 25 મિનિટ સુધી મુસાફરો ફ્લાઇટની અંદર જ રહ્યા હતા. AC બંધ થઈ જતા કેબિનમાં અસહ્ય ગરમી ફેલાઈ ગઈ હતી, જેના કારણે ઘણા મુસાફરો અકળાઈ ઉઠ્યા હતા.

આ દરમિયાન કેટલાક મુસાફરો પોતાને રાહત મળે તે માટે હાથમાં રહેલી ફાઇલ, પૂંઠા અને અખબારથી પવન નાખતા જોવા મળ્યા હતા. સમગ્ર ઘટનાનો વીડિયો પણ એક મુસાફરે પોતાના મોબાઇલમાં કેદ કર્યો હતો, જે હવે સોશિયલ મીડિયા પર વાયરલ થઈ રહ્યો છે.

GPU બંધ થતાં સર્જાઈ સમગ્ર પરિસ્થિતિ

એરપોર્ટના સત્તાવાર સૂત્રોના જણાવ્યા અનુસાર, એરક્રાફ્ટનું GPU (Ground Power Unit) અચાનક ટેકનિકલ ખામીના કારણે બંધ થઈ ગયું હતું. જેના કારણે ફ્લાઇટની અંદરનો વીજ પુરવઠો ખોરવાઈ ગયો હતો અને લાઇટ તેમજ એર કન્ડિશનિંગ સિસ્ટમ બંધ થઈ ગઈ હતી.

શું છે GPU અને તેનું કાર્ય?

જ્યારે વિમાન જમીન પર ઉભું હોય છે અને તેના મુખ્ય એન્જિન બંધ હોય છે, ત્યારે વિમાનની અંદરની વિવિધ સિસ્ટમ્સને વીજ પુરવઠો આપવા માટે GPUનો ઉપયોગ કરવામાં આવે છે. GPU દ્વારા કોકપિટ ઇન્સ્ટ્રુમેન્ટ્સ, કેબિન લાઇટિંગ, એર કન્ડિશનિંગ તેમજ એન્જિન સ્ટાર્ટ કરવા માટે જરૂરી પાવર સપ્લાય પૂરો પાડવામાં આવે છે. GPUમાં ખામી સર્જાતા ફ્લાઇટની અંદરની તમામ સુવિધાઓ અચાનક બંધ થઈ ગઈ હતી.

ટેકનિકલ ટીમે સ્થિતિ કાબૂમાં લીધી

ઘટનાની જાણ થતાં જ એરલાઇન્સની ટેકનિકલ ટીમ તાત્કાલિક ધોરણે કાર્યરત થઈ ગઈ હતી. ઝડપી કામગીરી બાદ થોડા જ સમયમાં વીજ પુરવઠો ફરી શરૂ કરવામાં આવ્યો હતો. લાઇટો અને AC શરૂ થતાં મુસાફરોએ રાહતનો શ્વાસ લીધો હતો. ત્યારબાદ ફ્લાઇટને દિલ્હી માટે રવાના કરવામાં આવી હતી.

આ ઘટનાએ મુસાફરોની સુરક્ષા અને એરલાઇન્સની ટેકનિકલ વ્યવસ્થાઓ અંગે અનેક સવાલો ઊભા કર્યા છે.