હવે સેશેલ્સમાં પણ ચાલશે UPI! ભારત સાથે 19 ઐતિહાસિક કરારો, ₹1250 કરોડની લોનની જાહેરાત

ભારત અને સેશેલ્સ વચ્ચેના સંબંધોમાં રવિવારે ઐતિહાસિક અધ્યાય ઉમેરાયો. વડાપ્રધાન નરેન્દ્ર મોદી અને સેશેલ્સના રાષ્ટ્રપતિ પેટ્રિક હર્મિનીની હાજરીમાં બંને દેશોએ 19 મોટા કરારો અને વિકાસ પરિયોજનાઓની જાહેરાત કરી. આ કરારો દ્વારા સંરક્ષણ, ડિજિટલ પેમેન્ટ, આરોગ્ય, શિક્ષણ, અવકાશ, કૃષિ, આર્ટિફિશિયલ ઇન્ટેલિજન્સ, સાયબર સુરક્ષા અને દરિયાઈ સુરક્ષા જેવા અનેક ક્ષેત્રોમાં સહયોગ વધુ મજબૂત બનશે. ખાસ કરીને હવે સેશેલ્સમાં પણ ભારતની UPI આધારિત ડિજિટલ પેમેન્ટ સિસ્ટમ શરૂ થશે, જે ભારતની ડિજિટલ કૂટનીતિ માટે મોટી ઉપલબ્ધિ માનવામાં આવી રહી છે.

ભારતે સેશેલ્સને વિકાસ માટે 1,250 કરોડ રૂપિયાની લાઇન ઓફ ક્રેડિટ (LoC) આપવાની જાહેરાત કરી છે. આ રકમનો ઉપયોગ દેશમાં વિવિધ વિકાસ પરિયોજનાઓ અને માળખાકીય સુવિધાઓને મજબૂત બનાવવા માટે કરવામાં આવશે. આ ઉપરાંત બંને દેશોએ પ્રત્યાર્પણ સંધિ, નવી રાષ્ટ્રીય હોસ્પિટલના નિર્માણ, અવકાશના શાંતિપૂર્ણ ઉપયોગ અને ડિજિટલ સહયોગ સહિત અનેક મહત્વપૂર્ણ સમજૂતીઓ પર હસ્તાક્ષર કર્યા.

ભારતે સેશેલ્સને સુરક્ષા અને માનવતાવાદી સહાય તરીકે ભારતમાં બનેલું ફાસ્ટ પેટ્રોલ વેસલ (FPV) ‘PS Lespoir’, 10 યુટિલિટી વાહનો, 5 બોટ, 6 એમ્બ્યુલન્સ, 500 મેટ્રિક ટન ચોખા અને 8,500 મેટ્રિક ટન સિમેન્ટ પણ ભેટમાં આપ્યા. આ સાથે જ બંને દેશોએ સાયબર સુરક્ષા, કૃષિ, શિક્ષણ, આરોગ્ય અને આર્ટિફિશિયલ ઇન્ટેલિજન્સ ક્ષેત્રે સહયોગ વધારવા માટે પણ સંમતિ વ્યક્ત કરી. આ જાહેરાતો એવા સમયે થઈ છે જ્યારે ભારત અને સેશેલ્સ રાજદ્વારી સંબંધોના 50 વર્ષ પૂર્ણ થવાની ઉજવણી કરી રહ્યા છે.

સેશેલ્સમાં હવે UPIથી થશે પેમેન્ટ

ભારતે અત્યાર સુધીમાં 23થી વધુ દેશો સાથે UPIને લઈને કરારો કર્યા છે. હાલમાં 9 દેશોમાં ભારતીય પ્રવાસીઓ UPI દ્વારા સીધી ચુકવણી કરી શકે છે. હવે સેશેલ્સ પણ આ યાદીમાં જોડાવા જઈ રહ્યું છે, જેના કારણે ભારતીય પ્રવાસીઓ અને વેપારીઓ માટે ડિજિટલ લેવડદેવડ વધુ સરળ બનશે. સાથે જ બંને દેશો વચ્ચે વેપાર અને પ્રવાસનને પણ પ્રોત્સાહન મળશે.

મોદીએ સેશેલ્સની સંસદને કર્યું સંબોધન

વડાપ્રધાન નરેન્દ્ર મોદીએ સેશેલ્સની નેશનલ એસેમ્બલીના વિશેષ સત્રને સંબોધિત કર્યું. તેઓ આવું કરનાર પ્રથમ ભારતીય વડાપ્રધાન બન્યા છે. અગાઉ ભારતના તત્કાલીન રાષ્ટ્રપતિ પ્રતિભા પાટીલે સેશેલ્સની સંસદને સંબોધન કર્યું હતું.

સર્વોચ્ચ નાગરિક સન્માનથી સન્માનિત

સેશેલ્સના રાષ્ટ્રપતિ પેટ્રિક હર્મિનીએ વડાપ્રધાન મોદીને દેશના સર્વોચ્ચ નાગરિક સન્માન **’ગાર્ડિયન ઓફ બ્લુ હોરાઇઝન’**થી નવાજ્યા. આ સાથે મોદી અત્યાર સુધીમાં 34 દેશોના સર્વોચ્ચ નાગરિક સન્માન મેળવનારા ભારતીય નેતા બન્યા છે.

ગોલ્ડન જ્યુબિલી સમારોહમાં મુખ્ય અતિથિ

સેશેલ્સની આઝાદીના 50 વર્ષ પૂર્ણ થવા નિમિત્તે યોજાયેલા ગોલ્ડન જ્યુબિલી નેશનલ ડે સમારોહમાં વડાપ્રધાન મોદી મુખ્ય અતિથિ તરીકે હાજર રહ્યા. સમારોહમાં ભારતીય સશસ્ત્ર દળોની ટુકડી, ભારતીય નૌકાદળનું યુદ્ધ જહાજ INS તરકશ અને હાઇડ્રોગ્રાફિક સર્વે શિપ INS ઇક્ષક પણ સામેલ થયા. ભારતીય નૌકાદળની માર્ચિંગ ટુકડી અને નેવલ બેન્ડે પણ પરેડમાં ભાગ લીધો.

175 મિલિયન ડોલરના આર્થિક પેકેજની જાહેરાત

ભારતે સેશેલ્સના વિકાસ અને ઇન્ફ્રાસ્ટ્રક્ચરને વધુ મજબૂત બનાવવા માટે 175 મિલિયન અમેરિકી ડોલર (લગભગ ₹1,651 કરોડ)ના આર્થિક પેકેજની પણ જાહેરાત કરી છે. ઉપરાંત ભારતમાં બનેલું ફાસ્ટ પેટ્રોલ વેસલ PS Lespoir સેશેલ્સને ભેટમાં આપવામાં આવ્યું, જે દેશની દરિયાઈ સુરક્ષા અને દેખરેખ ક્ષમતાને વધુ મજબૂત બનાવશે.

મોદીએ રોપ્યો કોકો ડી મેરનો છોડ

વડાપ્રધાન મોદીએ સેશેલ્સની વિશિષ્ટ ઓળખ ગણાતા દુર્લભ કોકો ડી મેરના છોડનું રોપણ પણ કર્યું. આ વૃક્ષ વિશ્વમાં માત્ર સેશેલ્સમાં જ કુદરતી રીતે જોવા મળે છે. તેના ફળમાં મળતું બીજ વિશ્વનું સૌથી મોટું અને સૌથી ભારે બીજ માનવામાં આવે છે, જેનું વજન 15થી 30 કિલોગ્રામ સુધી હોઈ શકે છે. એક વૃક્ષને ફળ આપવા માટે 20થી 40 વર્ષનો સમય લાગે છે, જ્યારે એક ફળને સંપૂર્ણ પાકવામાં 6થી 7 વર્ષ લાગે છે. આ વૃક્ષનું આયુષ્ય 200થી 350 વર્ષ સુધીનું હોવાનું માનવામાં આવે છે.

મોદી સેશેલ્સ જનારા માત્ર બીજા ભારતીય વડાપ્રધાન

ભારતના પૂર્વ વડાપ્રધાન ઇન્દિરા ગાંધી 1976માં સેશેલ્સની આઝાદીના વર્ષમાં ત્યાંની મુલાકાતે ગયા હતા અને 1981માં ફરી સેશેલ્સની મુલાકાત લીધી હતી. ત્યારબાદ લગભગ 34 વર્ષ સુધી કોઈ ભારતીય વડાપ્રધાન સેશેલ્સ ગયા ન હતા. હવે નરેન્દ્ર મોદી સેશેલ્સની મુલાકાત લેનારા માત્ર બીજા ભારતીય વડાપ્રધાન બન્યા છે.

ભારત અને સેશેલ્સ વચ્ચે થયેલા આ 19 કરારો માત્ર દ્વિપક્ષીય સંબંધોને નવી દિશા આપશે એટલું જ નહીં, પરંતુ હિંદ મહાસાગર ક્ષેત્રમાં ભારતની વ્યૂહાત્મક હાજરી, ડિજિટલ કનેક્ટિવિટી અને સુરક્ષા સહયોગને પણ વધુ મજબૂત બનાવશે. UPIનું વિસ્તરણ, વિકાસ માટેની આર્થિક સહાય અને સંરક્ષણ ક્ષેત્રે સહયોગ બંને દેશો વચ્ચેના સંબંધોને નવા શિખરો પર લઈ જવાની દિશામાં મહત્વપૂર્ણ પગલું માનવામાં આવી રહ્યું છે.