ભારતીય સામાન હવે 24 દિવસમાં રશિયા પહોંચશે, મોદી-પુતિન કરારથી 6000 કિમીની બચત

ચેન્નઈ-વ્લાદિવોસ્તોક ઈસ્ટર્ન કોરિડોર: ભારત-રશિયા વેપારમાં 16 દિવસની બચત, 2030 સુધી 100 અબજ ડોલર લક્ષ્ય

રશિયાના રાષ્ટ્રપતિ વ્લાદિમીર પુતિનની ભારત યાત્રા દરમિયાન પીએમ મોદીના સાથે થયેલી ચર્ચામાં ચેન્નઈ-વ્લાદિવોસ્તોક ઈસ્ટર્ન કોરીડોર શરૂ કરવાની સહમતિ થઈ છે. નવા આ દરિયાઈ માર્ગથી ભારતીય જહાજો સરેરાશ 24 દિવસમાં રશિયા પહોંચી શકશે, જ્યારે હાલનો પરંપરાગત માર્ગ 40 દિવસ લે છે. આ રીતે લગભગ 5,700 કિમી ટૂંકો માર્ગ અને 16 દિવસની બચત થશે.

હાલમાં ભારત અને રશિયા વચ્ચેનો વેપાર લગભગ 60 અબજ ડોલરનો છે, અને બંને નેતાઓએ 2030 સુધી આ સંખ્યાને 100 અબજ ડોલર સુધી પહોંચાડવાનો લક્ષ્ય રાખ્યું છે.

ગેમચેન્જર રૂટ:
નવી કોરિડોર ચેન્નઈથી મલક્કા ખાડી, દક્ષિણ ચીન સાગર અને જાપાન સાગર મારફતે વ્લાદિવોસ્તોક પહોંચશે. નિષ્ણાતો માને છે કે તેલ, ગેસ, કોલસો, મશીનરી અને ધાતુ સહિતના વેપાર ક્ષેત્રોમાં ઝડપી પરિવહન સુનિશ્ચિત થશે અને ભારતની સપ્લાય ચેઇન મજબૂત બનશે.

સુરક્ષા અને વિશ્વસનીયતા:
ગાઝા યુદ્ધ અને યુક્રેન યુદ્ધને કારણે પરંપરાગત સુએઝ નહેર માર્ગ જોખમી બની ગયો છે. નવો કોરિડોર એ સુરક્ષિત, ઝડપી અને ભરોસાપાત્ર વિકલ્પ પૂરો પાડશે.

ભારત માટે લાભ:
આ નવા માર્ગથી ભારતને રશિયાથી ક્રૂડ ઓઈલ, નેચરલ ગેસ, કોલસો, ખાતર, ધાતુ અને અન્ય ઔદ્યોગિક માલ સરળતાથી મળી શકશે. ભારત રશિયાને મશીનરી, એન્જિનિયરિંગ ગુડ્સ, ઓટો-પાર્ટ્સ, ટેક્સટાઈલ્સ અને દરિયાઈ ઉત્પાદનો મોકલી શકે છે.

પરંપરાગત માર્ગો:

• પરંપરાગત મુસાફરી: ~16,060 કિમી, 40 દિવસ
• ઈન્ટરનેશનલ નોર્થ-સાઉથ ટ્રેડ કોરિડોર: ~7,200 કિમી, 25-30 દિવસ, સસ્તો પરંતુ તણાવ સાથે

નવો ચેન્નઈ-વ્લાદિવોસ્તોક ઈસ્ટર્ન કોરિડોર ભારત-રશિયા આર્થિક ભાગીદારી માટે મહત્વપૂર્ણ પરિવર્તન તરીકે ગણાય છે, જે વ્યાપાર, સપ્લાય ચેઇન અને ઊર્જા સુરક્ષામાં મોટો ફાયદો લાવશે.