ખાવા-પીવાની વસ્તુઓ અને પર્સનલ કેર પ્રોડક્ટ્સ મોંઘા થશે: કાચા માલના વધતા ખર્ચથી કંપનીઓ પર દબાણ, પેકેજિંગ 56% સુધી મોંઘું

આવનારા દિવસોમાં સામાન્ય લોકોના ઘરખર્ચ પર વધુ ભાર પડી શકે છે. રોજિંદા વપરાશની ખાવા-પીવાની વસ્તુઓ તેમજ પર્સનલ કેર પ્રોડક્ટ્સના ભાવમાં વધારો થવાની શક્યતા છે. સિસ્ટમેટિક્સ રિસર્ચના તાજેતરના રિપોર્ટ મુજબ કાચા માલની વધતી કિંમતોને કારણે કંપનીઓ સતત મોંઘવારીના દબાણનો સામનો કરી રહી છે, જેના કારણે તેઓ પોતાની પ્રોડક્ટ્સના ભાવ વધારવા મજબૂર બની શકે છે.

છેલ્લા બે મહિનામાં જ 3%થી 7% સુધી ભાવ વધ્યા

રિપોર્ટ મુજબ વિવિધ કેટેગરીની કંપનીઓએ છેલ્લા એકથી બે મહિનામાં પોતાની પ્રોડક્ટ્સની કિંમતોમાં સરેરાશ 3%થી 7% સુધી વધારો કર્યો છે. તેનું મુખ્ય કારણ રો મટિરિયલના ખર્ચમાં થયેલો ઉછાળો છે. કંપનીઓની રો મટિરિયલ બાસ્કેટની કુલ કિંમતમાં સરેરાશ 10% જેટલો વધારો નોંધાયો છે, જેનાથી ઉત્પાદન ખર્ચ સીધો વધી ગયો છે.

રિટેલ મોંઘવારી ફરી વધી, ખાદ્ય વસ્તુઓ મુખ્ય કારણ

દેશમાં મોંઘવારીનો દર પણ ફરી વધી રહ્યો છે. એપ્રિલ મહિનામાં રિટેલ મોંઘવારી વધીને 3.48% પર પહોંચી ગઈ હતી, જ્યારે માર્ચમાં તે 3.40% હતી. મોંઘવારી વધવાનું સૌથી મોટું કારણ ખાદ્ય વસ્તુઓના ભાવમાં થયેલો વધારો હોવાનું માનવામાં આવે છે. ફૂડ ઇન્ફ્લેશન એપ્રિલમાં 4.20% સુધી પહોંચી ગયું, જે માર્ચમાં 3.87% હતું.

કંપનીઓ ભાવ વધારવા સાથે ‘ગ્રામ કટ’નો રસ્તો અપનાવી શકે

વધતા ઇનપુટ કોસ્ટની અસર ઘટાડવા માટે કંપનીઓ માત્ર કિંમતોમાં વધારો જ નહીં પરંતુ ‘ગ્રામ કટ’ની રણનીતિ પણ અપનાવી શકે છે. એટલે કે, પ્રોડક્ટનો ભાવ યથાવત રાખીને પેકેટ અથવા બોટલનું વજન ઓછું કરવામાં આવી શકે છે. ગ્રાહકો માટે આ છુપાયેલી મોંઘવારી સમાન બની શકે છે.

પેકેજિંગ, ક્રૂડ અને પામ ઓઇલના ખર્ચમાં મોટો ઉછાળો

રિપોર્ટ અનુસાર કેટલીક મહત્વપૂર્ણ કેટેગરીમાં ખર્ચ ખૂબ ઝડપથી વધ્યો છે.

પેકેજિંગ મટિરિયલ (HDPE):
શેમ્પૂ બોટલ, ડિટર્જન્ટ કન્ટેનર અને ફ્લેક્સિબલ પેકેજિંગમાં વપરાતા HDPE પ્લાસ્ટિકના ભાવમાં 56% સુધીનો મોટો વધારો નોંધાયો છે.

ક્રૂડ ઓઇલ અને પામ ઓઇલ:
પશ્ચિમ એશિયામાં વધતા જીઓપોલિટિકલ તણાવ વચ્ચે બ્રેન્ટ ક્રૂડ ઓઇલની કિંમતોમાં 32% સુધી ઉછાળો આવ્યો છે. બીજી તરફ પામ ઓઇલના ભાવમાં પણ 11%નો વધારો નોંધાયો છે, જે ખાદ્ય ઉદ્યોગ માટે વધારાનો ખર્ચ ઉભો કરી રહ્યો છે.

કંપનીઓના નફા અને માર્જિન પર દેખાવા લાગી અસર

કાચા માલની વધતી કિંમતોની અસર કંપનીઓના નફા પર પણ દેખાવા લાગી છે. માર્ચ ક્વાર્ટર (Q4FY26) દરમિયાન મોટી કંપનીઓના ગ્રોસ માર્જિનમાં વાર્ષિક ધોરણે લગભગ 0.50%નો ઘટાડો નોંધાયો હતો.

વિશ્લેષકોનું માનવું છે કે આ મોંઘવારીની સૌથી મોટી અસર નાણાકીય વર્ષ 2027ના પ્રથમ છ માસિક ગાળા (H1FY27)માં જોવા મળશે. કંપનીઓ વધતા ખર્ચની ભરપાઈ કરવા માટે પ્રોડક્ટ્સના ભાવ વધારી રહી છે, પરંતુ મોંઘવારીનું દબાણ એટલું વધારે છે કે વર્ષ 2026-27 દરમિયાન કુલ નફાકારકતા પર અસર પડવાની આશંકા છે.

ભાવ વધશે તો વપરાશ ઘટી શકે

રિપોર્ટમાં ચેતવણી આપવામાં આવી છે કે વધતી રિટેલ મોંઘવારીને કારણે આગામી મહિનાઓમાં ગ્રાહકોના વપરાશ પર અસર પડી શકે છે. જો રોજિંદી જરૂરિયાતની વસ્તુઓ સતત મોંઘી બનશે તો લોકો ખરીદીમાં કાપ મૂકી શકે છે, જેના કારણે બજારમાં કુલ વેચાણ અને વપરાશના જથ્થામાં ઘટાડો થવાની શક્યતા છે.

આ રીતે વધતી મોંઘવારી હવે માત્ર કંપનીઓ માટે નહીં પરંતુ સામાન્ય ગ્રાહકોના ઘરખર્ચ અને ખરીદ શક્તિ માટે પણ મોટો પડકાર બની રહી છે.