કેનેડિયન કપલ સ્લીપર કોચમાં ચડ્યું, જલગાંવ ટ્રેનમાં બાળકો સાથે મસ્તીનો વીડિયો વાયરલ

ભારત ફરવા આવેલા કેનેડાના કપલ માટે મહારાષ્ટ્રની ટ્રેન મુસાફરી જીવનભરની યાદ બની ગઈ. જલગાંવથી ચંદ્રપુર સુધી સાત કલાકની સફર શાંતિથી ઊંઘતા ઊંઘતા પૂર્ણ કરવાની તેમની યોજના હતી, પરંતુ એક નાની ભૂલે આખો અનુભવ જ બદલી નાખ્યો.

ભૂલથી સ્લીપર કોચની ટિકિટ

કપલે જલગાંવથી ચંદ્રપુર સુધીની ટિકિટ બુક કરી, પરંતુ એસી કોચના બદલે ભૂલથી સ્લીપર ક્લાસ પસંદ થઈ ગયો. સ્ટેશન પરથી ટ્રેનમાં ચડ્યા પછી તેઓ પોતાની બર્થ પર ગોઠવાઈ ગયા. કીમ ગ્રીનવૂડ નામના પ્રવાસી આડા પડી આરામ કરવાની તૈયારીમાં હતા, જ્યારે તેમની પત્નીને પણ આરામ કરવાની સલાહ આપી.

પરંતુ નજીકની બર્થ પર મહારાષ્ટ્રનો એક પરિવાર બાળકો સાથે મુસાફરી કરી રહ્યો હતો. સ્લીપર ક્લાસમાં વિદેશી મહેમાનોને જોઈને બાળકોમાં ઉત્સાહ છલકાયો. થોડા જ સમયમાં તેઓ કીમ સાથે રમવા-મસ્તી કરવા લાગ્યા. શાંતિથી ઊંઘ કરવાની આશા રાખનાર કપલ માટે આ સફર એકદમ જુદી સાબિત થઈ.

‘સાત કલાક ઊંઘ તો દૂર, વિચાર પણ આવ્યો નહીં’

કીમ ગ્રીનવૂડે પોતાના ઇન્સ્ટાગ્રામ પર આ સફરની મજેદાર ક્લિપ શેર કરી. તેમણે લખ્યું કે સ્લીપર ક્લાસની મુસાફરીમાં એટલી મજા આવશે એવી કલ્પના પણ નહોતી. બાળકો સાથેની ધમાલ-મસ્તી, આસપાસના મુસાફરોની આત્મીયતા અને સહકાર તેમને ખૂબ ગમ્યા.

તેમણે ઉમેર્યું કે, “સાત કલાક ઊંઘ તો એક બાજુ, ઊંઘવાનો વિચાર પણ આવ્યો નહીં.” આસપાસના લોકો જ્યારે જાણ્યા કે તેઓ કેનેડાથી આવ્યા છે, ત્યારે ઘણા લોકો તેમની બર્થ પાસે ભેગા થઈ ગયા. થોડા સમયમાં જાણે આખો કોચ એક મોટો પરિવાર બની ગયો.

છાપામાં નાસ્તો જોઈને આશ્ચર્ય

મુસાફરી દરમિયાન કેટલાક મુસાફરોએ બારીમાંથી નાસ્તો ખરીદ્યો તો કેટલાકે પોતાના થેલામાંથી ખાવાનું કાઢ્યું. બધાએ કાગળમાં પિરસીને સાથે બેઠા અને ખાધું. આ દૃશ્ય જોઈને કેનેડિયન કપલને ભારે આશ્ચર્ય થયું. તેમણે લખ્યું કે આવું દ્રશ્ય પહેલા ક્યારેય જોયું નહોતું.

કીમની પત્નીએ એક બાળકને ખોળામાં લઈ વ્હાલ પણ કર્યું. અલગ-અલગ પરિવારો હોવા છતાં સૌ એકબીજા સાથે એવી આત્મીયતાથી વર્તતા હતા કે જાણે વર્ષોથી ઓળખાણ હોય.

વીડિયો વાયરલ, લાખો વ્યૂ

કીમ ગ્રીનવૂડે શેર કરેલા વીડિયોને 6.15 લાખથી વધુ વ્યૂ મળ્યા. સોશિયલ મીડિયા પર ઘણા યુઝર્સે તેમની પ્રશંસા કરી કે તેમણે પરિસ્થિતિને નકારાત્મક રીતે નહીં પરંતુ હળવાશથી સ્વીકારી.

એક યુઝરે લખ્યું, “ટ્રેન મુસાફરીની ખાસિયત જ એ છે કે આસપાસના લોકો પરિવાર જેવા બની જાય છે.” બીજા યુઝરે કહ્યું, “જો ઊંઘ ન મળે તો ઘણા લોકો ગુસ્સે થાય, પરંતુ તમે તેને આનંદમાં ફેરવી દીધો.”

યાદગાર બની સાત કલાકની સફર

આ સફર પછી કીમ ગ્રીનવૂડે લખ્યું કે, “અમે વિચાર્યું હતું કે અમારી દુનિયા બદલાઈ જશે, પરંતુ ભારતની આ આત્મીય દુનિયા ક્યારેય બદલાશે નહીં.”

ભૂલથી સ્લીપર કોચમાં ચડવાનું જેનાથી શરૂઆતમાં નિરાશા થઈ હતી, તે જ અનુભવ અંતે તેમની ભારત યાત્રાની સૌથી સુંદર યાદ બની ગયો.