આઝમ ખાન પર ફરી કાનૂની કડકાઈ: નકલી પાન કાર્ડ કેસમાં પિતા-પુત્રને સાત વર્ષની સજા

રામપુરની અદાલતે સમાજવાદી પાર્ટીના વરિષ્ઠ નેતા આઝમ ખાન અને તેમના પુત્ર અબ્દુલ્લા આઝમને નકલી પાન કાર્ડ બનાવવાના કેસમાં સાત-સાત વર્ષની જેલની સજા સંભળાવી છે. બંન્નેને આજે કોર્ટ દ્વારા દોષિત જાહેર કરવામાં આવ્યા છે.

આઝમ ખાન બે મહિના પહેલા, 23 સપ્ટેમ્બરના રોજ સીતાપુર જેલમાંથી મુક્ત થયા હતા, પરંતુ હવે ફરી જેલમાં જવું પડશે.

2019ના કેસમાં દોષિત જાહેર

આ કેસ 2019માં દાખલ થયો હતો જ્યારે રામપુરના ધારાસભ્ય આકાશ સક્સેનાએ સિવિલ લાઇન્સ પોલીસ સ્ટેશનમાં ફરિયાદ આપી હતી. તેમના આરોપ પ્રમાણે, અબ્દુલ્લા આઝમે બે અલગ-અલગ જન્મ તારીખના પ્રમાણપત્રોનો ઉપયોગ કરીને બે PAN કાર્ડ બનાવ્યા હતા.

હેતુ એ હતો કે, ચૂંટણી લડવા માટે જરૂરી લઘુત્તમ ઉંમર ન હોવાથી, જન્મ તારીખમાં ફેરફાર કરીને તેઓ ધારાસભ્ય બની શકે.

ધારાસભ્ય આકાશ સક્સેનાએ નિર્ણય બાદ કહ્યું…

”હું આને સત્યનો વિજય માનું છું. આઝમ સામેના બધા કેસ દસ્તાવેજી પુરાવા પર આધારિત છે. તેમની સામે પુરાવા વિનાનો કોઈ કેસ નથી. તેથી જ કોર્ટે તેમને સજા ફટકારી છે. જેણે પણ ખોટું કર્યું છે તેને સજા થશે.”