AIનો બુમ ખિસ્સા પર ભાર: ચિપ સંકટથી સ્માર્ટફોન, ટીવી સહિતના ડિવાઇસ 50% સુધી મોંઘા થવાની આશંકા

AI (આર્ટિફિશિયલ ઇન્ટેલિજન્સ)ની ઝડપથી વધતી માંગ હવે સામાન્ય ગ્રાહકો માટે ચિંતાનો વિષય બની રહી છે. ડેટા સેન્ટર અને સર્વર્સ માટે હાઈ-બેન્ડવિડ્થ મેમરી (HBM) અને સર્વર-ગ્રેડ DRAMની ભારે માંગ ઊભી થતાં કન્ઝ્યુમર ઇલેક્ટ્રોનિક્સ માટે મેમરી ચિપ્સનો પુરવઠો ઘટ્યો છે. પરિણામે સ્માર્ટફોન, ટીવી, કમ્પ્યુટર અને અન્ય ડિવાઇસની કિંમતોમાં 50% સુધી વધારો થવાની શક્યતા છે.

‘કાઉન્ટરપોઇન્ટ રિસર્ચ’ના રિપોર્ટ મુજબ, હાલની પરિસ્થિતિમાં કન્ઝ્યુમર ઇલેક્ટ્રોનિક્સના ભાવ દર મહિને 7-10% સુધી વધી શકે છે. મુખ્ય મેમરી ઉત્પાદકો—સેમસંગ, એસકે હાઈનિક્સ અને માઇક્રોન—હવે વધુ નફાકારક AI અને સર્વર સેગમેન્ટને પ્રાથમિકતા આપી રહ્યા છે. મોટા AI ગ્રાહકોને પ્રથમ સપ્લાય આપવામાં આવી રહી છે અને ઓર્ડર કંટ્રોલ કડક બનાવાયા છે, જેના કારણે કન્ઝ્યુમર-ગ્રેડ મેમરીની ઉપલબ્ધતા ઘટી ગઈ છે.

મેમરી ચિપ્સના ભાવ 300-400% સુધી ઉછળ્યા

બ્લોપંક્ટ અને કોડકના બ્રાન્ડ લાઇસન્સધારક સુપર પ્લાસ્ટ્રોનિક્સના CEO અવનીત સિંહ મારવાહે જણાવ્યું કે સ્માર્ટ ટીવીમાં DDR-3 અને DDR-4 મેમરીનો ઉપયોગ થાય છે, પરંતુ AI ડિમાન્ડને કારણે આ ચિપ્સ સર્વર સેગમેન્ટ તરફ ડાયવર્ટ થઈ રહી છે. આંતરરાષ્ટ્રીય બજારમાં મેમરી ચિપ્સના ભાવ પહેલેથી જ 300-400% સુધી વધી ચૂક્યા છે.

ટીવી અને સ્માર્ટફોન પર સીધી અસર

રિપોર્ટ અનુસાર, માર્ચ સુધીમાં મેમરી ચિપ્સના ભાવ 40-50% વધુ વધી શકે છે, જેના કારણે ટીવીની કિંમતોમાં 7-10% વધારો થવાની શક્યતા છે. ભારતમાં GST 28%થી ઘટીને 18% કરવાના ફાયદા હવે લગભગ સમાપ્ત થઈ ગયા છે.

સ્માર્ટફોન બ્રાન્ડ ‘નથિંગ’એ પણ આ વર્ષે કિંમતો વધારવાનો સંકેત આપ્યો છે. જોકે વિશ્લેષક મિંગ-ચી કૂના મત મુજબ, એપલ iPhone 18ની કિંમતો સ્થિર રાખવાનો પ્રયાસ કરી શકે છે. એપલ ગ્લોબલ મેમરી સપ્લાયનો લગભગ 20-25% ઉપયોગ કરે છે, જેના કારણે તે સપ્લાયર્સ પર દબાણ બનાવી શકે છે.

વિકલ્પોની શોધમાં કમ્પ્યુટર કંપનીઓ

HP, Dell, Acer અને ASUS જેવી કંપનીઓ પરંપરાગત સપ્લાયર્સના વિકલ્પ તરીકે ચીનની CXMT જેવી કંપનીઓ પાસેથી મેમરી ચિપ્સ લેવા પર વિચાર કરી રહી છે. જો આવું થાય તો લેપટોપ, PC અને ટેબ્લેટના ભાવમાં તાત્કાલિક ભારે વધારો ટાળી શકાય.

ગ્રાહકોના વર્તનમાં બદલાવ શક્ય

વધતી કિંમતોને કારણે મોટી સ્ક્રીન ટીવીનો ટ્રેન્ડ પણ પલટી શકે છે. નિષ્ણાતોના મત મુજબ, ગ્રાહકો 65 ઇંચની જગ્યાએ 55 ઇંચ અથવા 43-50 ઇંચ મોડલ પસંદ કરી શકે છે.

ગેમિંગ અને ઓટો સેક્ટર પણ પ્રભાવિત

મેમરીની અછતને કારણે NVIDIA જેવી કંપનીઓએ કેટલીક ગેમિંગ ચિપ્સ લોન્ચ કરવામાં વિલંબ કર્યો છે. સાથે જ, કાર ઉદ્યોગ પણ પ્રભાવિત થયો છે કારણ કે આધુનિક વાહનોમાં સેમિકન્ડક્ટર અને મેમરી ચિપ્સનો વ્યાપક ઉપયોગ થાય છે.

AI ક્રાંતિ ટેક્નોલોજી માટે નવા દરવાજા ખોલી રહી છે, પરંતુ તેના સાઇડ ઇફેક્ટ રૂપે ગ્રાહકોને ગેજેટ્સ માટે વધુ ખર્ચ કરવો પડી શકે છે.