ફ્લાઇટથી અડધા ભાડામાં લક્ઝરી સફર: લોન્ચ થઈ રહી છે સ્લીપર વંદે ભારત

વડાપ્રધાન નરેન્દ્ર મોદી આજે શનિવારે પશ્ચિમ બંગાળના માલદા ટાઉનથી દેશની પ્રથમ સ્લીપર વંદે ભારત એક્સપ્રેસ ટ્રેનને લીલી ઝંડી બતાવશે. આ ટ્રેન ભારતીય રેલવેના ઇતિહાસમાં એક નવી ક્રાંતિ તરીકે જોવામાં આવી રહી છે. હાઈસ્પીડ, હાઈસેફ્ટી અને લક્ઝરી સુવિધાઓથી સજ્જ આ ટ્રેન લાંબા અંતરની રાત્રિ મુસાફરીને વધુ આરામદાયક બનાવશે.

હાવડા-ગુવાહાટી રૂટ પર દોડશે

સ્લીપર વંદે ભારત ટ્રેન પશ્ચિમ બંગાળના હાવડાથી આસામના ગુવાહાટી (કામાખ્યા) વચ્ચે દોડશે. આ 958 કિલોમીટરનું અંતર ટ્રેન માત્ર 14 કલાકમાં કાપશે. ટ્રેનની મહત્તમ સ્પીડ 180 કિમી પ્રતિ કલાક છે, જે તેને દેશની સૌથી ઝડપી સ્લીપર ટ્રેનોમાં સ્થાન આપે છે.

મુસાફર ક્ષમતા અને કોચ વ્યવસ્થા

આ ટ્રેનમાં કુલ 16 એસી કોચ છે અને કુલ મુસાફર ક્ષમતા 1128 છે. જેમાં

• 11 AC-3 Tier કોચ
• 4 AC-2 Tier કોચ
• 1 First AC કોચ

સમાવવામાં આવ્યા છે. દરેક કોચ લાંબી રાત્રિ મુસાફરીને ધ્યાનમાં રાખીને ખાસ ડિઝાઇન કરવામાં આવ્યો છે.

ભાડું પણ સામાન્ય મુસાફરોને અનુકૂળ

સ્લીપર વંદે ભારતનું ભાડું હવાઈ મુસાફરીની સરખામણીમાં ઘણું ઓછું રાખવામાં આવ્યું છે.

• Third AC ભાડું: ₹2,300
• Second AC ભાડું: ₹3,000
• First AC ભાડું: આશરે ₹3,600

રેલમંત્રીએ જણાવ્યું હતું કે હાવડા-ગુવાહાટી રૂટ પર સામાન્ય રીતે ફ્લાઇટ ભાડું ₹6,000થી ₹8,000 સુધી હોય છે અને ક્યારેક ₹10,000 સુધી પણ પહોંચી જાય છે. આવી સ્થિતિમાં વંદે ભારત સ્લીપર ટ્રેન સામાન્ય મુસાફરો માટે મોટું રાહતરૂપ સાબિત થશે.

એક્સટિરિયર ડિઝાઇન

વંદે ભારત સ્લીપર ટ્રેનનું એક્સટિરિયર એરોડાયનેમિક બોડી સાથે બનાવવામાં આવ્યું છે. સેમી-પર્મેનન્ટ કપલર્સ અને એન્ટી-ક્લાઇમ્બર્સથી ટ્રેનને ટક્કર દરમિયાન વધુ સુરક્ષિત બનાવવામાં આવી છે. ફ્રન્ટ લુક હાઈસ્પીડ મુસાફરીને અનુરૂપ આકર્ષક અને આધુનિક દેખાય છે.

ઇન્ટીરિયર લક્ઝરી અને આરામ

ટ્રેનના તમામ કોચમાં પહોળી બર્થ, વધુ જગ્યા અને આરામદાયક કુશનિંગ આપવામાં આવ્યું છે.

• First AC કોચમાં ઉપરની બર્થ સુધી જવા માટે સીડીઓ
• Second ACમાં વધુ જગ્યાવાળી સીટો
• Third ACમાં મજબૂત સીડી અને આરામદાયક બર્થ
• સાઇડ બર્થ માટે સપોર્ટર
• દિવ્યાંગો માટે વિશેષ બર્થ

બધા કોચનો ઇન્ટીરિયર લુક ખૂબ જ આધુનિક અને પ્રીમિયમ દેખાય છે.

હાઈટેક ફીચર્સ

સ્લીપર વંદે ભારત ટ્રેનને અદ્યતન સુવિધાઓથી સજ્જ કરવામાં આવી છે, જેમાં સામેલ છે:

• કવચ સેફ્ટી સિસ્ટમ
• CCTV કેમેરા
• ઓટોમેટિક દરવાજા
• ઈમર્જન્સી ટોક-બેક સિસ્ટમ
• દરેક સીટ પર રીડિંગ લાઈટ
• મોડર્ન ટોઇલેટ સાથે ગરમ પાણીની સુવિધા
• હાઈટેક પેન્ટ્રી કાર
• બહેતર સસ્પેન્શન સિસ્ટમ

આ તમામ સુવિધાઓ મુસાફરોને સલામત, આરામદાયક અને પ્રીમિયમ અનુભવ આપશે.

ભારતીય રેલવે માટે મોટું પગલું

વંદે ભારત સ્લીપર ટ્રેન માત્ર એક નવી ટ્રેન નથી, પરંતુ ભારતીય રેલવે માટે લાંબા અંતરની મુસાફરીમાં નવી દિશા ખોલનાર પ્રોજેક્ટ છે. હાઈ સ્પીડ, ઓછું ભાડું અને લક્ઝરી સુવિધાઓના કારણે આ ટ્રેન ફ્લાઇટનો સસ્તો અને સુરક્ષિત વિકલ્પ બની શકે છે.

દેશની પહેલી સ્લીપર વંદે ભારત ટ્રેન આજે ઉદ્ઘાટન સાથે જ મુસાફરોમાં ભારે ઉત્સાહ જોવા મળી રહ્યો છે.