અમેરિકા-ઇઝરાયલ અને યુરોપ સામે ઈરાન સજ્જ! રાષ્ટ્રપતિનું કડક નિવેદન– હવે પહેલા કરતા વધુ મજબૂત છીએ

‘આ દબાણ 1980-88ના ઈરાન-ઈરાક યુદ્ધથી પણ વધુ ખતરનાક’

ઈરાનના રાષ્ટ્રપતિ મસૂદ પેઝેશકિયાનએ શનિવારે કહ્યું કે ઈરાન હાલ અમેરિકા, ઇઝરાયલ અને યુરોપ સાથે સંપૂર્ણપણે યુદ્ધ જેવી સ્થિતિમાં છે. આ નિવેદન ઈરાનના સુપ્રીમ લીડર આયાતુલ્લા અલી ખામેનેઈની સત્તાવાર વેબસાઇટ પર પ્રકાશિત કરવામાં આવ્યું છે.

રાષ્ટ્રપતિએ આ સંઘર્ષને 1980-88ના ઈરાન-ઈરાક યુદ્ધ કરતાં પણ વધુ જટિલ અને ખતરનાક ગણાવ્યો. તેમણે કહ્યું કે હાલનું યુદ્ધ માત્ર સૈન્ય નહીં પરંતુ આર્થિક, રાજકીય અને માનસિક દબાણના અનેક મોરચાઓ પર ચાલી રહ્યું છે.

‘આ પરંપરાગત યુદ્ધ નથી, દરેક તરફથી દબાણ છે’

પેઝેશકિયાને જણાવ્યું કે,

“આ પરંપરાગત યુદ્ધ કરતાં ઘણી વધારે મુશ્કેલ સ્થિતિ છે. આર્થિક પ્રતિબંધો, સૈન્ય ધમકીઓ અને રાજકીય દબાણ—બધી તરફથી હુમલો થઈ રહ્યો છે.”

આ નિવેદન એવા સમયે આવ્યું છે જ્યારે ઇઝરાયલના વડાપ્રધાન બેન્જામિન નેતન્યાહુ અમેરિકા ના પૂર્વ રાષ્ટ્રપતિ ડોનાલ્ડ ટ્રમ્પને ફ્લોરિડાના માર-એ-લાગો રિસોર્ટમાં મળવાના છે. આ બેઠકમાં ઈરાનનો પરમાણુ કાર્યક્રમ અને સંભવિત સૈન્ય કાર્યવાહી મુખ્ય મુદ્દા રહેશે.

‘દુશ્મનો આંતરિક ફૂટ પાડવા માગે છે’

રાષ્ટ્રપતિ પેઝેશકિયાને ઈરાનની જનતાને રાષ્ટ્રીય એકતા જાળવી રાખવા અપીલ કરી. તેમણે કહ્યું કે દુશ્મન દેશો ઈરાનમાં આંતરિક વિભાજન ઊભું કરવા પ્રયત્ન કરી રહ્યા છે, પરંતુ દેશે એકજૂટ રહેવાની જરૂર છે.

અમેરિકા અને તેના સહયોગીઓ ઈરાન પર પરમાણુ હથિયાર બનાવવાનો આરોપ લગાવતા આવ્યા છે, જોકે ઈરાન સતત આ આરોપોને નકારી રહ્યો છે અને કહે છે કે તેનો પરમાણુ કાર્યક્રમ શાંતિપૂર્ણ હેતુઓ માટે છે.

ટ્રમ્પની ‘મેક્સિમમ પ્રેશર’ નીતિ ફરી શરૂ

જાન્યુઆરી 2025માં ફરી સત્તામાં આવ્યા બાદ, ડોનાલ્ડ ટ્રમ્પે ‘મેક્સિમમ પ્રેશર’ નીતિ ફરી અમલમાં મૂકી છે. આ અંતર્ગત ઈરાનના તેલ નિકાસને શૂન્ય કરવા અને વધુ કડક પ્રતિબંધો લગાવવામાં આવ્યા છે.

ફ્રાન્સ, જર્મની અને બ્રિટને પણ સપ્ટેમ્બર મહિનામાં સંયુક્ત રાષ્ટ્રના પ્રતિબંધો ફરી લાગુ કર્યા, જે 2015ના પરમાણુ કરાર બાદ હટાવવામાં આવ્યા હતા. આ પગલાંઓથી ઈરાનની અર્થવ્યવસ્થા પર ભારે દબાણ પડ્યું છે.

‘ઈરાનની સેના હવે પહેલા કરતાં વધુ મજબૂત’

રાષ્ટ્રપતિ પેઝેશકિયાને દાવો કર્યો કે જૂનના હુમલાઓ છતાં ઈરાનની સેના વધુ મજબૂત બની છે. તેમણે કહ્યું,

“અમારી સેના હથિયારો અને માનવશક્તિ બંનેમાં મજબૂત છે. જો ફરી હુમલો થશે તો કડક જવાબ આપવામાં આવશે.”

જૂન 2025માં ઈરાન-ઇઝરાયલ વચ્ચે 12 દિવસનું યુદ્ધ

જૂન 2025માં ઈરાન અને ઇઝરાયલ વચ્ચે 12 દિવસનું સીધું યુદ્ધ થયું હતું. ઇઝરાયલે ઈરાનના સૈન્ય અને પરમાણુ ઠેકાણાઓ પર હુમલા કર્યા હતા.

આ સંઘર્ષમાં ઈરાનમાં 1000થી વધુ લોકોના મોત થયા હતા, જ્યારે ઈરાનની મિસાઈલ હુમલામાં ઇઝરાયલમાં 28 લોકો માર્યા ગયા હતા.

પછી અમેરિકા પણ યુદ્ધમાં જોડાયું અને નતાન્ઝ, ફોર્ડો અને ઇસ્ફહાન જેવા ઈરાનના મુખ્ય પરમાણુ કેન્દ્રો પર બોમ્બમારો કર્યો. ત્યારબાદ અમેરિકી મધ્યસ્થીથી સીઝફાયર લાગુ થયો.

ખામેનેઈને મારવાની યોજના અંગે વિવાદ

યુદ્ધ બાદ ટ્રમ્પે દાવો કર્યો હતો કે તેમણે ઈરાનના સુપ્રીમ લીડર આયાતુલ્લા અલી ખામેનેઈની હત્યા અટકાવી. બીજી તરફ, ઇઝરાયલના રક્ષા મંત્રી ઇઝરાયલ કાટ્ઝે કહ્યું હતું કે ખામેનેઈને નિશાન બનાવવાની યોજના હતી, પરંતુ તેઓ ક્યાં છુપાયા હતા તે જાણવા મળ્યું નહીં.