‘લાલ પરી’ બની કિંજલ દવેની એન્ટ્રી, અમદાવાદમાં ગ્રાન્ડ સગાઈ રિસેપ્શન યોજાયું

અમદાવાદમાં કિંજલ દવે–ધ્રુવીન શાહની સગાઈનું ગ્રાન્ડ રિસેપ્શન, સેલિબ્રિટીઓ સાથે ગરબાની ધૂમ

ગુજરાતી લોકપ્રિય સિંગર કિંજલ દવે અને ધ્રુવીન શાહની સગાઈ બાદ 20 ડિસેમ્બરે અમદાવાદમાં ભવ્ય રિસેપ્શનનું આયોજન કરવામાં આવ્યું હતું. આ રિસેપ્શનમાં ગુજરાતી મનોરંજન જગતના અનેક જાણીતા કલાકારો હાજર રહી કપલને શુભેચ્છા પાઠવી હતી. ખાસ વાત એ હતી કે, રિસેપ્શનમાં હાજર ખજૂરભાઈ (નીતિન જાની) સહિતના સેલિબ્રિટીઓએ કિંજલ અને ધ્રુવીન સાથે ગરબે ઘૂમીને મહેફિલમાં ચાર ચાંદ લગાવ્યા હતા.

YMCA ક્લબ ખાતે ભવ્ય આયોજન

અમદાવાદના એસ.જી. હાઈવે પર આવેલી જાણીતી YMCA ક્લબ ખાતે આ ગ્રાન્ડ રિસેપ્શન યોજાયું હતું. પ્રસંગે કિંજલ દવે લાલ રંગની સાડીમાં અત્યંત આકર્ષક લાગી રહી હતી, જ્યારે તેના મંગેતર ધ્રુવીન શાહે પણ તેની સાથે ભવ્ય એન્ટ્રી કરી સૌનું ધ્યાન ખેંચ્યું હતું.

ગુજરાતી કલાકારોનો જમાવડો

આ રિસેપ્શન માત્ર પારિવારિક સમારોહ ન રહેતા ગુજરાતી ફિલ્મ અને સંગીત જગતનું સ્નેહમિલન બની ગયું હતું. કાર્યક્રમમાં
ગીતા રબારી, વિક્રમ ઠાકોર, રાકેશ બારોટ, જીગ્નેશ બારોટ, ઉર્વશી રાદડિયા, અલ્પા પટેલ, કાજલ મહેરિયા, હિતુ કનોડિયા, મોનલ ગજ્જર, તત્સત અને આરોહી, કુશલ મિસ્ત્રી, ખજૂર (નીતિન જાની), તરુણ જાની, ‘લાલો’ ફિલ્મની ટીમ, જતીન અને પાર્થ (પરમ મિત્ર ટીમ) સહિત અનેક જાણીતા કલાકારો હાજર રહ્યા હતા.

ગરબાની મહેફિલે જમાવ્યો રંગ

રિસેપ્શનના અંતિમ પડાવમાં કિંજલ દવે, ધ્રુવીન શાહ અને તમામ સેલિબ્રિટી મહેમાનો મન મૂકીને ગરબે ઘૂમ્યા હતા. ગુજરાતી સંગીતના તાલે આખી સાંજ ગુંજી ઉઠી હતી અને મહેફિલમાં એક અલગ જ ઉત્સાહ અને રોનક જોવા મળી હતી.

વિવાદોની વચ્ચે ખુશીની ઉજવણી

ઉલ્લેખનીય છે કે, કિંજલ દવેની સગાઈ છેલ્લા કેટલાક સમયથી ચર્ચાનો વિષય રહી છે. અગાઉ ઊભા થયેલા કેટલાક સામાજિક વિવાદો અને વિરોધને કારણે આ મુદ્દો સોશિયલ મીડિયા પર પણ ચર્ચાયો હતો. જોકે, આ તમામ બાબતોને બાજુ પર રાખીને કિંજલ અને તેના પરિવારે આ ખુશીના અવસરને ધામધૂમથી ઉજવીને પોતાના નવા જીવનના આરંભને ઉજાસભર્યો બનાવ્યો હતો.