“UNESCOએ દિવાળીને અમૂર્ત વિશ્વ ધરોહર જાહેર કર્યું, દિલ્હી ખાતે ઉજવણી, “વૈશ્વિક લોકપ્રિયતા વધશે: PM મોદી”

UNESCOએ દિવાળીને ઇન્ટેન્જિબલ કલ્ચરલ હેરિટેજ (Intangible Cultural Heritage) કે અમૂર્ત વિશ્વ ધરોહર યાદીમાં સામેલ કરી છે. બુધવારે UNESCOએ આ જાહેરાત કરી અને ભારતને અભિનંદન પાઠવ્યાં. સાથે જ ઘાના, જ્યોર્જિયા, કોંગો, ઇથોપિયા અને ઇજિપ્ત જેવા અનેક દેશોના સાંસ્કૃતિક પ્રતીકો પણ આ યાદીમાં જોડાયા છે.

આ નિર્ણય એવા સમયે આવ્યો છે જ્યારે દિલ્હી UNESCOની ઇન્ટર-ગવર્નમેન્ટલ કમિટી ફોર ઇન્ટેન્જિબલ હેરિટેજની 20મી બેઠકનું યજમાની કરી રહી છે, જે 8થી 13 ડિસેમ્બર સુધી ચાલી રહી છે. કેન્દ્ર સરકારે 10 ડિસેમ્બરે વિશેષ દીપાવલી સમારોહ યોજવાનો નિર્ણય કર્યો છે, જેથી વિશ્વ સમક્ષ ભારતની સાંસ્કૃતિક ઓળખ મજબૂત રીતે રજૂ થાય.

PM મોદીના નિવેદન:

”અમારા માટે દિવાળી અમારી સંસ્કૃતિ અને નૈતિકતા સાથે અત્યંત ગાઢ રીતે જોડાયેલી છે. એ અમારી સભ્યતાનો આત્મા છે. એ પ્રકાશ અને ધર્મનું પ્રતીક છે. દિવાળીને યુનેસ્કોની અમૂર્ત સાંસ્કૃતિક ધરોહરની યાદીમાં સામેલ કરવાથી આ તહેવારની વૈશ્વિક લોકપ્રિયતામાં વધુ વધારો થશે. પ્રભુ શ્રીરામના આદર્શો આપણને સદા માર્ગદર્શન આપતા રહે.”

દિલ્હીમાં ઉજવણી:

• મુખ્ય કાર્યક્રમ સ્થળ લાલ કિલ્લો રહેશે, જ્યાં વિદેશી મહેમાનો અને ઉચ્ચ અધિકારીઓ દીવા પ્રગટાવશે અને સાંસ્કૃતિક કાર્યક્રમોમાં ભાગ લેશે.
• આખા શહેરમાં તમામ સરકારી ઇમારતો શણગારવામાં આવશે.
• દિલ્હી હાટમાં ખાસ કાર્યક્રમો યોજાશે.
• મંગળવારે રાત્રે દિલ્હી સચિવાલયને ત્રિરંગી રંગની રોશનીથી ઝગમગાવવામાં આવ્યું.

દિલ્હી સરકાર અને કેન્દ્ર સરકારનું હેતુ દિવાળીને “અંધકારથી પ્રકાશ તરફ” લઈ જતાં વૈશ્વિક સંદેશ તરીકે રજૂ કરવાનો છે. લોકો પણ આ ઐતિહાસિક સમારોહમાં ભાગ લે અને તહેવારને ઉજવવા અપીલ કરવામાં આવી છે.

ભારતની અન્ય ધરોહરો:
ભારતની પહેલેથી જ 15 ધરોહરો UNESCOની આ યાદીમાં સામેલ છે. જેમાં દુર્ગાપૂજા, કુંભ મેળો, વૈદિક મંત્રોચ્ચાર, રામલીલા અને છઉ નૃત્યનો સમાવેશ થાય છે.