કોમનવેલ્થ ગેમ્સ તૈયારીઓમાં મોટેરા વિસ્તારમાં મકાન ડિમોલિશન,પોલીસ બંદોબસ્ત વચ્ચે કામગીરી

કોમનવેલ્થ ગેમ્સ પહેલાં મોદી સ્ટેડિયમની આસપાસ TI રોડ ખુલ્લો કરવા મકાન ડિમોલિશન શરૂ

અમદાવાદ: આગામી કોમનવેલ્થ ગેમ્સની તૈયારીમાં અમદાવાદ શહેરને સ્પોર્ટ્સ સિટી બનાવવા માટે મોટેરા વિસ્તારમાં નરેન્દ્ર મોદી સ્ટેડિયમની બાજુમાંથી પસાર થનારા ટીપી રોડને ખુલ્લો કરવા મ્યુનિસિપલ કોર્પોરેશન દ્વારા ડિમોલિશનની કામગીરી આજે 29 નવેમ્બરના રોજ શરૂ કરવામાં આવી છે. બળદેવનગરમાં આવેલા 29 મકાનો સવારથી તોડી દેવાયા છે, અને સાંજ સુધીમાં તમામ મકાન ધ્વસ્ત કરવામાં આવશે. આ કામગીરી સાબરમતી પોલીસના ચુસ્ત બંદોબસ્ત હેઠળ કરવામાં આવી રહી છે.

મુખ્યત્વે મકાનોને નોટિસ આપી ખાલી કરવાની સૂચના આપવામાં આવી હતી, પરંતુ રહીશો મકાન ખાલી ન કરતાં હાઇકોર્ટમાં અરજી કરવામાં આવી હતી, જે બાદ હાઇકોર્ટે ડિમોલિશન માટે મંજૂરી આપી દીધી. મકાનો ખાલી કરાવ્યા બાદ મ્યુનિસિપલ કોર્પોરેશનના પશ્ચિમ ઝોનના એસ્ટેટ વિભાગ દ્વારા 4 હિટાચી મશીન, બે જેસીબી અને મજૂરો સાથે ડિમોલિશન શરૂ કરવામાં આવ્યું.

ડિમોલિશન બાદ 24 મીટર પહોળાઈનો ટીપી રોડ ખુલ્લો કરવામાં આવશે. આ રોડ સીધો નરેન્દ્ર મોદી સ્ટેડિયમ પાસે કોમનવેલ્થ ગેમ્સ માટે બનનારા એકવાટિક સ્ટેડિયમ સુધી પહોંચી શકે છે, જેથી સ્ટેડિયમ નજીકની ટ્રાફિક સરળ અને વ્યવસ્થિત રહેશે.

આગામી કોમનવેલ્થ ગેમ્સને ધ્યાનમાં રાખી, મોટેરાના નરેન્દ્ર મોદી સ્ટેડિયમની પાછળ કરોડોના ખર્ચે નવું SVP એન્કલેવ બનાવવાનું છે. તે માટે આસપાસના વિસ્તારને ડેવલપ કરવાની કામગીરી પણ શરૂ કરી દેવામાં આવી છે.

આ પહેલાં, સવારથી જ 15 જેટલાં મકાન તોડી દેવામાં આવ્યા છે અને સાંજ સુધીમાં બાકીના તમામ 29 મકાનો પણ ધ્વસ્ત કરવામાં આવશે.