અક્ષરે પત્ની મેહા સાથે નડિયાદના નવા ઘરમાં ગૃહપ્રવેશ કર્યો, દીકરાના નામ પરથી બંગલાનું નામ ‘હક્ષ વિલા’ રાખ્યું

ટીમ ઈન્ડિયાના સ્ટાર અક્ષર પટેલનો ગૃહપ્રવેશ: નડિયાદમાં પત્ની મેહા સાથે નવા શાનદાર બંગલામાં પ્રવેશ

ટીમ ઈન્ડિયાના સ્ટાર ઓલરાઉન્ડર અક્ષર પટેલ મેદાન પર જેટલો સફળ બની રહ્યો છે, એટલો જ તેની પર્સનલ લાઈફમાં પણ આગળ વધી રહ્યો છે. ગયા વર્ષે તેણે ભારતને T20 વર્લ્ડ કપ જીતાડવામાં મહત્વની ભૂમિકા ભજવી હતી, અને હવે જીવનના એક નવા અધ્યાયની શરૂઆત કરી છે. સાઉથ આફ્રિકા સામેની બે ટેસ્ટ મેચોની સિરીઝની શરૂઆત પહેલાં અક્ષર પટેલે પોતાની પત્ની મેહા પટેલ સાથે નડિયાદમાં આવેલ પોતાના નવા, આકર્ષક અને આધુનિક બંગલાનો ગૃહપ્રવેશ કર્યો. પરિવાર અને નજીકના સગાં–વહાલાઓની હાજરીમાં આ શુભ પ્રસંગ ઉજવાયો.

નવા બંગલાને વિશેષ બનાવતો એક વધુ મુદ્દો એ છે કે અક્ષરે તેને પોતાના દીકરાના નામ પરથી ‘હક્ષ વિલા’ નામ આપ્યું છે. ઘરનું નામકરણ પરિવારની લાગણીઓ સાથે જોડાયેલો અનોખો સ્પર્શ આપે છે. ક્રિકેટ કારકિર્દી અને પરિવારિક જીવન, બંનેમાં અક્ષર સતત પ્રગતિ કરતાં હવે નડિયાદમાં એની આ નવી શરૂઆતને લઈને ચાહકોમાં પણ ખુશીના મોજાં જોવા મળી રહ્યા છે.

દીકરાના નામ પર રાખ્યું ઘરનું નામ ‘Haksh Villa’

અક્ષર અને મેહાએ પોતાના નવા ઘરનું નામ ‘Haksh Villa’ રાખ્યું છે, જે તેમના દીકરા હક્શના નામ પરથી રાખવામાં આવ્યું છે. ડિસેમ્બર 2024માં જન્મેલા દીકરાના નામ પર ઘરનું નામ રાખવું આ કપલ માટે ખૂબ જ ઇમોશનલ મોમેન્ટ રહી. અક્ષર અને મેહાના નવા ઘરનો ગૃહપ્રવેશનો કાર્યક્રમ 12 નવેમ્બર 2025ના રોજ થયો, જ્યાં પરિવારે અને નજીકના મિત્રો સાથે તેમણે પરંપરાગત વાસ્તુ પૂજા કરીને ઘરમાં પ્રવેશ કર્યો.

ગૃહપ્રવેશના ખાસ પળો સોશિયલ મીડિયા પર વાયરલ:

ટીમ ઈન્ડિયાના ઓલરાઉન્ડર અક્ષર પટેલના નડિયાદ સ્થિત નવા બંગલાના ગૃહપ્રવેશના પળો સોશિયલ મીડિયા પર છવાઈ ગયા છે. પત્ની મેહા પટેલે પોતાના ઇન્સ્ટાગ્રામ સ્ટોરીઝ પર ગૃહપ્રવેશની અનેક તસવીરો અને વીડિયો શેર કર્યા છે, જેને ચાહકો તરફથી વખાણ મળી રહ્યા છે. તસવીરોમાં અક્ષર પારંપરિક કુર્તા–પાયજામામાં દેખાઈ રહ્યો છે, જ્યારે મેહા સુંદર ટ્રેડિશનલ સાડીમાં ગૃહપ્રવેશની વિધિ કરતા નજરે પડે છે. બંનેને નવા ઘરમાં ખુશીના પળો સાથે જોઈ ચાહકોમાં પણ આનંદ છલકાયો છે. અક્ષરના બંગલાનું ઇન્ટિરિયર ખાસ ધ્યાન ખેંચે એવા છે. ઘરને મોડર્ન ડિઝાઇન સાથે ટ્રેડિશનલ ટચ આપીને શાનદાર રીતે તૈયાર કરવામાં આવ્યું છે. દિવાલો, લાઇટિંગ, ફર્નિચર અને ડેકોર દરેક જગ્યાએ એલીગન્સ અને ક્લાસિક લુકનું સુંદર મિશ્રણ જોવા મળે છે.

અક્ષર પટેલના પરિવારની આ નવી શરૂઆતની ઝલક સોશિયલ મીડિયા પર ખુબ વાયરલ થઈ રહી છે, અને ચાહકો તરફથી શુભેચ્છાઓનો વરસાદ વરસી રહ્યો છે.

બાળપણની યાદો સાથે જોડાયેલું છે ઘર

અક્ષરે તાજેતરમાં સ્પોર્ટ્સ જર્નાલિસ્ટ વિમલ કુમારને આપેલા ઇન્ટરવ્યૂમાં જણાવ્યું હતું કે તેને નડિયાદમાં પોતાના જૂના ઘરના દિવસોની યાદ ખૂબ આવે છે. ત્યાં તેઓ મિત્રો સાથે ગલી ક્રિકેટ રમતો હતો. હવે જ્યારે તે જ છોકરો ઈન્ટરનેશનલ સ્તરે ભારતનું પ્રતિનિધિત્વ કરી રહ્યો છે અને પોતાના પરિવાર સાથે એ જ શહેરમાં નવું ઘર બનાવી રહ્યો છે.