યુદ્ધ ફરી ભડક્યું: અમેરિકાનો ઈરાન પર એરસ્ટ્રાઈક, જવાબમાં બહેરીન સ્થિત અમેરિકી બેઝ પર ઈરાનનો હુમલો

મધ્ય પૂર્વમાં તણાવ ફરી એકવાર ચરમસીમાએ પહોંચ્યો છે. અમેરિકાએ મંગળવારે રાત્રે ઈરાનના અનેક સૈન્ય ઠેકાણાઓ પર હવાઈ હુમલા કર્યા હતા. અમેરિકી સેન્ટ્રલ કમાન્ડ (CENTCOM) અનુસાર, આ કાર્યવાહી હોર્મુઝ સ્ટ્રેટ નજીક અમેરિકી AH-64 અપાચે હેલિકોપ્ટર દુર્ઘટનાગ્રસ્ત થયા બાદ અને ક્ષેત્રમાં અમેરિકી દળો પર થયેલા હુમલાઓના જવાબમાં કરવામાં આવી હતી.

અમેરિકી રાષ્ટ્રપતિ ડોનાલ્ડ ટ્રમ્પે દાવો કર્યો હતો કે ઈરાને અમેરિકી અપાચે હેલિકોપ્ટરને તોડી પાડ્યું હતું. જોકે હેલિકોપ્ટરના બંને પાયલટોને સુરક્ષિત રીતે બચાવી લેવામાં આવ્યા હતા. ટ્રમ્પે સોશિયલ મીડિયા પર લખ્યું કે અમેરિકા આ હુમલાનો જવાબ આપ્યા વિના નહીં રહે.

અમેરિકી વાયુસેના અને નૌકાદળે હોર્મુઝ સ્ટ્રેટ નજીક ઈરાનના એર ડિફેન્સ સિસ્ટમ, ગ્રાઉન્ડ કંટ્રોલ સ્ટેશન અને રડાર મથકોને નિશાન બનાવી ચોક્કસ હવાઈ હુમલા કર્યા હોવાનું CENTCOMએ જણાવ્યું છે.

બહેરીનમાં અમેરિકી ફિફ્થ ફ્લીટ પર ડ્રોન હુમલાનો દાવો

અમેરિકી હુમલાના કલાકો બાદ ઈરાનની રેવોલ્યુશનરી ગાર્ડ (IRGC)એ જવાબી કાર્યવાહીનો દાવો કર્યો. ઈરાનના સરકારી મીડિયાના જણાવ્યા અનુસાર, IRGCએ બહેરીનમાં સ્થિત અમેરિકી નૌકાદળના ફિફ્થ ફ્લીટ મુખ્યાલય અને અન્ય સૈન્ય ઠેકાણાઓને ડ્રોન દ્વારા નિશાન બનાવ્યા હતા.

બહેરીનમાં એર રેડ સાયરન વાગ્યા હતા અને ગૃહ મંત્રાલયે લોકોને સુરક્ષિત સ્થળોએ જવાની સલાહ આપી હતી. જોકે અમેરિકી સેનાએ હજુ સુધી ફિફ્થ ફ્લીટ પર હુમલાની સત્તાવાર પુષ્ટિ કરી નથી.

જોર્ડન અને ખાડી દેશોમાં પણ વધ્યો તણાવ

ઈરાને દાવો કર્યો છે કે તેણે જોર્ડનમાં આવેલા અમેરિકી સૈન્ય ઠેકાણાઓ તેમજ એક એરબેઝ પર લાંબા અંતરની મિસાઈલોથી હુમલો કર્યો હતો. IRGCના જણાવ્યા અનુસાર આ હુમલામાં F-35 લડાકુ વિમાનોના હેંગર અને કમાન્ડ સેન્ટરને નુકસાન પહોંચાડવામાં આવ્યું.

બીજી તરફ જોર્ડનની સેનાએ જણાવ્યું કે તેણે ઈરાન તરફથી છોડવામાં આવેલી પાંચ મિસાઈલોને હવામાં જ તોડી પાડી હતી. આ હુમલામાં કોઈ જાનહાનિ થઈ નથી.

ઈરાનની ચેતવણી: સુરક્ષિત રહેવું હોય તો વિસ્તાર છોડો

ઈરાનના વિદેશ મંત્રી અબ્બાસ અરાઘચીએ અમેરિકાને કડક ચેતવણી આપતાં કહ્યું કે જો અમેરિકા સુરક્ષિત રહેવા માંગતું હોય તો તેણે આ વિસ્તાર છોડી દેવો જોઈએ. તેમણે જણાવ્યું કે ઈરાનની સેનાઓ દરેક હુમલાનો મજબૂત જવાબ આપશે.

અરાઘચીએ કહ્યું કે અમેરિકાએ ઈરાનની ક્ષમતાને ઓછી આંકવાની ભૂલ કરી છે અને જો હુમલાઓ ચાલુ રહેશે તો જવાબ વધુ કડક હશે.

હેલિકોપ્ટર દુર્ઘટનાને લઈને વિવાદ

અપાચે હેલિકોપ્ટર કેવી રીતે પડ્યું તે અંગે વિવાદ સર્જાયો છે. ટ્રમ્પે ઈરાનને જવાબદાર ગણાવ્યું છે, જ્યારે કેટલાક અમેરિકી અધિકારીઓના જણાવ્યા અનુસાર હેલિકોપ્ટર ઈરાની ડ્રોન સાથે અથડાયા બાદ દુર્ઘટનાગ્રસ્ત થયું હોઈ શકે છે. ઘટનાની તપાસ હજુ ચાલુ છે.

તેલના ભાવમાં ફરી તેજી

અમેરિકા-ઈરાન તણાવ વધતાં વૈશ્વિક બજારમાં કાચા તેલના ભાવમાં ફરી વધારો જોવા મળ્યો છે. બ્રેન્ટ ક્રૂડ લગભગ 1 ટકા વધીને 92 ડોલર પ્રતિ બેરલની નજીક પહોંચી ગયું છે, જ્યારે WTI ક્રૂડ પણ 89 ડોલર પ્રતિ બેરલ આસપાસ કારોબાર કરી રહ્યું છે.

વિશ્લેષકોનું માનવું છે કે જો હોર્મુઝ સ્ટ્રેટ આસપાસનો સંઘર્ષ વધુ વધશે તો વૈશ્વિક ઊર્જા પુરવઠા પર અસર પડી શકે છે અને તેલના ભાવમાં વધુ વધારો થઈ શકે છે.

ઈઝરાયલની પણ ચેતવણી

ઈઝરાયલી સેનાના પ્રમુખ એયાલ જામિરે કહ્યું છે કે જો જરૂરી બનશે તો ઈઝરાયલ ફરી ઈરાન પર હુમલો કરશે. તેમના મુજબ તાજેતરની કાર્યવાહી માત્ર શરૂઆત હતી અને ઈઝરાયલ કોઈપણ ખતરાનો જવાબ આપવા સંપૂર્ણપણે તૈયાર છે.

મધ્ય પૂર્વમાં અમેરિકા, ઈરાન અને ઈઝરાયલ વચ્ચે વધતા તણાવને કારણે સમગ્ર વિશ્વની નજર હવે આગામી દિવસોમાં થનારી સૈન્ય અને રાજકીય ઘટનાઓ પર ટકેલી છે.