સુરત SOG પોલીસે 19 જાન્યુઆરીના રોજ લસકાણા વિસ્તારમાંથી કોબ્રા સાપના 5.85 કરોડ રૂપિયાની કિંમતના ઝેર સાથે સાત આરોપીઓને રંગેહાથ ઝડપી પાડ્યા હતા. આ સમગ્ર ગુનાની શરૂઆત અમદાવાદના સોની ઘનશ્યામ સોની અને વડોદરાના વેપારી પ્રશાંત શાહ વચ્ચેની જૂની મિત્રતાથી થઈ હતી.
10 લાખ ઉછીના અને નિષ્ફળ ધંધો
પ્રશાંત શાહ અને તેના સાથી મકરંદે ઘનશ્યામ સોની પાસેથી 10 લાખ રૂપિયા ઉછીના લઈ વડોદરાના પોર GIDC વિસ્તારમાં પ્લાસ્ટિક ઇક્વિપમેન્ટ મેન્યુફેક્ચરિંગનો ધંધો શરૂ કર્યો હતો. જોકે, આ ધંધો નિષ્ફળ ગયો અને બંનેને ભારે આર્થિક નુકસાન સહન કરવું પડ્યું. ધંધો બંધ થતાં તેઓ ઘનશ્યામના રૂપિયા પરત આપી શક્યા નહીં, જેના કારણે તેમની આર્થિક અને સામાજિક સ્થિતિ ખરાબ થવા લાગી.
દેવું ચુકવવા ગુનાખોરી તરફ વળ્યા
ઘનશ્યામ સતત 10 લાખ રૂપિયા પરત માગતો હતો. આવકનું કોઈ સાધન ન હોવાથી પ્રશાંત અને મકરંદ ભારે માનસિક તણાવમાં આવી ગયા. અંતે દેવું ચૂકવવા માટે તેમણે શોર્ટકટ રસ્તો પસંદ કર્યો અને ગુનાખોરી તરફ વળી ગયા.
ઘનશ્યામે આપ્યું કોબ્રા સાપનું ઝેર
મુંબઈથી અમદાવાદ જતા સમયે વડોદરાના જાંબુઆ બ્રિજ પાસે ઘનશ્યામની પ્રશાંત અને મકરંદ સાથે મુલાકાત થઈ હતી. આ મુલાકાતમાં ઘનશ્યામે બંનેને કોબ્રા સાપના ઝેરની બોટલ આપી અને કહ્યું કે આ ઝેર ઇન્ટરનેશનલ માર્કેટમાં કરોડોમાં વેચાય છે. આ ઝેર વેચીને તેઓ પોતાનું દેવું પણ ચૂકવી શકે અને કરોડપતિ પણ બની શકે.
ગ્રાહકો શોધવા આખું નેટવર્ક
ઝેર મળ્યા બાદ પ્રશાંતે પોતાના પરિચિત સમીર અને પ્રવીણને ગ્રાહક શોધવાની જવાબદારી સોંપી. પ્રવીણે વડોદરાના જાણીતા વકીલ કેતન શાહનો સંપર્ક કર્યો. કેતન શાહ પણ કમિશનના લાલચમાં જોડાઈ ગયો. ત્યારબાદ સુરતમાં મેરેજ બ્યુરો ચલાવતા મનસુખને પણ આ ડીલમાં સામેલ કરવામાં આવ્યો.
9.10 કરોડમાં ડીલ ફાઈનલ
મનસુખે ઝેર માટે ગ્રાહક મળ્યો હોવાનો દાવો કર્યો અને આખરે કોબ્રા ઝેરની ડીલ 9.10 કરોડ રૂપિયામાં નક્કી થઈ. આ રકમમાંથી 5 કરોડ રૂપિયા પ્રશાંત, મકરંદ અને ઘનશ્યામને મળવાના હતા, જેમાં ઘનશ્યામના 10 લાખ રૂપિયા અને વ્યાજની ચુકવણી થવાની હતી. બાકીના 4.10 કરોડ રૂપિયા વકીલ કેતન શાહ, સમીર, પ્રવીણ અને મનસુખ વચ્ચે કમિશન તરીકે વહેંચવાના હતા. રકમ હવાલા મારફતે આપવાનું પણ આયોજન કરવામાં આવ્યું હતું.
SOGએ ડમી ગ્રાહક મોકલી પકડ્યા
સુરત SOGના DCP રાજદીપ સિંહ નકુમે જણાવ્યું કે લસકાણાના સહજાનંદ હબમાં જ્યારે આરોપીઓ ડીલ કરવા ભેગા થયા ત્યારે પોલીસે ડમી ગ્રાહક મોકલી છટકું ગોઠવ્યું. ત્યાંથી 5.85 કરોડની બજાર કિંમતનું કોબ્રા સાપનું ઝેર જપ્ત કરી સાત આરોપીઓને ઝડપી લેવામાં આવ્યા.
વન વિભાગે ગુનો નોંધ્યો
ઝડપાયેલા આરોપીઓમાં વકીલ કેતન શાહ, પ્રશાંત, મકરંદ સહિત કુલ સાત લોકો સામેલ છે. સુરત વન વિભાગે વાઈલ્ડલાઈફ પ્રોટેક્શન એક્ટ હેઠળ ગુનો નોંધી તમામ આરોપીઓના રિમાન્ડની કાર્યવાહી શરૂ કરી છે. મુખ્ય સૂત્રધાર ઘનશ્યામ સોનીની પોલીસ શોધખોળ કરી રહી છે.
ઝેર ક્યાંથી આવ્યું? સૌથી મોટું રહસ્ય
આટલું કિંમતી કોબ્રા ઝેર ક્યાંથી આવ્યું તે હજી સુધી સ્પષ્ટ નથી. પોલીસ માને છે કે આ કેસમાં આંતરરાષ્ટ્રીય નેટવર્ક પણ સંડોવાયેલું હોઈ શકે છે અને આગામી દિવસોમાં મોટા ખુલાસા થઈ શકે છે.
સાપના ઝેરનો કાયદેસર અને ગેરકાયદે ઉપયોગ
સાપના ઝેરનો કાયદેસર ઉપયોગ દવાઓ બનાવવા માટે થાય છે, પરંતુ ભારત, મલેશિયા અને ઈન્ડોનેશિયા જેવા દેશોમાં તેનો ગેરકાયદે વેપાર પણ મોટા પાયે થાય છે. ભારતમાં વાઈલ્ડલાઈફ પ્રોટેક્શન એક્ટ 1972 અને ફોરેન ટ્રેડ એક્ટ 1992 હેઠળ સાપના ઝેરની હેરાફેરી ગુનો છે.
નશા માટે પણ થાય છે ઉપયોગ
મેડિકલ રિપોર્ટ્સ અનુસાર, કોબ્રા ઝેર ઓછી માત્રામાં લેવાય તો તે માનવ ચેતાતંત્રને ધીમું કરી નશો પેદા કરે છે. કેટલાક વ્યસની લોકો બ્રાઉન શુગર અને અન્ય ડ્રગ્સથી કંટાળીને સાપના ઝેરનો ઉપયોગ કરે છે. આ ઝેર શરીરમાં પ્રવેશે ત્યારે સેરોટોનિન અને અન્ય પદાર્થો સક્રિય થઈ લાંબી ઊંઘ અને શાંત પ્રતિક્રિયા પેદા કરે છે.
પોલીસ માટે મોટો ચેલેન્જ
આ કેસે સાબિત કરી દીધું છે કે માત્ર 10 લાખના દેવા માટે સામાન્ય વેપારીઓ અને વકીલ પણ કરોડોની ગુનાખોરીમાં ફસાઈ શકે છે. હવે પોલીસ માટે સૌથી મોટો પ્રશ્ન એ છે કે આ ઝેર આવ્યું ક્યાંથી અને આ પાછળનું આખું નેટવર્ક કેટલું મોટું છે.
આ કેસને સુરત SOGની મોટી સફળતા તરીકે જોવામાં આવી રહ્યો છે અને આગામી સમયમાં આ મામલે વધુ મોટા ખુલાસા થવાની શક્યતા છે.
તમામ લેટેસ્ટ ન્યૂઝના અપડેટ્સ સીધા તમારા મોબાઈલ પર મેળવવા માટે, નીચે આપેલા બટન પર ક્લિક કરીને અમારા વોટ્સએપ ગ્રુપમાં જોડાઓ.
Join WhatsApp Group
