વડોદરામાં થાર કાર સાથે શોકિંગ છેતરપિંડી: ભાડે લઈ નવું એન્જિન કાઢી પોતાની ગાડીમાં ફિટ કર્યું, માલિક બોલ્યા- ‘જાણે હૃદય કાઢી લીધું હોય એવો આઘાત’

વડોદરામાં વિશ્વાસને ઝંઝોળી નાખે એવો છેતરપિંડીનો અનોખો કિસ્સો સામે આવ્યો છે. સામાન્ય રીતે ભાડે અપાયેલા વાહનોમાંથી એસેસરીઝ કે નાના-મોટા પાર્ટ્સની ચોરીના બનાવો સામે આવતા હોય છે, પરંતુ આ વખતે ગઠિયાએ આખેઆખું થાર કારનું એન્જિન જ બદલી નાખ્યું હોવાનો ચોંકાવનારો ખુલાસો થયો છે. આરોપીએ ભાડે લીધેલી નવી થારમાંથી એન્જિન કાઢીને પોતાની જૂની થારમાં ફિટ કરી દીધું અને પોતાની ગાડીનું જૂનું એન્જિન ભાડાની થારમાં લગાવી પરત કરી દીધી હોવાનું સામે આવ્યું છે.

15 લાખની થાર ભાડે આપી, પરત મળતા જ થયો શંકાસ્પદ અનુભવ

વડોદરાના રહેવાસી અને સેલ્ફ ડ્રાઇવ માટે કાર ભાડે આપતા આકાશ ભગતે પોતાની અંદાજે 15 લાખ રૂપિયાની મહિન્દ્રા થાર પોતાના મિત્ર મેહુલ પરમાર મારફતે ક્રિષ્ના પાંડેને 14થી 17 જુલાઈ દરમિયાન દરરોજ રૂ.4,000ના ભાડે આપી હતી.

17 જુલાઈએ જ્યારે કાર પરત મળી ત્યારે આકાશ ભગતને થારમાંથી અસામાન્ય અવાજ આવતો હોવાનું જણાયું. કાર 40 કિમી પ્રતિ કલાકથી વધુ ઝડપે ચાલી શકતી નહોતી. કાર પરત લાવનાર વ્યક્તિએ યુરિયાની સમસ્યા હોવાનું કહી મામલો ટાળવાનો પ્રયાસ કર્યો હતો.

ગેરેજમાં થયો મોટો ખુલાસો

સમસ્યા દૂર ન થતાં આકાશ ભગતે કારને ગેરેજમાં તપાસ માટે મોકલી હતી. ત્યાં તપાસ દરમિયાન મિકેનિક પણ આશ્ચર્યચકિત થઈ ગયા હતા. તપાસમાં જાણવા મળ્યું કે થારનું મૂળ એન્જિન કાઢી તેની જગ્યાએ બીજી જૂની થારનું એન્જિન ફિટ કરવામાં આવ્યું હતું.

આકાશ ભગતે જ્યારે RC બુકમાં નોંધાયેલા એન્જિન નંબરની સરખામણી કારમાં લાગેલા એન્જિન નંબર સાથે કરી ત્યારે બંને નંબર અલગ હોવાનું સામે આવ્યું. ત્યારબાદ તેમણે ક્રિષ્ના પાંડેનો સંપર્ક કરવાનો પ્રયાસ કર્યો, પરંતુ તેણે ફોન ઉપાડવાનું બંધ કરી દીધું.

GPSથી ખુલ્યું સમગ્ર કાવતરું

કારમાં લાગેલા GPSની મદદથી આકાશ ભગતે વાહનની મૂવમેન્ટ તપાસી હતી. લોકેશનના આધારે કાર એક ગેરેજમાં લઈ જવામાં આવી હોવાનું જાણવા મળ્યું. ફરિયાદી ગેરેજ પર પહોંચ્યા અને સંચાલકની પૂછપરછ કરતાં સમગ્ર કાવતરાનો પર્દાફાશ થયો.

ગેરેજ સંચાલકે પોલીસ સમક્ષ કબૂલ્યું કે સન્નીસિંઘ નામનો વ્યક્તિ થાર લઈને આવ્યો હતો. તેની પોતાની જૂની થાર પહેલેથી જ ગેરેજમાં ઉભી હતી અને બંને વાહનોના એન્જિન બદલવાનું કામ કરાવ્યું હતું. આ કામગીરી માટે ગેરેજને રૂ.15 હજાર ચૂકવવામાં આવ્યા હતા.

‘જાણે જીવતા માણસનું હૃદય કાઢી લીધું હોય’

ભાસ્કર સાથે વાતચીત દરમિયાન ફરિયાદી આકાશ ભગતે પોતાની લાગણી વ્યક્ત કરતાં કહ્યું કે, “કારનું એન્જિન એટલે તેનું હૃદય. કોઈએ જાણે જીવતા માણસના શરીરમાંથી હૃદય કાઢી લીધું હોય એવો મને આઘાત લાગ્યો છે.”

તેમણે જણાવ્યું કે ભાડે કાર આપતા લોકો માટે આ ઘટના મોટી ચેતવણી સમાન છે.

એન્જિન બદલવું કાનૂની રીતે ગંભીર ગુનો

ઓટોમોબાઇલ નિષ્ણાતોના જણાવ્યા મુજબ દરેક વાહનના ચેસિસ નંબર અને એન્જિન નંબર RTOના રેકોર્ડ અને RC બુકમાં નોંધાયેલા હોય છે. મંજૂરી વગર એન્જિન બદલવાથી વાહનની કાનૂની ઓળખ બદલાઈ જાય છે, જે ગંભીર ગુનો ગણાય છે.

જો આવા વાહનનો અકસ્માત થાય અથવા ચોરીની ઘટના બને તો એન્જિન નંબર મેચ ન થવાના કારણે વીમાનો ક્લેમ પણ ફગાવી શકાય છે. ઉપરાંત, પોલીસ તપાસમાં પણ ગંભીર કાનૂની મુશ્કેલીઓ ઊભી થઈ શકે છે.

સેલ્ફ ડ્રાઇવ કાર આપતા લોકો માટે મહત્વની સલાહ

નિષ્ણાતોના જણાવ્યા અનુસાર સેલ્ફ ડ્રાઇવ માટે કાર ભાડે આપતા લોકોએ માત્ર GPS ટ્રેકર લગાવવું પૂરતું નથી. વાહનમાં ઓન-બોર્ડ ડાયગ્નોસ્ટિક (OBD) ટ્રેકિંગ સિસ્ટમ પણ લગાવવી જોઈએ. આ ટેક્નોલોજી દ્વારા વાહનના એન્જિન અથવા અન્ય મહત્વના સ્પેર પાર્ટ્સ સાથે કોઈ છેડછાડ થાય તો તરત જ માલિકને નોટિફિકેશન મળી જાય છે.

હાલ સમગ્ર મામલે પોલીસ ફરિયાદના આધારે તપાસ શરૂ કરી છે અને એન્જિનની હેરાફેરીમાં સામેલ તમામ આરોપીઓ સામે કાયદેસરની કાર્યવાહી હાથ ધરવામાં આવી રહી છે.