ન્યૂ યરની ઉજવણી પર પાણી ફરી વળશે? ગુજરાતમાં 31 ડિસેમ્બર-1 જાન્યુઆરીએ માવઠાંની આગાહી

વર્ષના અંતે માવઠાંની આગાહીથી ખેડૂતો ચિંતિત

31 ડિસેમ્બર-1 જાન્યુઆરીએ ગુજરાતમાં છૂટાછવાયો વરસાદ, 2 જાન્યુઆરીથી કોલ્ડ વેવની શક્યતા

અમદાવાદ:
હવામાન નિષ્ણાત પરેશ ગોસ્વામી અને હવામાન વિભાગ દ્વારા વર્ષના અંતે ફરી એકવાર માવઠાંની આગાહી કરવામાં આવતા ગુજરાતના ખેડૂતોમાં ચિંતાનો માહોલ સર્જાયો છે. મજબૂત વેસ્ટર્ન ડિસ્ટર્બન્સની અસરને પગલે 31 ડિસેમ્બર અને 1 જાન્યુઆરી દરમિયાન કચ્છ સહિત રાજ્યના વિવિધ વિસ્તારોમાં છૂટાછવાયો કમોસમી વરસાદ થવાની શક્યતા વ્યક્ત કરવામાં આવી છે.

આ કમોસમી વરસાદને કારણે ઘઉં, જીરું અને રાયડા જેવા શિયાળુ પાકોને નુકસાન થવાની ભીતિ સેવાઈ રહી છે. રાજ્યમાં હાલ સવાર-સાંજ ઠંડી અને બપોરે ગરમી એમ બેવડી ઋતુનો અનુભવ થઈ રહ્યો છે. નલિયા 12.6 ડિગ્રી તાપમાન સાથે રાજ્યનું સૌથી ઠંડું શહેર નોંધાયું છે.

બે દિવસ છૂટાછવાયા વરસાદી ઝાપટાંનાં એંધાણ

હવામાન નિષ્ણાત પરેશ ગોસ્વામીના જણાવ્યા મુજબ ઉત્તર ભારત પરથી પસાર થઈ રહેલા મજબૂત વેસ્ટર્ન ડિસ્ટર્બન્સની અસર ગુજરાત સુધી વિસ્તરવાની શક્યતા છે. 30 ડિસેમ્બરથી વાતાવરણમાં પલટો આવશે અને આકાશ વાદળછાયું રહેશે. 31 ડિસેમ્બર 2025 અને 1 જાન્યુઆરી 2026 દરમિયાન રાજ્યના અનેક ભાગોમાં છૂટાછવાયા વરસાદી ઝાપટાં પડી શકે છે.

આ જિલ્લાઓમાં માવઠાંની આગાહી

ક્રમ	જિલ્લાઓ
1	કચ્છ
2	મોરબી
3	સુરેન્દ્રનગર
4	રાજકોટ
5	જુનાગઢ
6	પોરબંદર
7	દ્વારકા
8	જામનગર
9	ભાવનગર
10	અમરેલી
11	ગીર સોમનાથ
12	બનાસકાંઠા
13	સાબરકાંઠા
14	પાટણ
15	મહેસાણા
16	દક્ષિણ ગુજરાત

કચ્છમાં વધુ અસર, સૌરાષ્ટ્ર-ઉત્તર ગુજરાતમાં હળવો વરસાદ

કચ્છના તમામ વિસ્તારોમાં વરસાદની તીવ્રતા વધુ રહેવાની સંભાવના છે. સૌરાષ્ટ્રમાં મોરબી, સુરેન્દ્રનગર, રાજકોટ, જૂનાગઢ, પોરબંદર, દ્વારકા અને જામનગરમાં તેમજ દરિયાકાંઠાના વિસ્તારોમાં ભાવનગર, અમરેલી અને ગીર સોમનાથમાં સામાન્ય ઝાપટાં પડી શકે છે.
ઉત્તર ગુજરાતના બનાસકાંઠા, સાબરકાંઠા, પાટણ અને મહેસાણા જિલ્લામાં હળવો વરસાદ થવાની આગાહી છે, જ્યારે દક્ષિણ ગુજરાતમાં વાદળછાયું વાતાવરણ રહેશે અને ક્યાંક સામાન્ય ઝાપટાં પડી શકે છે.

છેલ્લા 24 કલાકમાં નોંધાયેલું લઘુતમ તાપમાન

શહેર	તાપમાન (°C)
ગાંધીનગર	14
રાજકોટ	14.2
અમદાવાદ	14.8
વડોદરા	15
સુરત	15.7

2-3 જાન્યુઆરીથી ઠંડીનો નવો રાઉન્ડ

વરસાદી માહોલ બાદ 2 અને 3 જાન્યુઆરીથી રાજ્યમાં ઠંડીનો નવો રાઉન્ડ શરૂ થવાની શક્યતા છે. કોલ્ડ વેવની અસરથી તીવ્ર ઠંડી અનુભવાશે. ક્લાઈમેટ ચેન્જને કારણે આ વર્ષે ઠંડીમાં ઘટાડો અને માવઠાંના વરસાદમાં વધારો નોંધાઈ રહ્યો હોવાનું નિષ્ણાતો જણાવી રહ્યા છે.

હવામાન વિભાગે ખેડૂતોને આગાહી ધ્યાનમાં રાખીને પાકની સુરક્ષા માટે જરૂરી તકેદારી રાખવા અપીલ કરી છે.

છેલ્લા 24 કલાકમાં નોંધાયેલું લઘુતમ તાપમાન

શહેર	તાપમાન (°C)
અમરેલી	13.2
ભાવનગર	15.6
ભુજ	15.7
દાહોદ	14.8
ધમણ	16.4
ડાંગ	15.4
ડીસા	13.6
દીવ	14.7
દ્વારકા	18.5
જામનગર	17.6
કંડલા	16.5
નલિયા	12.6
ઓખા	19.8
પોરબંદર	14.2
વેરાવળ	18